ފަސް ފެންޕްލާންޓާއި 100 ޓަނު ބޯފެން ހިފައިގެން ބަންގްލަދޭޝްގެ މަނަވަރެއް ރާއްޖެއައުމަށް ފުރައިފި
7 ޑިސެމްބަރ 2014 15:05
މާލެއަށް ދިމާވެފައިވާ ފެނުގެ މައްސަލަ ހައްލުކުރުމުގެ ގޮތުން ފަސް ފެން ޕްލާންޓާއި، 100 ޓަނުގެ ބޯފެން މާލޭގެ ރައްޔިތުންނަށް ފޯރުކޮށްދިނުމަށް ބަންގްލަދޭޝްގެ މަނަވަރެއް މިއަދު ހެނދުނު 10:00 ގައި އެގައުމުން ފުރައިފިއެވެ.
މި އެހީ ހިފައިގެން މާލެއަންނަނީ "ބީއެންއެސް ސަމުދުރާ ޖޯއި" ކިޔާ މަނަވަރެކެވެ. މި މަނަވަރުން ގެންނަ ފަސް ޕްލާންޓަކީ މޮބައިލްކޮށް ޚިދުމަތްދެވޭ ފަސް ޕާލްންޓް ކަމަށް ބަންގްލަދޭޝުންވަނީ ބުނެފައެވެ. ބަންގާޅުގެ ޗިޓަގޮން ބަނދަރުން ފުރައިގެން މިމަނަވަރަށް ރާއްޖެއަށް އާދެވޭނީ ދެތިން ދުވަސް ހޭދަވާނެ ކަމަށް ބެލެވެއެވެ.
މާލެއަށް ދިމާވެފައިވާ ފެނުގެ މައްސަލަ ހައްލު ކުރުމަށް އިންޑިއާ، ލަންކާ، ޗައިނާ އިން ގެންދަނީ މިހާރުވެސް ފެން ފޯރުކޮށްދެމުންނެވެ. ޗައިނާއާއި ލަންކާއިން ފެން ފޯރުކޮށްދެމުން ގެންދަނީ އެދެގައުމުން އަންނަ ކޮމާޝަލް ފްލައިޓްތަކުގައެވެ. ޗައިނާގެ އެއާފޯސްގެ ދެ ބޯޓެއް ފެން ހިފައިގެން މާލެއަންނަން ވެގެން އިންޑިއާގެ ވައިގެ ސަރަހައްދު ބޭނުން ކުރުމުގެ ހުއްދައަށް ވަނީ އެދިފައެވެ. ނަަމަވެސް އެހުއްދަ އަދި ލިބިފައިނުވާތީ ޗައިނާއިން ގެންދަނީ އެހެން މަގެއް ހޯދަމުންނެވެ.
ބަންގަލަދޭޝް ސަރުކާރުން މާލެއަށް ފެން ހަދިޔާކުރުމަށް ނިންމި ނިންމުމަކީ ދިވެހިންނާއި ރާއްޖޭގައި އުޅޭ ބަންގްލަދޭޝް މީހުންވަނީ ވަރަށް އުފަލާއެކު ބަލައިގެންފައެވެ. ރާއްޖޭގައި މަސައްކަތްކުރާ ބިދޭސީންގެ އެންމެ ބޮޑު ފޯސް ނިސްބަތްވަނީ ބަންގާޅަށެވެ.
ކިޔުންތެރިންގެ ހިޔާލު