މިއަދު ހަވީރު ހިނގި އެކްސިޑެންޓްގައި އަނިޔާވި ކުއްޖާ މަރުވެއްޖެ

މިއަދު ހަވީރު މާލޭގައި ހިނގި ނުރައްކާތެރި އެކްސިޑެންޓްގައި އަނިޔާވި 4 އަހަރުގެ ކުޑަ ފިރިހެން ކުއްޖާ މަރުވެއްޖެ ކަމަށް ފުލުހުން ހާމަކޮށްފިއެވެ.

އެކުއްޖާ މަރުވެފައިވަނީ އެކްސިޑެންޓަށްފަހު އޭޑީކޭ ހޮސްޕިޓަލުގައި ފަރުވާ ދެމުންދަނިކޮށްނެވެ. އެހޮސްޕިޓަލުން ބުނެފައިވަނީ އެކުއްޖާ މަރުވެފައިވަނީ މިރޭ 7.40 އެހައިކަންހާއިރު ކަމަށެވެ. އެކުއްޖާމަރުވިއިރު ފަރުވާ ދެމުންދިޔައީ އައިސީޔޫގައި ކަމަށްވެސް އެހޮސްޕިޓަލުން ބުންޏެވެ.

ފުލުހުން ބުނެފައިވަނީ މިއެކްސިޑެންޓް ހިނގާފައިވަނީ މަޖީދީމަގު ޝާޕް ފިހާރަ ކައިރީގައި ކަމަށެވެ. މި އެކްސިޑެންޓްގައި 5 މީހަކަށް އަނިޔާވެފައިވެއެވެ. އެ މީހުންގެ ތެރޭގައި ހިމެނެނީ 4 އަހަރުގެ ކުޑަ ފިރިހެން ކުއްޖާގެ އިތުރަށް 2 ފިރިހެނަކާއި 2 އަންހެނުންނެވެ.

މިހާތަނަށް ބެލިބެލުމުން އެނގިފައިވާގޮތުގައި މި އެކްސިޑެންޓް ހިނގާފައިވަނީމަޖީދީ މަގުން އިރުން ހުޅަނގަށް ދުއްވާފައިދިޔަ ޕިކަޕެއް އެމަގުގައި ޕާކްކޮށްފައި ހުރި 3 ސައިކަލެއްގައާއި ޕާކްކޮށްފައި އޮތް ކާރަކާއި މަޖީދީމަގުން ދުއްވާފައިދިޔަ 3 ސައިކަލެއްގައި ޖެހިގެން ކަމަށްވެސް ފުލުހުން ބުނެފައިވެއެވެ.

މި އެކްސިޑެންޓްގައި ކާރަށާއި ޕިކަޕުގެ އިތުރުން ސައިކަލްތަލަށް އެކިވަރުގެ ގެއްލުންވެފައިވެއެވެ. މި އެކްސިޑެންޓާ ގުޅިގެން ޕިކަޕް ދުއްވަން އިން ޑްރައިވަރު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.

ފުލުހުން ގެންދަނީ މިމައްސަލަ ބަލަމުންނެވެ.