ފެންހިފައިގެން އަންނަ "ދީޕަކް" މާދަމާ މާލެ އަންނާނެ- އިންޑިއާ ސަފީރު

މާލެއަށް ދިމާވެފައިވާ ފެނުގެ މައްސަލަ ހައްކުކުރުމަށްޓަކައި އިންޑިއާގެ އަސްކަރީ މަނަވަރު "ދީޕަކް" މާދަމާ މާލެ އަންނާނެ ކަމަށް ރާއްޖޭގައި ހުންނަވާ އިންޑިއާގެ ސަފީރު ރަޖީވް ޝަހާރޭ ވިދާޅުވެއްޖެއެވެ.

ޝަހާރޭ ވިދާޅުވީ އެ މަނަވަރު މާލެއަންނާނީ 800 ޓަނުގެ ފެނާއެކު ކަމަށެވެ. މާދަމާ މެންދުރުފަހު 3:00 އެހައިކަންހާއިރު މާލެއަންނަ ބޮޑުމަނަވަރަކީ ދުވާލަކަށް 200 ޓަނުގެ ފެން އުފެއްދުމުގެ ގާބިލްކަން ލިބިފައިވާ މަނަވަރެއް ކަމަށް ޝަހާރޭ ވިދާޅުވިއެވެ.

އިންޑިއާގެ މަނަވަރެއް ކަމަށްވާ "ސްކަންޏާ" ވަނީ ރޭ މާލެ އައިސްފައެވެ. އެމަނަވަރަކީ ދުވާލަކު 70 ޓަނުގެ ފެން އުފެއްދޭ އުޅަނދެކެވެ. އެމަނަވަރުން ފެން އުފެއްދުމަށްފަހު މިހާރުވަނީ މާލޭގެ ރައްޔިތުންނަށް ބަހަން ފަށައިފައެވެ.