ފެނުގެ މައްސަލަ ހައްލުކުރުމަކީ މުޅިދިވެހިރައްޔިތުންނަށް ބޭނުންވެފައިވާ ކަމެއް-ރައީސް
7 ޑިސެމްބަރ 2014 20:02
ރައީސް ޔާމީން ޕްރެސްއާ މިއަދު ބައްދަލުކުރައްވަނީ-ފޮޓޯ ރައީސް އޮފީސް
މާލެއަށް މިހާރު ދިމާވެފައިވާ ފެނުގެ މައްސަލަ ހައްލު ކުރުމަށް ސަރުކާރުން ކުރަމުންދާ މަސައްކަތަކީ ދިވެހި ހުރިހާ ރައްޔިތުންނަށް ބޭނުންވެފައިހުރި މަސައްކަތެއް ކަމަށް ރައީސުލް ޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމް ވިދާޅުވެއްޖެއެވެ.
ރާއްޖޭގެ މީޑިއާއަށް މަޢުލޫމާތު ދެއްވުމަށް މިއަދު ހަވީރު ރައީސް އޮފީހުގައި ބޭއްވި ބައްދަލުވުމުގައި ރައީސް ޔާމީން ވިދާޅުވީ މިހާރުވެސް ފެންލިބޭ ފަރާތްތަކުންްް ފެން އިސްރާފު ނުކުރުމަށެވެ. އަދި އޭގެ ނާޖާއިޒު ފައިދާ ނުނެގުމަށްވެސް އެދިވަޑައިގެންނެވިއެވެ. މާލެއަށް ދިމާވެފައިވާ ފެނުގެ މައްސަލައަކީ ސިޔާސީ މައްސަލައެއް ނޫންކަމުގައި ރައީސުލްޖުމްހޫރިއްޔާ މިއަދު ވިދާޅުވިއެވެ.
މާލެއަށް ދިމާވެފައިވާ ފެނުގެ މައްސަލަ ހައްލު ކުރުމަށް ބައިނަލްޢަގްވާމީ ފަރާތްތަކުން ދެއްވާ އެހީތަކާ ބެހޭގޮތުންވެސް އެމަނުކުފާނު ވާހަކަފުޅު ދެއްކެވިއެވެ. އެގޮތުން އިންޑިޔާ، ސްރީލަންކާ އަދި ބަންގްލަދޭޝް ސަރުކާރާއި، ޗައިނާ، އެމެރިކާ އަދި ސަޢޫދީ ސަރުކާރުން ރާއްޖެއަށް ވެދެއްވާފައިވާ އެހީތެރިކަން ފާހަގަކުރެއްވިއެވެ.
ދިވެހި ވިޔަފާރިވެރިންނާއި، ސަރުކާރުގެ ކުންފުނިތަކާއި، އަމިއްލަ ކުންފުނިތަކާއި، އަދި އަމިއްލަ ފަރުދުންވެސް މިކަމަށް އެހީތެރިވަމުން ގެންދާތީ އެކަންވެސް ރައީސް ފާހަގަ ކުރެއްވިއެވެ.
ރައީސް ވިދާޅުވީ ފެނުގެ މައްސަލަ ޢާންމު ޙާލަތަކަށް ގެނައުމަށްޓަކައި ސަރުކާރުގެ ފަރާތުން ކުރެއްވެވި މަސައްކަތުން މާލޭގެ ހުރިހާ ފަރާތްތަކަށް މިހާރު ބޯފެން ލިބެމުންދާ ކަމަށެވެ. ނަމަވެސް ރައްޔިތުންގެ ދިރިއުޅުން އަދި ޢާންމު ޙާލަތަކަށް ނުގެނެވޭ ކަމުގައިވެސް ވިދާޅުވިއެވެ.
އެމްޑަބްލިޔުއެސްސީގައި ހިނގި އަލިފާނުގެ ހާދިޞާގައި ހަލާކުވި ޕެނަލްބޯޑުތައް މަރާމާތު ކުރެވުމުން ހާލަތު ކުރީގެ ހާލަތަށް ބަދަލުކުރެވޭނެ ކަމަށްވެސް ރައީސް ވިދާޅުވިއެވެ. ބޭރުގެ އެހީ ހޯދައިގެން ބާރު ސްޕީޑުގައި އެމަސައްކަތް ކުރާނެ ކަމަށްވެސް ރައީސް ވިދާޅުވިއެވެ.
ކިޔުންތެރިންގެ ހިޔާލު