މާލޭގައި މިހާރު ބޭނުންކުރާ ވާރޭފެން ބޯން ބޭނުން ކުރަން ރަނގަޅެއް ނޫން-އެމް.އެފް.ޑީ
7 ޑިސެމްބަރ 2014 22:33
މާލޭގައި މިހާރު ބޭނުންކުރަމުންދާ ވާރޭ ފެނަކީ ބޯން ކަމުދާ ފެނެއް ނޫންކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ) އިން ބުނެފިއެވެ.
އެތަނުން ބުނެފައިވަނީ ލެބޯޓްރީ ޓެސްޓްތަކުން ދައްކާ ގޮތުން މާލޭގައި މިހާރު ބޭނުންކުރާ ވާރޭ ފެން ބުއިމަށް ކަމުނުދާ ކަމަށެވެ. "ވާރޭފެން ބޯފެނުގެ މިންގަނޑަށް ހިފެހެއްޓިފައި ނުވާތީ" ބޯފެނުގެ ގޮތުގައި ވާރޭފެން ބޭނުން ނުކުރެއްވުމަށް އެތަނުންވަނީ އަންގާފައެވެ. މިފަދަ ފެން ބުއިމަށް ބޭނުން ކުރުމަކީ އޭގެ ސަބަބުން ބޭރަށް ހިންގުންފަދަ ރޯގާއެއް ފެތުރިދާނެ ކަމެއް ކަމަށްވެސް އެތަނުންވަނީ ބުނެފައެވެ.
އެމް.އެފް.ޑީ އިން ބުނެފައިވަނީ އެތަނުންވަނީ ފެންދޫކުރަމުންދާ ތަފާތު ޕޮއިންޓްތަކުން ފެންނަގައި ތަޙުލީލް ކޮށްފައި ކަމަށެވެ. "މިހާތަނަށް ބެލި ބެލުމުން ރާއްޖޭގައި އުފައްދާ އަދި ރާއްޖެއިން ބޭރުން ހަދިޔާގެ ގޮތުގައި ލިބިފައިވާ ފުޅީގެ ފެނާއި އެމްޑަބްލިޔުއެސްސީ އިން ދޫކުރާ ފެން ބޯފެނުގެ މިންގަނޑުގައި ހިފެހެއްޓިފައި ވާކަން ތަޙްލީލްތަކުން ދައްކާ" ކަމަށްވެސް ބުނެފައިވެއެވެ.
އަމިއްލަ ފަރާތްތަކުންވެސް ފެންޕްލާންޓެއް ނުވަތަ އެނޫން ގޮތަކަށް ނަމަވެސް ފެންފޯރުކޮށްދޭން ބޭނުންވާ ކަމަށްވާނަމަ ފެނުގެ ރައްކާތެރިކަން ބެލުމަށްޓަކައި ތަޙްލީލް ކޮށްދެއްވާނެ ކަމަށްވެސް އެމް.އެފް.ޑީ އިން ބުނެފައިވެއެވެ.
އެ ޚިދުމަތް ބޭނުންވާ ފަރާތްތަކުން 9992025 ނަންބަރު ފޯނަށް ގުޅުއްވުމަށް އެމް.އެފް.ޑީ އިންވަނީ އެދިފައެވެ.
ކިޔުންތެރިންގެ ހިޔާލު