މިހާތަނަށް 70،000 މީހުންނަށް ފެން ފޯރުކޮށްދެވިއްޖެ- މިނިސްޓަރ ނާޒިމް

ޑިސެމްބަރު 4 ވަނަ ދުވަހު އެމްޑަބްލިއުއެސްސީގެ އިމާރާތުގެ ސުވިޗް ގިއަރ ރޫމުގެ ކޭބަލްތަކުގައި އަލިފާން ރޯވުމާ ގުޅިގެން މާލެއިން ފެނުގެ ޚިދުމަތް ކެނޑުނު ވަގުތުން ފެށިގެން މިހާތަނަށް 70،000 މީހުންނަށް ފެން ފޯރުކޮށްދެވިފައިވާ ކަމަށް ޑިފެންސް މިނިސްޓަރ މުޙައްމަދު ނާޒިމް ވިދާޅުވެއްޖެއެވެ.

ނޫސްވެރިންނަށް މަޢޫލޫމާތު ދެއްވަމުން އެމަނިކުފާނު މިރޭ ވިދާޅުވީ އެމީހުންނަށް ދޫކޮށްފައިވަނީ އެއްލައްކަ ހަތްދިހާހަށްވުރެ ގިނަ ލީޓަރުގެ ފެން ކަމަށެވެ.

ރައްޔިތުންނަށް ފެން ފޯރުކޮށްދީފައިވަނީ ސިފައިންނާއި ފުލުހުންނާއި، އަމިއްލަ ޖަމިއްޔާ ޖަމާއަތްތަކާއި، މޯލްޑިވިއަން ރެޑްކްރެސެންޓް ޖަމާއަތުގެ އެހީތެރިކަމާ އެކުގައި ކަމަށްވެސް މިނިސްޓަރ ވިދާޅުވިއެވެ.

ރައްޔިތުންނަށް ފެން ފޯރުކޮށްދިނުމަށް އިއްޔެވަނީ 10 ތަނެއް ގާއިމްކޮށްފައެވެ. ނަމަވެސް މިއަދު ފެންދޫކޮށްފައިވަނީ ދެ ތަނެއް އިތުރުކޮށްގެން ކަމަށެވެ. އަދި މާދަމާ އިން ފެށިގެން ތަންތަން އިތުރުކޮށް މިހާރަށްވުރެ ރަނގަޅު އިންތިޒާމެއްގެ މަތިން ފެންފޯރުކޮށް ދެމުން ގެންދާނެ ކަމަށްވެސް ވިދާޅުވިއެވެ.

ނުކުޅެދޭ މީހުންނަށް ޚާއްސަ ކޮށްގެން މިރެއިން ފެށިގެން ފެންދޫކުރަމުންދާނެ ކަމަށްވެސް މިނިސްޓަރ ވިދާޅުވިއެވެ. އަދި އަންހެނުންނާއި ފިރިހެނުންނަށް ވަކިން ފެންފޯރުކޮށްދިނުމުގެ އިންތިޒާމް މާދަމާއިން ފެށިގެން ހަމަޖައްސަވައި ދެއްވާނެ ކަމަށްވެސް ވިދާޅުވިއެވެ.

މިނިސްޓަރ ނާޒިމް ވިދާޅުވީ ފެން ފޯރުކޮށްދިނުމުގައި 90 އިންސައްތަ ކާމިޔާބު ކަމަށެވެ. ނަމަވެސް ފެން ގެންނަން ޖެހެނީ އެކިހިސާބުތަކުން ކަމަށްވިޔަސް އެކަން މައްސަލައަކަށް ނުވާކަމަށެވެ. އެކަމަކު ފެން ފޯރުކޮށްދިނުމުގައި ކޮންމެވެސް ވަރެއްގެ މައްސަލަތަކެއް ދިމާވަމުންދާ ކަމަށެވެ. އެކަންކަން ހައްލު ކުރުމަށްޓަކައި މިހާރަށްވުރެ ރަނގަޅު އިންތިޒާމެއް ހަމަޖައްސަވާނެ ކަމަށްވެސް ވިދާޅުވިއެވެ.

މިއަދު އިރުއޮއްސި 6 އިން 7 އަށްވަނީ ގޭގެއަށް ފެން ފޯރުކޮށްދީފައެވެ. ނަމަވެސް އިއްޔެެއެކޭ އެއްގޮތަށް ހުރިހާ ގޭގެއަށް މިއަދުވެސް ފެން ލިބޭގޮތެއް ނުވިކަމަށް މިނިސްޓަރ ވިދާޅުވިއެވެ. މާދަމާވެސް 12.00 އިން ފެށިގެން ގޭގެއަށް ފެންދޫކުރަން ފަށާނެ ކަމަށް މިނިސްޓަރ ވިދާޅުވިއެވެ. މާދަމާ ފެން ދޫކުރާއިރު މިއަދާއި އިއްޔެއަށްވުރެ ރަނގަޅަށް ފެންފޯރުކޮށްދެވޭނެ ކަމަށްވެސް މިނިސްޓަރ ވިދާޅުވިއެވެ.

އެމްޑަބްލިޔުއެސްސީ އިން އިއްޔެވަނީ 3 ޕްލާންޓެއް ބޭނުން ކޮށްގެން ފެން އުފެއްދުމަށް މަސައްކަތް ކޮށްފައެވެ. ނަމަވެސް އެންމެ އެކަށީގެންވާ ވަރަށް ފެންއުފެއްދޭނެ ގޮތެއް ނުވި ކަމަށް މިނިސްޓަރ ވިދާޅުވިއެވެ. ނަމަވެސް މިހާރު މާލެއައިސްތިބި ސިންގަޕޫރުގެ ޓެކްނީޝަނުންނާއި، އެގައުމުން ގެނެސްފައިވާ ބައެއް ސްޕެއާ ބޭނުންކޮށްގެން މިއަދަށްވުރެ ރަނގަޅަށް މާދަމާ ފެންދޫކުރެވޭނެ ކަމަށް މިނިސްޓަރ ނާޒިމް ވިދާޅުވިއެވެ. އެމަނިކުފާނު ވިދާޅުވީ މާދަމާވެސް ބައެއް ސާމާނު ސިންގަޕޫރުން ގެންނާނެ ކަމަށެވެ.

އެމަނިކުފާނު ވިދާޅުވީ ދެދުވަސްތެރޭގައި މާލެއަށް ދިމާވެފައިވާ ފެނުގެ މައްސަލަ ހައްލު ކުރެވޭނެ ކަމުގެ އުންމީދު ވަރަށް ބޮޑު ކަމަށެވެ. ނަމަވެސް ހަފްތާއެއްގެ ތެރޭގައި 100 އިންސައްތަ ކާމިޔާބު ކުރެވޭނެ ކަމަށްވެސް ވިދާޅުވިއެވެ. މިހާރު ކޮށްފައިވާ މަސައްކަތަށް ބަލާއިރު ޓެކްނިކަލް މަސައްކަތުގެ 60 އިންސައްތައަށްވުރެ ބޮޑުބައެއްވަނީ ކާމިޔާބު ކުރެވިފައި ކަމަށްވެސް ނާޒިމް ވިދާޅުވިއެވެ.

ރައްޔިތުންނަށް ފެންދޫކުރާ ސަރަހައްދުތަކުގެ ތެރޭގައި އެކުވެނި ޓްރެކް ދަނޑާއި، މާފަންނު މަދަރުސާއާއި، އިމާދުއްދީން ސްކޫލާއި، އިސްކަންދަރު ސްކޫލާއި، ހިރިޔާ ސްކޫލާއި، ދަރުމަވަންތަ ސްކޫލާއި، ކަލާފާނު ސްކޫލާއި، ޖަމާލުއްދީން ސްކޫލާއި، ގަލޮޅު ދަނޑު ހިމެނެއެވެ.

މި ހުރިހާ މަރުކަޒުތަކަކުން ފެން ފޯރުކޮށްދޭން ފެށުމަށްފަހު މިއަދު 18:00 ގައިވަނީ މެދު ކަނޑާލައިފައެވެ. އަލުން ފެން ދޫކުރަން ފަށާފައިވަނީ މިރޭ 21:00 ގައެވެ.