ޑިޖިޓަލް ފޮރެންސިކް ޑިވައިސްތަކެއް ފުލުހުންނަށް ހަދިޔާކޮށްފި

އޮސްޓްރޭލިއަން ފެޑެރަލް ޕޮލިސް އިން މޯލްޑިވްސް ޕޮލިސް ސާވިސް އަށް ޑިޖިޓަލް ފޮރެންސިކް ޑިވައިސް ތަކެއް ހަދިޔާ ކޮށްފި ކަމަށް ފުލުހުން ބުނެފިއެވެ.

މިކަމަށްޓަކައި މިއަދު ހެނދުނު އިސްކަންދަރު ބިލްޑިންގގައި ބޭއްވި ރަސްމިއްޔާތެއްގައި އޮސްޓްރޭލިއަން ފެޑެރަލް ޕޮލިސްގެ ފަރާތުން މި ޑިވައިޒްތައް ހަވާލުކޮށްދެއްވީ ފެޑެރަލް ޕޮލިސްގެ ސީނިއަރ ލިއޭޒަން އޮފިސަރ މިސްޓަރ ކްރިސްޓޮފަރ ވުޑްސް އެވެ. މޯލްޑިވސް ޕޮލިސް ސާވިސްގެ ފަރާތުން މި ޑިވައިޒްތަކާ ހަވާލުވެލެއްވީ ކޮމިޝަނަރ އޮފް ޕޮލިސް ހުސެން ވަހީދު އެވެ.

މިތަކެއްޗާ ހަވާލުވެލެއްވުމަށްފަހު ކޮމިޝަނަރ އޮފް ޕޮލިސް ޙުސައިން ވަޙީދު ދެއްކެވި ވާހަކަފުޅުގައި އޮސްޓްރޭލިއަން ފެޑަަލް ޕޮލިސްގެ ފަރާތުން ފުލުހުންނަށް ހަދިޔާކުރި ޑިވައިސްތަކުގެ ސަބަބުން ފުލުހުންގެ މަސައްކަތަަށް އިތުރު ކުރިއެރުމެއް ލިބިގެންދާނެކަމަށެވެ. އަދި ފުލުހުންގެ ޚިދުމަތް ތަރައްޤީކޮށް ކުރިއެރުވުމަށް އެކުވެރި ޤައުމުތަކުން ވެދެއްވާ އެހީތެރިކަން ފާހަގަކޮށް ޝުކުރު އަދާކުރެއްވިއެވެ.މި ރަސްމިއްޔާތުގައި އޮސްޓްރޭލިއަން ފެޑެރަލް ޕޮލިސްގެ ފަރާތުން ފުލުހުންނަށް ހަދިޔާކޮށްފައިވަނީ 37000 އޮސްޓްރޭލިއަން ޑޮލަރުގެ އަގުހުރި ޑިޖިޓަލް ފޮރެންސިކް 2 ޑިވައިޒްއެކެވެ. އަދި މި ދެ ޑިވައިޒްއަކީ އިންޓެލިޖެންސްގެ މަސައްކަތްތަކަށާއި ތަހުޤީޤަށް ބޭނުންވާ މަޢުލޫމާތު ހޯދުމަށް ބޭނުންކުރެވޭ ދެ ޑިވައިޒްއެކެވެ.

މީގެއިތުރުން މި ރަސްމިއްޔާތުގައި މި ޑިވައިސްތަކަށް އަހުލުވެރި ކުރުމަށް 4 ދުވަހުގެ ނިޔަލަށް ހިންގާ ތަމްރީން ޕްރޮގްރާމެއް ވަނީ ފަށާފައެވެ. ”ޑިޖިޓަލް މޮބައިލް އެނަލައިޒިން ޑާޓާ” ނަމުގައި ކުރިއަށް ގެންދާ މި ތަމްރީން ޕްރޮގްރާމްގައި އިންޓެލިޖެންސް ޑައިރެކްޓްރޭޓްގައި މަސައްކަތްކުރާ 12 ފުލުހަކު ބައިވެރިވެއެވެ.

މިރަސްމިއްޔާތުގައި ކޮމިޝަނަރ އޮފް ޕޮލިސް ހުސެއިން ވަހީދުގެ އިތުރުން ޑެޕިއުޓީ ކޮމިޝަނަރ އޮފް ޕޮލިސް އަހުމަދު ސައުދީއާއި ޑައިރެކްޓްރޭޓް އޮފް އިންޓެލިޖެންސްގެ އިސްވެރިންނާއި އިންސްޓިޓިއުޓް ފޮރ ސެކިއުރިޓީ އެންޑް ލޯ އެންފޯސްމަންޓް ސްޓަޑީޒްގެ އިސްވެރިން ބައިވެރިވެވަޑައިގެންނެވިއެވެ.