ރީކޯ މޫސަ އެމްޑީޕީން ވަކިކޮށް އިތުރު ފަސް މެންބަރުންނާ މެދު ފިޔަވަޅު އަޅައިފި

އެމްޑީޕީގެ ކުރީގެ ޗެއަރޕާސަން ރީކޯ މޫސާމަނިކު އެ ޕާޓީން މިއަދު ވަކިކޮށްފި ކަމަށް އެޕާޓީގެ ފިޔަވަޅު އަޅާ ކޮމިޓީން ހާމަކުރައްވައިފިއެވެ.

މޫސާމަނިކުގެ އިތުރަށް އެހެން ފަސްމެންބަރަކާމެދުވެސް ވަނީ ފިޔަވަޅުއަޅާފައެވެ. އެއީ ވައިކަރަދޫ ދާއިރާގެ މެމްބަރު، މުޙައްމަދު ނާޒިމް، ވެލިދޫ ދާއިރާގެ މެމްބަރ، ޢަބްދުﷲ ޔާމިން، ކުރެންދޫ ދާއިރާގެ މެމްބަރ، ޢަބްދުލްބާރީ ޢަބްދުﷲ، ފެލިދޫ ދާއިރާގެ މެމްބަރ އަޙްމަދު މަރުޒޫޤު، މުލަކު ދާއިރާގެ މެމްބަރ އިބްރާހީމް ނަޞީރެވެ.

އެމްޑީޕީގެ ފިޔަވަޅުއަޅާ ކޮމިޓީގެ މުގައްރިރު އަދި ޕާޓީގެ ނާއިބް ރައީސް މުޙައްމަދު ޝިފާޒު ވިދާޅުވީ އެ 6 މެމްބަރުންނާ މެދު ފިޔަވަޅު އަޅާފައިވަނީ ޕާރލަމެންޓްރީ ގްރޫޕުގެ ހިންގާ ޤަވާޢިދުގެ 30 ވަނަ މާއްދާ އާއި، 36 ވަނަ މާއްދާގެ (4) ވަނަ ނަންބަރާއި (7) ވަނަ ނަންބަރާއި، އަދި އެމް.ޑީ.ޕީގެ އަސާސީ ޤަވާޢިދުގެ 16 ވަނަ މާއްދާއާއި، 113 ވަނަ މާއްދާގެ (ހ) އާއި (ށ) އަށް ރިއާއަތްކޮށް، އެމް.ޑީ.ޕީގެ އަސާސީ ޤަވާޢިދުގެ 113 ވަނަ މާއްދާއިން ފިޔަވަޅު އަޅާ ކޮމެޓީއަށް ލިބިފައިވާ ބާރުގެދަށުން ކަމަށެވެ.

އެބޭފުޅުންވަނީ އުއްތަމަ ފަނިޑޔާރު އަޙުމަދު ފާއިޒް ހުސައިނާއި ފަނޑިޔާރު މުއުތަސިމް އަދުނާން މަގާމުން ވަކިކުރުމަށް ނެގި ވޯޓުގައި އެމްޑީޕީން ނެރެފައިވާ ވިޕާ ޚިލާފުވެފައެވެ.

އެމްޑީޕީން ނެރެފައިވާ ތްރީ ލައިން ވިޕުގައި ބުނެފައިވަނީ، ރައްޔިތުންގެ މަޖިލީހުގެ އެމްޑީޕީގެ ހުރިހާ މެމްބަރުން ހާޒިރުވެ ދެ ފަނޑިޔާރުން ވަކިކުރުމާ ދެކޮޅަށް ވޯޓުލާންޖެހޭނެ ކަމަށެވެ. ނަމަވެސް ވޯޓުނެގި ދުވަހު އެ 6 ބޭފުޅުން ވަޑައިނުގަންނަވައެވެ.

މޫސާ މަނިކާމެދު އެމްޑީޕީގެ ފިޔަވަޅު އަޅާ ކޮމިޓިން އަޅާފައިވާ ފިޔަވަޅަކީ އެޕާޓީން ވަކިކުރުމެވެ. އަލުން ޕާޓީއާ ގުޅެން މޫސާމަނިކު ބޭނުންފުޅުވާ ކަމަށްވާނަމަ އެ ޕާރޓީގެ މެމްބަރުންގެ އިތުބާރު މޫސާ މަނިކާމެދު އަލުން އުފެއްދުމަށްޓަކައި އެ ޕާރޓީގެ އެންމެހައި މެމްބަރުންގެ ކިބައިން މާފަށް އެދިވަޑައިގަންނަން ޖެހެއެވެ. އަދި އެމް.ޑީ.ޕީގެ ރަސްމީ ވެބްސައިޓްގައި ޝާއިޢުކުރުމަށްޓަކައި މޫސާ މަނިކުގެ ބަޔާނެއް ޕާރޓީގެ ސެކްރެޓޭރިއެޓަށް ފޮނުއްވަން ޖެހެއެވެ.

އޭގެ އިތުރަށް މޫސާ މަނިކު އެމް.ޑީ.ޕީ އަށް އަލުން ވަދެވަޑައިގަތުމަށް ސޮއިކުރައްވާ ނަމަ، މޫސާ މަނިކާ އެކު އިތުރު 50 މެމްބަރުން (ގޮތްޕެއް ހެދުމަށް މިހާރު ކަނޑައެޅިފައިވާ އަދަދު) އެ ޕާރޓީއަށް އަލަށް ވެއްދުމަށް މެމްބަރޝިޕް ފޯރމް ހުށަހެޅުއްވުމަށް އޭނާގެ މައްޗަށްވަނީ ލާޒިމްކޮށްފައެވެ. އަދި އަލުން ޕާޓީއަށް ވަދެވަޑައިގަންނަވާ ތާރީޚުން ފެށިގެން ފަސްއަހަރުގެ މުއްދަތުގެ ތެރޭގައި ޕާޓީގެ އެއްވެސް މަޤާމަކަށް ކުރިމަތިނުލެވޭ ގޮތަށްވެސްވަނީ ނިންމާފައެވެ. އަދި ޕާޓީގެ އެއްވެސް ޕްރައިމެރީއެއްގައި ބައިވެރިނުވެވޭ ގޮތަށްވެސް ވަނީ ނިންމާފައެވެ.

މުޙައްމަދު ނާޒިމާމެދު އަޅައިފައިވާ ފިޔަވަޅުތަކީ އެމްޑީޕީގެ މެމްބަރުންގެ އިތުބާރު އޭނާއާމެދު ދެމެހެއްޓުމަށްޓަކައި، އެ ޕާރޓީގެ އެންމެހައި މެމްބަރުންގެ ކިބައިން، ވިޕްލައިނާ ޚިލާފުވެވަޑައިގަތް މައްސަލާގައި، މަޢާފަށްއެދިވަޑައިގެން 1 ޖެނުއަރީ 2015 ވަނަ ދުވަހުގެ ކުރިން ބަޔާނެއް ޕާރޓީގެ ވެބްސައިޓްގައި ޝާއިޢުކުރުމަށްޓަކައި ސެކްރެޓޭރިއެޓަށް ފޮނުއްވުމާއި، ޕީޖީގެ ވިޕްލައިނާ މީގެ ފަހުން ޚިލާފުވެވަޑައިނުގަތުމަށް އޭނާއަށް ނަސޭޙަތްތެރިވުމާއި، ޕާރޓީގެ އެތެރޭގެ އިންތިޚާބީ އަދި އައްޔަނުކުރެވިފައިވާ އެންމެހައި މަޤާމުތަކުން ވަކިކުރުމާއި، ރައްޔިތުންގެ މަޖިލީހުގައި އެމް.ޑީ.ޕީ ގެ ފަރާތުން ތަމްސީލުކުރާ ކޮމެޓީތަކުގެ މުޤައްރިރެއްކަމުގައި އަދި ނައިބު މުޤައްރިރުކަމުގައި ހުންނެވި ނަމަ، އެ ޒިންމާތަކުން ވަކިކުރުމާއި، ޤައުމީ މަޖިލީހުގައާއި، ޤައުމީ ހިންގާ ކޮމެޓީގައާއި، އަދި ޕީޖިގައި ނެގޭ އެއްވެސް ވޯޓެއްގައި ބައިވެރިވެވަޑައި ނުގަނެވޭނޭގޮތަށް މިއަދުން ފެށިގެން 3 މަސްދުވަހަށް ސަސްޕެންޑުކުރުމެވެ. އޭގެ އިތުރަށް އެމް.ޑީ.ޕީ ގެ އެތެރޭގެ ކޮމެޓީތަކުގެ މެމްބަރުކަމުން 3 މަސްދުވަހަށް ސަސްޕެންޑްކުރުމާއި، މަޖިލީހުގައި އެމް.ޑީ.ޕީ ތަމްސީލުކުރުން ނުހިމެނޭގޮތުން، ރާއްޖެއާއި އަދި ރާއްޖެއިން ބޭރުގައި އެމް.ޑީ.ޕީ ތަމްސީލުކުރަން ލިބޭ ފުރުސަތުތަކުގައި، މިއަދުން ފެށިގެން 4 މަސް ދުވަހުގެ މުއްދަތަށް ބައިވެރިވެވަޑައިނުގަނެވޭނޭގޮތަށް ސަސްޕެންޑްކުރުމާއި، މިއަދުން ފެށިގެން ކުރިޔަށް އޮތް 2 އަހަރު ދުވަހުގެ މުއްދަތުގެ ތެރޭގައި އެމް.ޑީ.ޕީ ގެ އެއްވެސް މަޤާމަކަށް ކުރިމަތި ނުލެއްވޭނޭ ގޮތަށް ހެދުމާއި، އެތެރޭގެ އެއްވެސް ޕްރައިމެރީއެއްގައި ބައިވެރިވެވަޑައި ނުގަނެވޭނޭގޮތަށް ސަސްޕެންޑްކުރުމެވެ. އަދި 18 ވަނަ ރައްޔިތުންގެ މަޖިލީހުގެ ކުރިޔަށް އޮތް މުއްދަތުގެ ތެރޭގައި ޕީޖީގެ ވިޕްލައިނަކާ މަޤުބޫލު އުޒުރެއް ނެތި ޚިލާފުވެވަޑައިގެންފިނަމަ، އެގޮތުން ޚިލާފުވެވަޑައިގަތް ތާރީޚުން ފެށިގެން ކުރިޔަށް އޮތް 5 އަހަރު ދުވަހަށް އެމް.ޑީ.ޕީ ގެ އެއްވެސް މަޤާމަކަށް ކުރިމަތި ނުލެއްވޭނޭ ގޮތަށާއި، އަދި އެތެރޭގެ އެއްވެސް ޕްރައިމެރީއެއްގައި ބައިވެރިވެވަޑައިނުގަނެވޭނޭގޮތަށް ސަސްޕެންޑްކުރުމެވެ.

ޢަބްދުﷲ ޔާމިނާއި، ޢަބްދުލްބާރީ ޢަބްދުﷲ އާއި، އަޙްމަދު މަރުޒޫޤާއި، އިބްރާހިމް ނަޞީރާމެދު އެޅި ފިޔަވަޅު ތަކަކީ ޕާރޓީގެ މެމްބަރުންގެ އިތުބާރު ދެމެހެއްޓުމަށްޓަކައި، އެންމެހައި މެމްބަރުންގެ ކިބައިން، ވިޕްލައިނާ ޚިލާފުވެވަޑައިގަތް މައްސަލާގައި، މަޢާފަށްއެދިވަޑައިގެން 1 ޖެނުއަރީ 2015 ވަނަ ދުވަހުގެ ކުރިން އެ މެމްބަރަކު، ބަޔާނެއް ޕާރޓީގެ ވެބްސައިޓްގައި ޝާއިޢު ކުރުމަށްޓަކައި ސެކްރެޓޭރިއެޓަށް ފޮނުއްވުމާއި، ޕީޖީގެ ވިޕްލައިނާ މީގެ ފަހުން ޚިލާފުވެވަޑައިނުގަތުމަށް ނަސޭޙަތްތެރިވުމާއި، ޕާރޓީގެ އެތެރޭގެ އިންތިޚާބީ އަދި އައްޔަނުކުރެވިފައިވާ އެންމެހައި މަޤާމުތަކުން ވަކިކުރުމާއި، ރައްޔިތުންގެ މަޖިލީހުގައި އެމް.ޑީ.ޕީ ގެ ފަރާތުން ތަމްސީލުކުރާ ކޮމެޓީތަކުގެ މުޤައްރިރެއްކަމުގައި އަދި ނައިބު މުޤައްރިރުކަމުގައި ހުންނެވި ނަމަ، އެ ޒިންމާތަކުން ވަކިކުރުމާއި، ޤައުމީ މަޖިލީހުގައާއި، ޤައުމީ ހިންގާ ކޮމެޓީގައާއި، އަދި ޕީޖިގައި ނެގޭ އެއްވެސް ވޯޓެއްގައި ބައިވެރިވެ ވަޑައިނުގަނެވޭނޭ ގޮތަށް މިއަދުން ފެށިގެން 6 މަސްދުވަހަށް ސަސްޕެންޑުކުރުން ހިމެނެއެވެ. އަދި އެޕާޓީގެ އެތެރޭގެ ކޮމެޓީތަކުގެ މެމްބަރުކަމުން 6 މަސްދުވަހަށް ސަސްޕެންޑްކުރުމާއި، މަޖިލީހުގައި އެމް.ޑީ.ޕީ ތަމްސީލުކުރުން ނުހިމެނޭގޮތުން، ރާއްޖެއާއި އަދި ރާއްޖެއިން ބޭރުގައި އެމް.ޑީ.ޕީ ތަމްސީލުކުރަން ލިބޭ ފުރުސަތުތަކުގައި، މިއަދުން ފެށިގެން 1 އަހަރު ދުވަހުގެ މުއްދަތަށް ބައިވެރިވެ ވަޑައިނުގަނެވޭނޭގޮތަށް ސަސްޕެންޑްކުރުމާއި، މިއަދުން ފެށިގެން ކުރިޔަށް އޮތް 3 އަހަރު ދުވަހުގެ މުއްދަތުގެ ތެރޭގައި އެމް.ޑީ.ޕީގެ އެއްވެސް މަޤާމަކަށް ކުރިމަތި ނުލެއްވޭނޭ ގޮތަށާއި، އަދި އެތެރޭގެ އެއްވެސް ޕްރައިމެރީއެއްގައި ބައިވެރިވެ ވަޑައިނުގަނެވޭނޭގޮތަށް ސަސްޕެންޑްކުރުމެވެ. އަދި 18 ވަނަ ރައްޔިތުންގެ މަޖިލީހުގެ ކުރިޔަށް އޮތް މުއްދަތުގެ ތެރޭގައި ޕީޖީގެ ވިޕްލައިނަކާ މަޤުބޫލު އުޒުރެއް ނެތި ޚިލާފުވެވަޑައިގެންފިނަމަ، އެގޮތުން ޚިލާފުވެވަޑައިގަތް ތާރީޚުން ފެށިގެން ކުރިޔަށް އޮތް 5 އަހަރު ދުވަހަށް އެމް.ޑީ.ޕީ ގެ އެއްވެސް މަޤާމަކަށް ކުރިމަތި ނުލެއްވޭނޭގޮތަށާއި، އަދި އެތެރޭގެ އެއްވެސް ޕްރައިމެރީ އެއްގައި ބައިވެރިވެ ވަޑައިނުގަނެވޭނޭގޮތަށް ސަސްޕެންޑްކުރުމެވެ.

އެމްޑީޕީގެ ނާއިބްރައީސް މުޙައްމަދު ޝިފާޒު މިއަދު ވިދާޅުވީ މެންބަރުންނާމެދު ފިޔަވަޅު އަޅުއްވާފައިވަނީ އެއްވެސް ޕްރެޝަރައެއް ނުވަތަ ނުފޫޒެއް އޮވެގެން ނޫންކަމަށެވެ. އެބޭފުޅުންނާމެދު ފިޔަވަޅު އަޅުއްވާފައިވަނީ ޕާޓީގެ އަސާސީ ޤަވާޢިދާ އެއްގޮތަށް ކަމަށްވެސް ވިދާޅުވިއެވެ. އޭނާ ވިދާޅުވީ އެޕާޓީއަކީ އެއްވެސް ޕްރެޝައަކަށް އަދި އެއްވެސް ނުފޫޒެއްގެ ސަބަބުން އިންސާފުން އެއްކިބާވާނެ ޕާޓީއެއް ނޫންކަމަށެވެ.

ޝިފާޒު ވިދާޅުވީ މޫސާމަނިކަކީ އެމްޑީޕީއަށް ވަރަށް ރަނގަޅު ޚިދުމަތްތަކެއް ކުރައްވާފައިވާ ބޭފުޅެއް ކަމަށް ގަބޫލު ކުރައްވާ ކަމަށެވެ. ނަމަވެސް ޕާޓީގެ ސިޔާސަތާ ތަކުރާރުކޮށް ޚިލާފުވާ ކަމަށްވާނަމަ ކޮންމެ މެންބަރަކާމެދުވެސް ފިޔަވަޅު އަޅުއްވާނެ ކަމަށެވެ. ވަކި ފަރުދަކަށްވުރެ ޕާޓީ މުހިންމުވާނެ ކަމަށްވެސް އޭނާ ވިދާޅުވިއެވެ. މޫސަވަނީ ޕާޓީގެ ވިޕްލައިނާ 3 ފަހަރު ޚިލާފުވެފައެވެ. އަނެއް 5 މެންބަރުންވަނީ 1 ފަހަރު ޚިލާފުވެފައެވެ.

ޝިފާޒު ވިދާޅުވީ މޫސާމަނިކަކީ ޕާޓީގެ މެންބަރެއްގެ ގޮތުގައި އެންމެ ޒިންމާދާރު މަގާމު މިހާރު އަދާ ކުރައްވާ ޕާޓީގެ މެންބަރު ކަމަށެވެ. އޭނާ އަދާކުރައްވަމުން ގެންދަވަނީ ރައްޔިތުންގެ މަޖިލީހުގެ ނާއިބް ރައީސްގެ މަގާމެވެ. އެފަދަ މަގާމެއްގައި ހުންނަވައިގެން އެންމެ ކުޑަމިނުން މިމައްސަލާގައި ފިޔަވަޅު އަޅާ ކޮމިޓީއަށް އޭނާ ޖަވާބުދާރީ ނުވާ ކަމަށްވެސް ވިދާޅުވިއެވެ. ޖަވާބުދާރީވެވަޑައިގެންނެވިނަމަ މޫސަގެ އުޒުރާ މެދު ކޮމިޓީން އެހެން ގޮތަކަށްވިސްނުމުގެ ފުރުސަތުވެސް އޮތީސް ކަމަށް ޝިފާޒު ވިދާޅުވިއެވެ.

މިބޭފުޅުންނާމެދު އެޅި ފިޔަވަޅުގެ ކުޑަ ބޮޑުމިން ކަނޑައެޅުމުގައި ކޮމިޓިން ބަލާފައިވަނީ " ވިޕްލައިންތަކާ ޚިލާފުވެވަޑައިގެންފައިވާ މިންވަރަށާއި، މި މައްސަލާގައި ޖަވާބުދާރީވެ ވަޑައިގެންފައިވާކަމާއި ނުވަތަ ޖަވާބުދާރީވެވަޑައިގެންފައި ނުވާކަމަށް ރިޔާއަތް ކުރުމަށްފަހުގައާއި، އަދި މައްސަލާގައި ޖަވާބުދާރީވެ ވަޑައިގަތުމުގައި އެ މެމްބަރަކު މިކޮމެޓީއަށް ޙިއްޞާކުރައްވާފައިވާ މަޢުލޫމާތާއި އަދި މިކޮމެޓީއަށް ލިބިފައިވާ އެހެނިހެން މަޢުލޫމާތުތަކުގެ މައްޗަށް ރިއާއަތްކުރުމަށްފަހުގައެވެ." އެމްޑީޕީން ނެރެފައިވައިވާ ބަޔާނުގައި ބުނެފައިވެއެވެ.

މިފިޔަވަޅުތަކާމެދު ހިތްހަމަ ނުޖެހޭ ކަމަށްވާނަމަ އެމްޑީޕީގެ އިސްތިއުނާފް ކޮމިޓީއަށް ހުށަހެޅުމުގެ ފުރުސަތުވެސް އޮންނާނެ ކަމަށް ޝިފާޒު ވިދާޅުވިއެވެ.

މިބޭފުޅުންނާމެދު ފިޔަވަޅުއަޅަން ނިންމާފައިވަނީ ކޮމިޓީގެ 99 އިންސައްތަ ތާއީދާއެކު ކަމަށްވެސް ޝިފާޒު ވިދާޅުވިއެވެ.