ގާސިމް އިބްރާހީމާ ވެރިކަން ހަވާލު ކުރުމުގެ ގަރާރެއް ފާސްކުރަން އެމްޑީޕީގެ ގައުމީ މަޖިިލިސް މިއަދު ބާއްވަނީ
7 ޑިސެމްބަރ 2014 16:03
ގައުމުގެ ހާލަތު މިހާރުއޮތް ގޮތުން ސަރުކާރު ހިންގާ ކޯލިޝަންގެ އެންމެ ބޮޑު އެއްޕާޓީ ކަމަށްވާ ޖުމްހޫރީޕާޓީގެ ލީޑަރު ގާސިމް އިބްރާހީމާ ވެރިކަން ހަވާލު ކުރުމުގެ ގަރާރެއް ފާސްކުރުމަށް އެމްޑީޕީގެ ގައުމީމަޖިލީހުގެ ބައްދަލު ވުމެއް ބޭއްވުމަށް ނިންމައިފިއެވެ.
މިބައްދަލުވުން ބޭއްވުމަށް ހަމަޖެހިފައިވަނީ މާލޭ ސިޓީކައުންސިލުގައެވެ. މިއީ އެޕާޓީގެ ރައީސް މުޙައްމަދު ނަޝީދުގެ އެދިވަޑައިގެންނެވުމުގެ މަތިން ބާއްވާ ބައްދަލުވުމެއް ކަމަށް އެޕާޓީގެ އިސްބޭފުޅަކުވަނީ ކަށަވަރު ކޮށްދެއްވާފައެވެ.
"މިއީ ގައުމުގެ ހާލަތު މިހާރު އޮތްގޮތުން ބާއްވާ ކުއްލި ބައްދަލުވުމެއް. މީގައި ބަހުސް ކުރާނީ ސަރުކާރު ކޯލިޝަންގެ އެންމެ ބޮޑު އެއްބައިވެރިޔާ ޖުމްހޫރީޕާޓީގެ ލީޑަރު ގާސިމް އިބްރާހީމާ ވެރިކަން ހަވާލުކުރަން ގަރާރެއް ފާސްކުރުމަށް،" ދުވަހަށް މައުލޫމާތު ދެއްވި ބޭފުޅާ ވިދާޅުވިއެވެ. ވަރަށް އަވަހަށް މަޖިލިސް ފެށޭނެ ކަމަށްވެސް އޭނާ ވިދާޅުވިއެވެ.
މާލޭގެ ރައްޔިތުން ފެނަށް ޖެހުމުން ސަރުކާރުން އަމަލުކުރަމުންދާ ގޮތާމެދު އެމްޑީޕީގެ ރައީސް މުޙަައްމަދު ނަޝީދުވަނީ ވަރަށް ބޮޑަށް ސަރުކާރަށް ފާޑުވިދާޅުވެފައެވެ. އެމަނިކުފާނު ވިދާޅުވެފައިވަނީ މިއީ ރައްޔިތުން އިހުތިޖާޖު ކުރަންޖެހޭ ކަމެއް ކަމަށެވެ.
ކިޔުންތެރިންގެ ހިޔާލު