ލޯންޗު ދުއްވަން ދަސްކޮށްދޭ ކޯހެއް ފުލުހުން ފަށައިފި

މޯލްޑިވްސް ޕޮލިސް ސަރވިސްގެ މެރިން ޕޮލިސް އާއި އިންސްޓިޓިއުޓް ފޮރ ސެކިއުރިޓީ އެންޑް ލޯ އެންފޯސްމަންޓް ސްޓަޑީޒް (އައިލްސް) ގުޅިގެން ޒުވާނުންނަށް ޚާއްސަކޮށްގެން ލޯންޗް ދުއްވަން ދަސްކޮށްދޭ ކޯހެއް ފަށައިފިއެވެ.

މި ޑިސެމްބަރު މަހުގެ 21 ވަނަ ދުވަހުން ފެށިގެން 15 ދުވަހުގެ މުއްދަތަށް ކުރިއަށް ގެންދާ މި ކޯހަކީ ޒުވާނުން ކުށުގެ މާހައުލުން ދުރުކޮށް ޒުވާނުގެ މުސްތަޤުބަލުގައި ފައިދާކުރުވަނިވި މަސައްކަތެއް ދަސްކޮށްދީ ޒުވާނުންނަށް ވަޒީފާގެ ފުރުސަތުތައް ހޯދައިދިނުމުގެ މަޤުޞަދުގައި ކުރިއަށް ގެންދާ ކޯހެއް ކަމަށްވެސް ފުލުހުން ބުނެފައިވެއެވެ.

މި ކޯހުގައި 10 ޒުވާނަކު ވަނީ ބައިވެރިވެފައެވެ. އަދި 5 ފުލުހުންވެސް ބައިވެރިވެފައިވެއެވެ. ބައިވެރިވި 10 ޒުވާނުންނަކީ ފުލުހުން ހިންގި ބްލޫސް ފޮރ ޔޫތު ޕްރޮގްރާމްގައި ބައިވެރިވި ޒުވާނުންނަށް ފުރުސަތު ހުޅުވާލުމުން ބައިވެރިވި ޒުވާނުން ކަމަށް ފުލުހުންވަނީ ބުނެފައެވެ.

ދޫނިދޫގައި ކުރިއަށްދާ މި ކޯހުގައި ކަނޑުމަތީގެ ސަލާމަތާއި ރައްކާތެރިކަމަށް ހެދިފައިވާ ޤާނޫނާއި ޤަވާއިދުތަކުގެ އިތުރުން ޖީޕީއެސް އަދި ސަމުގާ ފަދަ ބައިތައް ކިޔަވައިދިނުމަށް ހަމަޖެހިފައިވެއެވެ. އަދި ޢަމަލީ ބައިތައް ކުރިއަށް ގެންދިޔުމަށް ވަނީ ހަމަޖެހިފައެވެ.

މި ކޯހުގައި ކިޔަވައިދެއްވަނީ މެރިން ޕޮލިސްގެ ތަޖުރިބާކާރު ލޯންޗް ކެޕްޓަނުންނެވެ.

ކޯސް ފެށުމުގެ ގޮތުން މިއަދު ދޫނިދޫގައި ބޭއްވި ރަސްމިއްޔާތު ޝަރަފްވެރިކޮށްދެއްވީ އިންސްޓިޓިއުޓް ފޮރ ސެކިއުރިޓީ އެންޑް ލޯ އެންފޯސްމަންޓް ސްޓަޑީޒްގެ އެގްޒެކެޓިވް ޑިރެކްޓަރ ޗީފް ސްޕްރިޓެންޑެންޓް އޮފް ޕޮލިސް ޢަބްދުﷲ ނަވާޒު ކަމަށް ފުލުހުން ބުނެފައިވެއެވެ.

މި ރަސްމިއްޔާތުގައި އޭނާ ދެއްކެވި ވާހަކަފުޅުގައި ޒުވާނުން ކުށުގެ މާހައުލުން ދުރުކޮށް މަސައްކަތްތެރި ޒިންމާދާރު ބައެއް ގޮތުގައި ހެދުމަށް ފުލުހުން ކުރަމުންދާ މަސައްކަތްތަކާ ބެހޭގޮތުން ވާހަކަ ދެއްކެވިއެވެ. އަދި މި ކޯހުން ދަސްކޮށްދޭތަކެތީގެ ބޭނުން ހިފައިގެން ބޭނުންތެރި ޒިންމާދާރު މީހަކަށްވުމަށް ކޯހުގެ ބައިވެރިންގެ ކިބައިން އެދިވަޑައިގެންނެވިއެވެ.