އެމްޑަބްލިޔުއެސްސީގައި ހިނގި އަލިފާނުގެ ހާދިސާގައި ލިބުނު ގެއްލުން ފޫބައްދަން ބޭރުގެ އެހީހޯދަނީ

އެމްޑަބްލިޔުއެސްސީގެ ފެންޕްލާންޓްތަކާއި ޖެނެރޭޓަރުތައް ގުޅުވައިދޭ ޕެނަލް ބޯޑުގައި ބުރާސްފަތި ދުވަހު އަލިފާންރޯވެ ލިބުނުގެ ގެއްލުން ފޫބެއްދުމަށް ބޭނުންވާ ފައިސާ ހޯދުމަށް ބޭރުގެ އެހީ ލިބޭތޯ މަސައްކަތް ކުރަމުންދާ ކަމަށް ޑިފެންސް މިނިސްޓަރ މުޙައްމަދު ނާޒިމް ވިދާޅުވެއްޖެއެވެ.

އެމަނިކުފާނު ވިދާޅުވީ މިއެހީ ހޯދުމަށް މަސައްކަތް ކުރަމުންދަނީ ފޮރިންމިނިސްޓްރީން ކަމަށެވެ. އެގޮތުން އަރަބި ގައުމުތަކާވެސް ވާހަކަ ދައްކަވަމުންދާ ކަމަށް މިނިސްޓަރ ވިދާޅުވިއެވެ. އޭގެ ތެރޭގައި ގަތަރާއި، ކުވައިތާއި، ސައުދީ ފަދަ ގައުމުތައް ހިމެނެވެ.

މިމައްސަލަ ހައްލު ކުރުމަށް ޗައިނާއިންވަނީ 7.7 މިލިއަން ރުފިޔާގެ އެހީއެއް ދީފައެވެ. އަދި ސައުދީގެ ވިޔަފާރިވެރިއަކުވަނީ އެއް މިލިއަންޑޮލަރު ހަދިޔާ ކުރައްވާފައި ކަމަށް އިސްލާމިކް މިނިސްޓަރވަނީ ވިދާޅުވެފައެވެ.

ނާޒިމް ވިދާޅުވީ މައްސަލަ ހައްލު ކުރުމަށް 20 މިލިއަން ޑޮލަރު ބޭނުންވާ ކަމަށެވެ. އެއީ 308 މިލިއަން ދިވެހިރުފިޔާއެވެ.

ބުރާސްފަތި ދުވަހުން ފެށިގެން މާލޭގެ ރައްޔިތުންވަނީ ފެނަށް ޖެހިފައެވެ. މިކަމަށް ލުޔެއް ހޯދައިދިނުމަށް އިންޑިއާ، ލަންކާ، ޗައިނާ އިން ގެންދަނީ މާލެއަށް ފެންފޯރުކޮށް ދެމުންނެވެ. ފެން އުފައްދާ އިންޑިއާގެ މަނަވަރެއް މިހާރުވެސް މާލޭަގައި އެބައޮތެވެ. މިއަދު ހަވީރު 3.00 ގައި އިތުރު މަނަވަރެއް ފެނާއެކު މާލެ އަންނާނެ ކަމަށް އިންޑިއަން ހައިކޮމިޝަނުން ވަނީ ބުނެފައެވެ.

ފެނުގެ މައްސަލަ ހައްލުކުރުމަށް 7 ނުވަތަ 10 ދުވަސް ހޭދަވާނެ ކަމަށް ހޯމްމިނިސްޓަރ ޢުމަރު ނަސީރު ވަނީ ވިދާޅުވެފައެވެ.