ތިނަދޫގައި 558 ކިލޯވޮޓްގެ ސޯލާ ސިސްޓަމް ހަރުކޮށްފި

މިނިސްޓްރީ އޮފް އެންވަޔަރަންމަންޓް އެންޑް އެނަރޖީ ގެ ފަރާތުން ގދ. ތިނަދޫގައި ކުރިއަށް ގެންދިޔަ “ކްލީން އެނަރޖީ ފޮރ ކްލައިމެޓް މިޓިގޭޝަން” މަޝްރޫޢުގެ ދަށުން އެރަށުގައި 558 ކިލޯވޮޓްގެ ސޯލާ ސިސްޓަމް ހަރުކޮށްފިއެވެ.

މިމަޝްރޫޢުގެ ފުރަތަމަ ފިޔަވަހީގެ ދަށުން އެރަށުގެ ތިން އިމާރާތެއްގައި އިރުގެ އަލިން ކަރަންޓު އުފައްދާ 308 ކިލޯވޮޓްގެ ސޯލަރ ޕީވީ ސިސްޓަމް ހަރުކުރެވިފައިވެއެވެ. ދެވަނަ ފިޔަވަހީގެ ދަށުން ވަނީ އިތުރު 250 ކިލޯވޮޓްގެ ސޯލަރ ޕީވީ ސިސްޓަމް ހަރުކޮށް އެރަށުގެ ކަރަންޓު ވިއުގައަށް ގުޅާލާފައި ކަމަށް ހަކަތައާ ބެހޭ މިނިސްޓްރީންވަނީ ހާމަކުރައްވާފައެވެ.

މުޅިޖުމްލަ 558 ކިލޯވޮޓްގެ ސޯލަރ ޕީވީ ސިސްޓަމަކީ އެރަށަށް ދުވާލުގަޑީގައި ބޭނުންވާ ކަރަންޓުގެ އެންމެ މަތީ ޢަދަދުގެ 50 އިންސައްތަ އާއި އެއްވަރުގެ ޢަދަދެއް ކަމަށްވެސް ހަކަތައާ ބެހޭ މިނިސްޓްރީން ހާމަކުރައްވާފައިވެއެވެ.

މިމަޝްރޫޢުގެ ދެވަނަ ފިޔަވަހީގެ ދަށުނ250 ކިލޯވޮޓްގެ ސިސްޓަމް ތިނަދޫގެ ގްރިޑަށް ގުޅާލުމުގެ ގޮތުން އެރަށުގައި މިއަދު ވަނީ ރަސްމިއްޔާތެއް ބާއްވައިފައެވެ. އެރަސްމިއްޔާތުގައި ގައި ވާހަކަފުޅު ދައްކަވަމުން މިނިސްޓަރ އޮފް އެންވަޔަރަންމަންޓް އެންޑް އެނަރޖީ ޠާރިޤް އިބްރާހީމް ވިދާޅުވީ މިސިސްޓަމަކީ މިހާތަނަށް އަތޮޅު ތެރޭގައި ޤާއިމުކުރެވުނު އެންމެ ބޮޑު ސިސްޓަމް ކަމަށެވެ. އެހެން ކަމުން އެއީ ނަމޫނާ ޕްރޮޖެކްޓެއް ކަމަށް ވިދާޅުވިއެވެ.

“އަޅުގަނޑު ފާހަގަކޮށްލަން ބޭނުން މިއީ އަތޮޅުތެރޭގައި މިގޮތުން ޤާއިމުކުރެވުނު އެންމެ ބޮޑު ސިސްޓަމްކަން” މިނިސްޓަރ ވިދާޅުވެފައިވެއެވެ. އެމަނިކުފާނު ވިދާޅުވީ ރާއްޖެ ތަރައްޤީކޮށް ކުރިއެރުވުމުގައި ހަކަތައިގެ ދައުރު އިތުރު ވެފައިވާކަމަށެވެ. އެހެން ކަމުން ތެލުގެ ޚަރަދު ކުޑަކުރަން ޖެހޭ ކަމަށްވެސް ވިދާޅުވިއެވެ.

” ރާއްޖެ ތަރައްޤީކޮށް ކުރިއެރުވުމުގައި ހަކަތައިގެ ދައުރު އިންތިހާއަށް އިތުރު ވެފައިވާއިރު މިކަމުގައި ބަރޯސާވާންޖެހިފައިވަނީ ރާއްޖެއިން ބޭރުން އެތެރެކުރާ ތެލަށް. 2013 ވަނަ އަހަރު އެކަނިވެސް ތެލުގެ ބާވަތްތައް އެތެރެކުރުމަށް ގާތްގަނޑަކަށް 7 ބިލިއަން ރުފިޔާ ވަނީ ޚަރަދު ކުރެވިފައި،" އެމަނިކުފާނު ވިދާޅުވެފައިވެއެވެ.

މިމަޝްރޫޢުގެ ދަށުން ތިނަދޫގެ ތަފާތު 20 ތަނެއްގެ އެނަރޖީ އޮޑިޓް ހަދައި މި އޮޑިޓްގެ ހޯދުންތަކުގެ އަލީގައި ކަރަންޓު މަދުން ބޭނުންކުރާ އާލާތްތައް ހަރުކުރެވިފައި ކަމަށްވެސް ތިމާވެއްޓާއި ހަކަތައާ ބެހޭ މިނިސްޓްރީން ހާމަކުރައްވާފައިވެއެވެ. އެތަންތަނުގެ ތެރޭގައި ޑރ.ޢަބްދުލްސަމަދު މެމޯރިއަލް ހޮސްޕިޓަލް، ތިނަދޫ ސްކޫލް، އަބޫބަކުރު ސްކޫލް، ރަށު ކައުންސިލުގެ އިދާރާ، އަތޮޅު ތަޢުލީމީ މަރުކަޒު އަދި އިންޖީނުގެ ހިމެނެއެވެ. އޭގެ ތެރޭގައި ކަރަންޓު ޚަރަދު ކުޑަ އިންވަރޓަރ އެއަރ ކޮންޑިޝަނަރާއި، އެލް.އީ.ޑީ ހޮޅިބުރި އަދި އެލް.އީ.ޑީ ބޮކި ހިމެނެއެވެ. އަދި މީގެ އިތުރުން 5،000 އެލް.އީ.ޑީ ބޮކި ވަނީ ރަށުގެ ގެތަކަށް ހަދިޔާކުރެވިފައެވެ. ތިނަދޫގައި ކުރިއަށް ގެންދެވުނު މިމަޝްރޫޢުގެ ސަބަބުން ޖައްވަށް ބޭރުވާ ވިހަ ގޭހުގެ މިންވަރު ދަށްވެ، ކަރަންޓު އުފެއްދުމަށް ތެޔޮ އަންދަންޖެހޭ މިންވަރު ކުޑަވެގެންދާނެ ކަމަށްވެސް މިނިސްޓްރީން ބުނެފައިވެއެވެ.