ކާރެއްގެ ދަށުގައި ރައްކާކޮށްފައިވާ ކަނޑިތަކެއް ފުލުހުން ހޯދައިފި
9 ޑިސެމްބަރ 2014 1:31
ފުލުހުން މިރޭ ހިންގި އޮޕަރޭޝަނުގައި ހޯދައިފައިވާ ކަނޑިތައް-ފޮޓޯ ޕޮލިސް
ކާރެއްގެ ދަށުގައި ރައްކާކޮށްފައިވާ ކަނޑިތަކެއް ހޯދައި ފުލުހުންގެ ބެލުމުގެ ދަށަށް ގެންގޮސްފިއެވެ.
ފުލުހުން މިކަނޑިތައް ހޯދައިފައިވަނީ މިރޭ 00:45 އެހަކަންހާއިރު ފުލުހުން ހިންގި އޮޕަރޭޝަނެއްގައެވެ. ފުލުހުންނަށް ލިބުނު މައުލޫމަތަކާ ގުޅިގެން ފުލުހުން ހިންގި މިހަރަކާތުގައި ކަނޑިތައް ހޯދައިފައި ވަނީ ހެންވޭރު، ރަތްވިލާ ހިނގުމުގައި ޕާކް ކޮށްފައިއޮތް ކާރެއްގެ ދަށުން ކަމަށް ފުލުހުންވަނީ ބުނެފައެވެ.
ކާރުގެ ދަށުގައި ރައްކާކޮށްފައި ވަނިކޮށް ފުލުހުން ހޯދައިފައިވަނީ 4 ކަނޑި ކަމަށްވެސް ފުލުހުންވަނީ ހާމަކޮށްފައެވެ. މިކަނޑިތައް މިހާރުވަނީ ފުލުހުންގެ ބެލުމުގެ ދަށުގައެވެ.
ފުލުހުންގެ މީޑިއާއިން ބުނެފައިވަނީ މިމައްސަލައާ ގުޅިގެން މިހާތަނަށް އެއްވެސް މީހަކު ފުލުހުންގެ ބެލުމުގެ ދަށަށް ގެނެސްފައި ނުވާކަމަށެވެ.
ޗީފް ސްޕްރިންޓެންޑެންޓް އޮފް ޕޮލިސް އިސްމާޢީލް ނަވީން ވިދާޅުވީ މަރާމާރީއާއޮ މިފަދަ އެހެން ކަންކަން ފުލުހުންނަށް ތުހުމަތުކުރެވޭ މީހުން ހުއްޓުވައި ބަލައިފާސްކުރާނެ ކަމަށެވެ. އަދި ޝައްކުކުރެވޭ ތަންތަން ބަލައިފާސްކުރުމުގެ މަސައްކަތްވެސް ކުރަމުންދާނެ ކަމަށެވެ. މާލޭގެ އަމަން ނަގާލަން އެއްވެސް ފަރާތަކަށް ފުރުޞަތު ނުދެއްވާނެކަމަށްވެސް އޭނާ ވިދާޅުވެފައިވެއެވެ.
ކަނޑިތަކެއް ފެނިފައިވާ މި މައްސަލަ ތަހުގީގުު ކުރަމުންދާ ކަމަށް ފުލުހުން ވަނީ ބުނެފައެވެ.
ކިޔުންތެރިންގެ ހިޔާލު