ހުރިހާ ދާއިރާއަކަށް ބޭނުންވާ ޚިދުމަތްތައް ބަޖެޓުގައި ހިމަނާފައިވާނެ-ރައީސް

ރާއްޖޭގެ ހުރިހާ ދާއިރާއަކަށް ބޭނުންވާ ޚިދުމަތްތައް އަންނަ އަހަރަށް ދައުލަތުން ކަނޑައަޅާފައިވާ ބަޖެޓުގައި ހިމަނާފައިވާނެ ކަމަށް ރައީސުލްޖުމްހުރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.

އުނގޫފާރު ހޮސްޕީޓަލުގެ އާ ޢިމާރާތް ހުޅުވުމަށް ބޭއްވި ރަސްމީޖަލްސާގައި ވާހަކަފުޅު ދައްކަވަމުން އެމަނިކުފާނު ވިދާޅުވީ ރާއްޖޭގައި މިހާރުއޮތް ސަރުކާރަކީ އެއްވެސް ކުލައަކަށް ނުވަތަ ފިކުރަކަށް ނުވަތަ އެމީހެއްގެ ވިސްނުމަކަށް ބަލައިގެން ޚިދުމަތްދޭ ސަރުކާރެއް ނޫން ކަމަށެވެ. މިސަރުކާރުން ޚިދުމަތްދޭނީ ދިވެހި ރައްޔިތުންނަށް ކަމަށް ވިދާޅުވިއެވެ.

ރައީސް ވިދާޅުވީ އުނގޫފާރު ހިމެނޭ ރ. އަތޮޅުގެ ފަސްދާއިރާގެ ތެރެއިން 4 ދާއިރާއެއްގެ މަޖިލިސް މެންބަރުން ނިސްބަތްވަނީ ޕީޕީއެމް އަށް ކަމަށެވެ. އެހެން ކަމުން އެދާއިރާއަށް ބޭނުންވާ ކަންކަން އެ މެމްބަރުންގެ ފަރާތުން އަޑުއިވޭ ކަމަށެވެ. ނަމަވެސް އަލިފުށީ ދާއިރާގެ ތަރައްގީއަށް ބޭނުންވާ ކަންކަން އަޑުއިވެނީ އެދާއިރާގެ މެންބަރ މުހައްމަދު ރަޝީދުގެ ފަރާތުން ނޫން ކަމަށް ވިދާޅުވިއެވެ. އެދާއިރާއަށް ބޭނުންވާ ތަރައްގީ ހިމަނާފައި "ބަޖެޓުގައި ޖެހި މަޝްރޫޢުތަކަށް ވެސް އެ ދާއިރާގެ މެމްބަރު ވަނީ ވޯޓު ނުދެއްވާފައި،" ރައީސް ވިދާޅުވިއެވެ.

އެމަނިކުފާނު ވިދާޅުވީ މިފަދަ ކަންކަން ރައްޔިތުންނަށް އެނގެންޖެހޭނެ ކަމަށެވެ. އެމަނިކުފާނު ވިދާޅުވީ ޚިޔާލު ތަފާތުވިޔަސް މުޅި ބަޖެޓަށް ނޫނެކެ ބުމނެގެން ނުވާނެ ކަމަށެވެ.

އެމަނިކުފާނު ވިދާޅުވީ އަލިފުށީ ދާއިރާގެ މެންބަރ މުހައްމަދު ރަޝީދު ނޫނަސް ބަޖެޓަށް ނޫނެކޭ ބުނި މެމްބަރުން ގިނަ ކަމަށެވެ. ނަމަވެސް އެދާއިރާތަކަށް ބޭނުންވާ ޚދުމަތްދިނުމަށްވެސް ބަޖެޓުގައި ހިމަނާފައިވާނެ ކަމަށް ވިދާޅުވިއެވެ. "މި ސަރުކާރަކީ ކުލައަކަށް، ނުވަތަ އެމީހެއްގެ ފިކުރަކަށް، ވިސްނުމަކަށް ބަލައިގެން ޚިދުމަތް ދޭނެ ސަރުކާރެއް ނޫން. އެ ހުރިހާ ދާއިރާތަކުގެ ރައްޔިތުންނަށް ބޭނުންވާ ޚިދުމަތްތައް ވެސް އަޅުގަނޑުމެންގެ ބަޖެޓުގައި އިރާދަކުރެއްވިއްޔާ މި އަންނަ އަހަރަށް އޮންނާނީ ހިމަނާފައި،" ރައީސް ވިދާޅުވިއެވެ. އެހެންވީމާ ހިދުމަތް ލިބިގެންދާނެ،" ރައީސް ވިދާޅުވި އެވެ.

ރައީސް ވިދާޅުވީ ރަށްރަށުގައި މިހާރުދަނީ އެސްޓީއޯގެ ފާމަސީތައް ހުުޅުވި އާސަންދައިގެ ޚިދުމަތްވެސް ލިބެމުން ކަމަށެވެ. އެއީ ލިބިގެންދިޔަ ވަރަށް ބޮޑު އުފާފުޅެއް ކަމަށްވެސް ވިދާޅުވިއެވެ. މިހާތަނަށް 57 ރަށެއްގައިވަނީ އެސްޓީއީގެ ފާމަސީތައް ހުޅުވައި ޚިދުމަތްދޭން ފަށައިފައެވެ. އެމަނިކުފާނު ވިދާޅުވީ އެސްޓީއީގެ ބޭސްފިހާރަތައް ހުޅުވުމުން އަމިއްލަ ފަރާތްތަކުގެ ބޭސް ފިހާރަތައް ބަންދު ކުރަން ނުޖެހޭނެ ކަމަށެވެ. އޭގެ ބަދަލުގައި ބޭސް ފިހާރަ އިތުރު ކުރަންވީ ކަމަށް އެމަނިކުފާނު ވިދާޅުވިއެވެ. އެސްޓީއޯގެ ބޭސްފިހާރަތަކުން ހުސްނުވެ، ކޮންޓްރޯލް އަގުގައި ބޭސްލިބޭނެ ކަމުގެ ހިތްޕުޅު ހަމަޖެހި ވަޑައިގަތުން މިހާރުވެސް އެބައޮތް ކަމަށެވެ. މީހުން އުޅޭ ހުރިހާ ރަށެއްގައި އެސްޓީއީގެ ބޭސްފިހާރަ އެޅުމަށްވަނީ ހަމަޖެހިފައެވެ. އެގޮތުން 2015 ވަނަ އަހަރު ނިމި 2016 ވަނައަހަރު ފެށޭއިރު މީހުން އުޅޭ ކޮންމެ ރަށެއްގައި ސަރުކާރުގެ ބޭސްފިހާރައެއް ހުންނާނެ ކަމަށް ރައީސް ވިދާޅުވިއެވެ.

"ސަރުކާރުގެ ފާމަސީއެއް ހުރެއްޖެ ކަމަށް ވަންޏާ މިވާ ފަސޭހައަކީ އަޅުގަނޑަށް ހިތްހަމަޖެހުމާ އެކީގައި ނިދާ އެބަލެވޭ. ސަރުކާރުން އެތަންތަނަށް ބޭނުންވާ ބޭސް ހުންނާނެ. ދެވަނަ ކަމަކަށް ރައްޔިތުންނަށް ބޭހުގެ އަގު ކޮންޓްރޯލް ކުރެވިގެން ބޭސްލިބޭނެ ކަމުގެ ކަށަވަރުކަން އަޅުގަނޑަށް އޮވޭ." ރައީސް ވިދާޅުވިއެވެ.