ފެނުގެ ޚިދުމަތް ފުރިހަމަށް ފޯރުކޮށް ދިނުމަށް ދިހަދުވަސް ހޭދަވާނެ- ހޯމްމިނިސްޓަރ

މާލެއަށް ދިމާވެފައިވާ ފެނުގެ މައްސަލަ ހައްލުކޮށް ކުރިންވެސް ފެން ފޯރުކޮށްދެމުން ދިޔަ ގޮތަށް ފޯރުކޮށްދިނުމަށް އަދި 10 ދުވަސް ހޭދަވާނެ ކަމަށް ލަފާ ކުރައްވާ ކަމަށް ހޯމްމިނިސްޓަރ ޢުމަރު ނަސީރު ވިދާޅުވެއްޖެއެވެ.

ނޫސްވެރިންނަށް މަޢުލޫމާތު ދެއްވަމުން އެމަނިކުފާނު މިއަދު ވިދާޅުވީ ސަރުކާރުން މަސައްކަތް ކުރަމުންދަނީ ކުރިއަށްއޮތް 36 ގަޑިއިރާއި 48 ގަޑިއިރު ތެރޭ ކޮންމެ 8 ގަޑިއިރަކުން ގޭގެއަށް ފެންފޯރުކޮށްދެވޭނެ ކަމުގެ އުންމީދުގައި ކަމަށެވެ. އެކަމުގެ އުންމީދު ވަރަށް ބޮޑު ކަމަށް މިނިސްޓަރ ވިދާޅުވިއެވެ.

ރައީސް އެކުލަވާލައިފައިވާ ޚާއްސަ ޓާސްކްފޯސްގެ ފަރާތުން ނޫސްވެރިންނަށް މައުލޫމާތު ދެއްވަމުން މިއަދު ހަވީރު ޢުމަރު ވިދާޅުވީ ކުރިއަށް އޮތް 48 ގަޑިއިރުގެ ތެރޭގައި ކޮންމެ 8 ގަޑިއިރަކުން ގޭގެއަށް ފެން ފޯރުކޮށްދިނުމަށްފަހު ކޮންމެ 24 ގަޑިއިރަކުން ކޮންމެ ހަގަޑިއިރަަށް ގޭގެއަށް ފެންދޫކުރުމަށް މަސައްކަތް ކުރައްވާ ކަމަށެވެ. ނޫސްވެރިންނަށް މަޢުލޫމާތު ދެއްވަމުން އެމަނިކުފާނު ވިދާޅުވީ ޓެކްނިކަލް މަޢުލޫމާތަކީ ބަދަލުވެގެން ހިނގައިދާނެ އެއްޗެއް ކަމަށެވެ. މިހާރު ހާމަކުރާ މަޢުލޫމާތަކީ އުންމީދުގެ މައްޗަށް ބިނާކޮށްގެން ހާމަކުރަމުންދާ މަޢުލޫމާތެއް ކަމަށެވެ. އެކަމަށް ރައްޔިތުން ސަމާލުވުމަށްވެސް އެދިވަޑައިގެެންނެވިއެވެ.

ޢުމަރު ވިދާޅުވީ މައްސަލަ ދިމާވެފައިވަނީ އެމްޑަބްލިއުއެސްސީގެ ފެން އުފެއްދުމުގެ "ސިކުނޑި" ކަމަށްވާ ޕެނަލް ބޯޑަށް ކަމަށެވެ. އެމައްސަލަ ހައްލުކުރުމަށް ބޭނުންވާ ބައެއް ސާމާނު މިއަދުވަނީ ސިންގަޕޫރުން މާލެ ގެނެސްފައެވެ. އޭގެ ތެރެއިން ބައެއް ތަކެތި މިހާރު ވަނީ އެމްޑަބްލިއުއެސްސީއާ ހަވާލުވެސް ކޮށްފައެވެ.

ޢުމަރު ނަސީރު ވިދާޅުވީ އެމްޑަބްލިޔުއެސްސީގެ މުވައްޒަފުން ވެސް ގެންދަނީ ފެނުގެ މައްސަލަ ހައްލު ކުރުމަށް ނުނިދާ ތިބެގެން ވަރަށް ބުރަކޮށް މަސައްކަތް ކުރަމުން ކަމަށެވެ.

ފެންފޯރުކޮށް ދިނުމުގެ ގޮތުން ވަގުތީ ތިން ފެން ޕްލާންޓަކުން ފެން ފޯރުކޮށްދޭން އެމްޑަބްލިޔުއެސްސީން މަސައްކަތް ކުރަމުންދާ ކަމަށްވެސް މިނިސްޓަރ ވިދާޅުވިއެވެ. މިވަގުތު ބޭނުން ކުރަމުންދަނީ އެންމެ ޕްލާންޓެކެވެ. ތިން ޕްލާންޓް އެއްކޮށް މަސައްކަތް ކުރަން ފެށުމުން އެއްގަޑިއިރަށް ދޫކުރާ ފެން ދެ ގަޑިއިރަށް ބަދަލު ކުރެވޭނެ ކަމަށް ޢުމަރު ވިދާޅުވިއެވެ.

އެމްޑަބްލިއުއެސްސީގެ އެމްޑީ ޢުމަރު ވިދާޅުވީ އެތަނުގައި އަލިފާނުގެ ހާދިސާއެއް ހިނގިކަމަށްވިޔަސް އެތަނަކީ ބައިނަލް އަގުވާމީ މިންގަނޑަށް ހުރިހާ ކަމެއް ހިފަހައްޓާފައިވާ ކުންފުންޏެއް ކަމަށެވެ. " އެކަމަކު ކަމެއް ދިމާވެދާނެތާ ދެއްތޯ،" އޭނާ ވިދާޅުވިއެވެ. އަލިފާނުގެ ހާދިސާއަށްފަހު ލިބުނު ގެއްލުން ދެނެގަތުމަށް އޮޑިޓެއް ހަދަމުންދާ ކަމަށްވެސް އޭނާ ވިދާޅުވިއެވެ.