ފެންޕްލާންޓްތަކުން މިހާރުދަނީ މެދުނުކެނޑި ފެން އުފައްދަމުން-ނާޒިމް

އެމްޑަބްލިޔޫއެސްސީގެ ފެންޕްލާންޓްތަކުން މިހާރުދަނީ މެދުނުކެނޑި ފެންއުފައްދަމުން ކަމަށް ފެނާބެހޭ ޓާސްކްފޯހުން ބުނެފިއެވެ.

ޓާސްކްފޯހުގެ އިސްކޮށް މަސައްކަތް ކުރައްވާ މިނިސްޓަރ އޮފް ޑިފެންސް އެންޑް ނޭޝަނަލް ސެކިޔުރިޓީ ކާރނަލް (ރިޓަޔަރޑް) މުޙައްމަދު ނާޒިމް ވިދާޅުވީ މާލެއަށް ދިމާވެފައިވާ ފެނުގެ މައްސަލަ ހައްލު ކުރުމަށް ސަރުކާރުން ކުރަމުންދާ މަސައްކަތްތަކަށް ބޮޑު ކުރިއެރުމެއް މިހާރު ލިބެމުން އަންނަ ކަމަށެވެ.

ނާޒިމް ވިދާޅުވީ މިއަދުވެސް ހެނދުނު 8:00 އިން 10:00 އަށް ފެންދޫކުރެވިފައިވާ ކަމަށެވެ. ނަމަވެސް އަދިވެސް ޕްރެޝަރގައި ފެންދެވޭ ވަރުނުވިޔަސް ކުރިއަށްވުރެ ގިނަގޭގެއަށް ފެން ލިބިފައިވާ ކަމަށެވެ. އެއީވެސް ލިބުނު އިތުރު ކުރިއެރުމެއް ކަމަށް މިނިސްޓަރ ވިދާޅުވިއެވެ.

މިނިސްޓަރ ނާޒިމް ވިދާޅުވީ 27 ތަނަކުން މިހާރުވަނީ ލޮރީ ބޭނުން ކޮށްގެން ފުޅިތަކަށް ފެންއަޅައިދެމުންނެވެ. އެއީ ކުރިން ފެންދޫކުރަމުންދިޔަ 10 ތަނުގެ އިތުރަށް ފެން ދޫކުރަމުންދާ ތަންތަނެވެ.