އަޅުގަނޑަށް މުހިންމީ ރައްޔިތުންނަށް ބޭނުންވާ ފެން ލިބޭނެގޮތް ހެދުން- ރައީސް ޔާމީން

މާލޭގެ ރައްޔިތުންނަށް ފެންފޯރުކޮށްދިނުމަށް 20 މިލިއަންޑޮލަރަކީ ކުޑައެއްޗެއް ކަމަށާއި ބޭނުންވަނީ މާލޭގެ ރައްޔިތުންނަށް ފެން ފޯރުކޮށްދިނުން ކަމަށް ރައީސުލް ޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމް މިއަދު ވިދާޅުވެއްޖެއެވެ.

"ދިވެހި ރައްޔިތުން ފަސް ދުވަސް، ހަ ދުވަސް، ހަތް ދުވަސް ވަންދެން ފެން ނުބޮއެ ތިބޭ ކަމަށް ވަންޏާ އެކަން ރަނގަޅު ކުރަން 20 މިލިއަން ޑޮލަރަކީ އަޅުގަނޑަށް ކުޑައެއްޗެއް،" ރައީސް ވިދާޅުވިއެވެ. މާލޭގައި މަދުވެގެން 80،000 އަށްވުރެ ގިނަ މީހުން އުޅޭނެ ކަމަށާއި އެމީހުންނަށް ފެން ލިބުމަކީ މާ މުހިންމު ކަމެއް ކަމަށްވެސް އެމަނިކުފާނު ވިދާޅުވިއެވެ.

ރައީސް ޔާމީން ވިދާޅުވީ "އަޅުގަނޑަށް މުހިންމީ މާލޭގެ ރައްޔިތުންނަށް ބޭނުންވާ ފެން ލިބޭނެ ގޮތް ހެދުން. ސަރުކާރުގެ ބަޖެޓަކީ އެތައް ބިލިއަން ރުފިޔާއެއް. ތިންސަތޭކަ މިލިއަން ރުފިޔާ އަކީ މާލޭގެ ރައްޔިތުންނަށް މިހާރު މި ދިމާވެފައިވާ ކަންތައްތަކުން އަރައިގަތުމަށްޓަކައި އަޅުގަނޑުގެ ނަޒަރުގައި ވަރަށް ކުޑަކުޑަ އެއްޗެއް،" ކަމަށެވެ.

ރައީސް ޔާމީން ވިދާޅުވީ އަލިފާނުގެ ހާދިސާގައި 9 ޕެނެލްބޯޑު ހަލާކުވެފައިވާ ކަމަށެވެ. ފެން ދޫކުރުމުގައި ބޭނުންކުރާ "މަސްނޫއީ ސިކުނޑި" އަކީ ޕެނަލް ބޯޑުތައް ކަމަށްވެސް ވިދާޅުވިއެވެ. އެހެން ކަމުން ޕެނަލް ބޯޑު ބަދަލު ކުރުމަކީ ކުރަންޖެހޭ އެންމެ މުހިންމު ކަންތައް ކަމަށްވެސް ވިދާޅުވިއެވެ. އެކަން ކުރުމުގެ މަސައްކަތް ބޭރުގެ ފަރާތްތަކާ ގުޅިގެން މިހާރުވެސް ކުރަމުންދާ ކަމަށް ރައީސް ވިދާޅިވިއެވެ. ބައެއް ޕެނަލްތައް ހެދިފައިވާ ކަމަށްވެސް ރައީސް ވިދާޅުވިއެވެ.