ޑިސެމްބަރު މަހުގެ ފެންބިލުން 30 އިންސައްތަ ޑިސްކައުންޓް ދޭން ނިންމައިފި

މިހިނގާ ޑިސެމްބަރު މަހުގެ ފެން ބިލުން 30 ޕަސެންޓްގެ ޑިސްކައުންޓެއް ރައްޔިތުންނަށް ދިނުމަށް އެމްޑަބްލިއުއެސްސީގެ ބޯޑުން މިއަދު ވަނީ ނިންމާފައި ކަމަށް ޑިފެންސް މިނިސްޓަރ މުޙައްމަދު ނާޒިމް މިރޭ ވިދާޅުވެއްޖެއެވެ.

ފެނާބެހޭ ޓާސްކްފޯސްގެ ފަރާތުން ނޫސްވެރިންނަށް މަޢުލޫމާތު ދެއްވަމުން އެމަނިކުފާނު ވިދާޅުވީ އެމްޑަބްލިޔުއެސްސީގެ ބޯޑުގެ ނިންމެވުމުގެ ސަބަބުން ފެންބިލަށް ލުޔެއް ލިބިގެންދާނެ ކަމަށް އުންމީދު ކުރައްވާ ކަމަށެވެ.

ނަަމަވެސް މާލޭގެ ފެނުގެ ހާލަތު މިހާރު އޮތް ގޮތުން ފެންކުންފުންޏަށް 70 އިންސައްތަ ދައްކަން ޖެހޭވަރަށް ފެނުގެ ޚިދުމަތް ދެވިފައިވޭތޯ ސުވާލު އުފެދޭ ކަމަށްް ބައެއް މީހުންވަނީ ބުނެފައެވެ.

މިނިސްޓަރ ވިދާޅުވީ ވެސް 10:00 އިން 12:00 އަށް އަދި މާދަމާ ހެނދުނު 8:00 އިން 10:00 އަށް ގޭގެއަށް ފެން ދޫކުރާނެ ކަމަށެވެ. އެކަމަކު ބައެއް ހިސާބުތަކަށް އަދިވެސް ޕްރެޝަރުގައި ފެން ނުލިބިދާނެ ކަމަށް ވިދާޅުވިއެވެ. އެމަނިކުފާނު ވިދާޅުވީ އެކަށީގެންވާ ގޮތެއްގައި މިހާރު ފެން އުފެއްދެމުންދާ ކަމަށެވެ. އެހެން ކަމުން ފެން އުފެއްދޭ މިންވަރު މިރެއާއި މާދަމާ އިތުރުވާނެ ކަމަށެވެ. ނާޒިމް ވިދާޅުވީ ގޭގޭގެ މަތީ ބުރިތަކުގައި ދިރިއުޅޭ މީހުންނަށް ފެން ނުލިބުމުގެ މައްސަލަ ގާތްގަނޑަކަށް ދެ ދުވަހުގެ ތެރޭގައި ހައްލުކުރެވޭނެ ކަމަށެވެ. 

ނާޒިމް ވިދާޅުވީ އަނދާފައިވާ ޕެނަލްބޯޑުތަކަކީ ވަރަށް އަގުބޮޑު އެއްޗެއް ކަަމަށާއި، އެހެން ނަމަވެސް ސަރުކާރުން މިހާރުވެސް ގެންދަނީ އެކަން ހައްލު ކުރުމަށް މަސައްކަތް ކުރަމުން ކަމަށެވެ. އެކަން ކުރުމަށް ރާއްޖެއިން ބޭރުގެ އެހީ ލިބޭތޯ ބަލަން ސަރުކާރުން މަޑުން ނޯންނާނެ ކަމަށްވެސް ވިދާޅުވިއެވެ. މިކަން ހައްލު ކުރުމަށްޓަކައިސިންގަޕޫރުގެ އިތުރު ޓެކްނީޝަނުން މިރޭ ރާއްޖެ އަންނާނެ ކަމަށްވެސް ވިދާޅުވިއެވެ.

މިމައްސަލަ ހައްލު ކުރުމަށް 20 މިލިއަން ޑޮލަރު ހޯދުމަށް، "މާލޭ ވޯޓަރ ކްރައިސިސް މެނޭޖްމެންޓް ފަންޑު"ގެ ނަމުގައި ފަންޑެއްވެސް މިހާރުވަނީ ހުޅުވާފައެވެ.

މާލެއަށްދިމާވެފައިވާ ފެނުގެ މައްސަލަ ހައްލުކޮށްދެއްވުމަށް އަވަށްޓެރި ބައެއް ގައުމުތަކުން ގެންދަނީ އެހީތެރިކަން ފޯރުކޮށް ދެމުންނެވެ. އެގޮތުން އިންޑިއާ، ޗައިނާ، ލަންކާ އިންގެންދަނީ ފެން ފޯރުކޮށް ދެމުންނެވެ.