އެމްޑީޕީގެ އަސާސީ ގަވާއިދު ބުނާ ގޮތުން މޫސާ މަނިކު ޕާޓީން ވަކިކުރަން ޖެހޭ

އުއްތަމަ ފަނޑިޔާރު އަހުމަދު ފާއިޒް ހުސައިން އާއި ސުޕްރީމް ކޯޓުގެ ފަނޑިޔާރު އަހުމަދު މުއުތަސިމް އަދުނާން މަގާމުން ވަކިކުރި ރައްޔިތުންގެ މަޖިލީހުގެ ޖަލްސާ އަށް ވަޑައިނުގެންނެވި އެމްޑީޕީގެ މެމްބަރުންގެ ތެރޭގައި ހިމެނި ވަޑައިގަންނަވާ އެޕާޓީގެ ކުރީގެ ޗެއާޕާސަން ރީކޯ މޫސާމަނިކު އެޕާޓީން ވަކި ކުރުމަށް އަސާސީ ގަވާއިދު ތަންދޭ ކަމަށް މައުލޫމާތު ލިބިއްޖެއެވެ.

ހުޅުހެންވޭރުގެ ދާއިރާގެ މެންބަރު އަދި މަޖިލީހުގެ މިހާރުގެ ނާއިބް ރައީސް މޫސާމަނިކާއި އެމްޑީޕީގެ އިތުރު ފަސް މެންބަރުން އުއްތަމަ ފަނޑިޔާރު އަހުމަދު ފާއިޒް ހުސައިން އާއި ސުޕްރީމް ކޯޓުގެ ފަނޑިޔާރު އަހުމަދު މުއުތަސިމް އަދުނާން މަގާމުން ވަކިކުރި ރައްޔިތުންގެ މަޖިލީހުގެ ޖަލްސާއަށް ވަޑައިނުގެންނެވުމުން އެބޭފުޅުންނާމެދު ފިޔަވަޅު އަޅަން އެޕާޓީން ވަނީ ނިންމާފައެވެ.

އެޖަލްސާއަށް އެދުވަހު ވަޑައިނުގަނަވަނީ ވައިކަރަދޫ ދާއިރާގެ މުޙައްމަދު ނާޒިމާއި، ވެލިދޫ ދާއިރާގެ ޢަބްދުﷲ ޔާމީނާއި، މުލަކު ދާއިރާގެ އިބްރާހީމް ނަސީރާއި، ފެލިދޫ ދާއިރާގެ އަޙުމަދު މަރުޒޫގާއި، ކުރެންދޫ ދާއިރާގެ ޢަބްދުލްބާރީ ޢަބްދުﷲ އަދި ހުޅުހެންވޭރު ދާއިރާގެ ރީކޯ މޫސާ މަނިކެވެ. މި ބޭފުޅުންގެ ތެރެއިން މޫސާ މަނިކާއި، މަރުޒޫގު ފިޔަވައި ދެންތިއްބެވި 4 ބޭފުޅުންވަނީ މައްސަލަ ބެލި އެމްޑީޕީގެ ފިޔަވަޅުއަޅާ ކޮމިޓީއަށް ޖަވާބުދާރީވެ ވަޑައިގެންފައެވެ.

ޖަވާބުދާރީވެ ވަޑައިގެންނެވި 4 ބޭފުޅުންވަނީ އެބޭފުޅުންގެ ދިފާޢުގައި ވަކާލާތު ކުރައްވައި ވާހަކަ ދައްކަވާފައެވެ. ނަމަވެސް އެމްޑީޕީން ދެކޭ ގޮތުގައި އެފަދަ މުހިންމު ވޯޓެއްގައި ބައިވެރި ނުވުމަކީ ސިޔާސީ ގޮތުން ޕާޓީއަށް ލިބުނު ވަރަށް ބޮޑު ގެއްލުމެކެވެ. އެހެން ކަމުން މި 6 ބޭފުޅުންނާމެދުވެސް ހަރުކަށި ފިޔަވަޅު އަޅާނެއެވެ. ފިޔަވަޅު ނާޅުއްވައި ދުލެއް ނުކުރައްވާނެ ކަމަށް ދުވަސް އަށްވަނީ ކަށަވަރު ވެފައެވެ.

އެބޭފުޅުންނާމެދު އެޅިދާނެ ފިޔަވަޅުގެ ތަކުގެ ތެރޭގައި އިންޒާރު ދިނުން، ސަސްޕެންޑްކުރުން، ޖުރިމަނާ ކުރުން، ޕާޓީން ވަކި ކުރުން ހިމެނެއެވެ. މިބޭފުޅުންގެ ތެރެއިން މޫސާ މަނިކު ޕާޓީން ވަކިކުރާނެ ކަމަށް އިތުބާރުހުރި ފަރާތަކުންވަނީ ކަށަވަރު ކޮށްދިފައެވެ. އެ 6 ބޭފުޅުންގެ ރެކޯޑް ތަކަށް ބަލާއިރު 5 ބޭފުޅަކު ވަނީ ޕާޓީގެ ވިޕްލައިނާ ޚިލާފަށް އެއްފަހަރު ވޯޓު ދެއްވާފައެވެ. އެއްބޭފުޅަކު ވަނީ ވިޕާ ޚިލާފަށް 3 ފަހަރު ވޯޓު ދެއްވާފައެވެ. އެއީ ރީކޯ މޫސާ މަނިކެވެ. ނަމަވެސް މިބޭފުޅުންނާމެދު އަޅުއްވަން ނިންމަވާފައިވާ ފިޔަވަޅުތަކެއް ޕާޓީން ހާމަައެއް ނުކުރައްވައެވެ. ނަމަވެސް މިރޭ ނުވަތަ މާދަމާގެ ވަގުތެއްގައި އެފިޔަވަޅުތައް އިޢުލާން ކުރައްވާނެ ކަމަށް އެނގިފައިވެއެވެ.

މިބޭފުޅުންގެ މައްސަލަތައް ތަހުގީގު ކުރިއިރު ޕާޓީގެ ވަގުތު ބޭނުންކޮށްގެން ޕާޓީގެ ސިޔާސަތާއި، ފިކުރާ ނުގުޅޭ ވާހަކަތައް މޫސާ މަނިކު ވަނީ މަޖިލީހުގައި ދައްކަވާފައި ކަމަށް ވަނީ ފާހަގަ ކުރެވިފައެވެ. ޕާތީގެ މެމްބަރެއްގެ ގޮތުގައި ހުންނަވައިގެން މަޖިލީހުގެ ނާއިބު ރައީސްކަން ކުރައްވަމުން ގެންދަވާ ބޭފުޅަކު ޕާޓީގެ ސިޔާސަތާ ދެކޮޅަށް ވާހަކަ ދެއްކެވުމަކީ ބޮޑު މައްސަލައެއްގެ ގޮތުގައިވެސް އެމްޑީޕީން ދެކެއެވެ.

ދުވަސް ނޫހަށް ކަށަަވަރު ވެފައިވާ ގޮތުގައި އެމްޑީޕީގެ ރައީސް މުޙައްމަދު ނަޝީދާއި، ނާއިބް ރައީސް ޝިފާޒު ބޭނުންފުޅުވަނީ އެއްވެސް ބޭފުޅަކު ޕާޓީން ވަކި ނުކުރުމަށެވެ. އޭގެ ބަދަލުގައި ޕާޓީތެރެއިން ސިޔާސީ ހައްލެއް ހޯދުމަށް މަސައްކަތް ކުރުމަށް އެދެބޭފުޅުން ބޭނުންވާ ކަމަށްވަނީ އެނގިފައެވެ. ނަމަވެސް ޕާޓީގެ ގައުމީ މަޖިލީހާއި، ޕާޓީގެ އެހެން ބައެއް އިސްވެރިންނާއި، ގިނަ މެމްބަރުން ބޭނުންވަނީ ވަކިކުރަން ޖެހޭ ބޭފުޅަކު ވަކި ކުރުން ކަމަށްވެސް ދުވަހަށްވަނީ އެނގިފައެވެ.

މައުލޫމާތު ލިބިފައިވާ ގޮތުގައި މި 6 ބޭފުޅުން އެދުވަހުގެ ޖަލްސާއަށް ވަޑައިގެންނެވިނަމަ އެމްޑީޕިއަށް ވަރަށް ބޮޑު ސިޔާސީ ކުރިއެރުމެއް އެދުވަހު ލިބިގެންދާނެއެވެ. ނަމަވެސް އެއީ ކޮންކަހަލަ ކުރިއެރުމެއް ކަމެއް އެނގިފައެއް ނުވެއެވެ.

އުއްތަމަ ފަނޑިޔާރު ފާއިޒާއި ފަނޑިޔާރު މުއުތަސިމް ވަކިކުރަން ރައްޔިތުންގެ މަޖިލީހުން ނެގި ވޯޓުގައި 74 މެންބަރުން ބައިވެރިވެ ވަޑައި ގެންނެވިއެވެ. އެ ބޭފުޅުން ވަކިކުރުމަށް ފާސްކުރީ 53 މެމްބަރުންގެ ވޯޓުންނެވެ. އެއީ ވޯޓުގައި ބައިވެރިވި 74 މެމްބަރުންގެ ތިންބައިކުޅަ ދެ ބައި އަޣުލަބިއްޔަތަށް ވުރެ ތިން ވޯޓު އިތުރު އަދަދެކެވެ. އެދެ ބޭފުޅުން ވަކިކުރަން ބޭނުންވަނީ 50 ވޯޓެވެ. އެދޭބޭފުޅުން ވަކި ކުރުމަށް ނުފެންނަ ކަމަށް ވޯޓު ދެއްވާފައިވަނީ 21 މެންބަރުންނެވެ. ޕީޕީއެމްގެ މުޙައްމަދު ނަޝީދު ވަކި ކޮޅަކަށް ވޯޓެއް ނުދެއްވައެވެ.

ސްޕްރީމްކޯޓުގެ ފަނޑިޔާރުންގެ އަދަދު 5 އަށް މަދުކުރުމަށް ހުށަހެޅީ އެމްޑީޕީގެ މަރަދޫ ދާއިރާގެ މެމްބަރ އިބްރާހީމް ޝަރީފެވެ. އެ މައްސަލަ އަނބުރައި ނެގުމަށް އެމްޑީޕީން އޭނާއަށް އެންގިއެވެ. ނަމަވެސް މައްސަލަ އޭނާ ނަންގަވާފައެއް ނުވެއެވެ.