މާލެއަށް ފެންފޯރުކޮށްދިނުމަށް އިންޑިއާގެ މަނަަވަރެއް މާލެ އަތުވެއްޖެ

އިއްޔެއިން ފެށިގެން މާލެއިން ފެން ކަނޑައިގެން ގޮސްފައިވާތީ ދިވެހި ސަރުކާރުގެ އެދިވަޑައިގެންނެވުމުގެ މަތިން އިންޑިއާގެ މަނަވަރެއް މިރޭ މާލެ އަތުވެއްޖެއެވެ. މިމަނަވަރު ބަނދަރުކޮށްފައިވަނީ އެމްޕީއެލްގެ ބަނދަރަށެވެ.

މިމަނަވަރަކީ ފެންއުފައްދާ 2 އާރުއޯ ޕްލާންޓް ހިމެނޭ މަނަވަރެކެވެ. މިމަނަވަރުގެ އިތުރަށް އެހެން މަނަވަރެއްވެސް ރާއްޖެއަށް އަންނާނެ ކަަމަށްވެއެވެ.

އެއީ ދުވާލަކަށް 200 ޓަނުގެ ފެންއުފެއްދޭ މަނަވަރެއް ކަމަށްވެސް މަޢުލޫމާތު ލިބިފައިވެއެވެ. އެމަނަވަރު އަންނީ 800 ޓަނުގެ ފެން ހިފައިގެންނެވެ. މިރޭ އައި މަނަވަރަކީ ދުވާލަކު 75 ޓަނުގެ ފެން އުފައްދާ މަނަވަރެކެވެ.

ރާއްޖެއަށް މިރޭއައި މަނަވަރުގައި ބޭއްވި ނޫސްވެރިންގެ ބައްދަލުވުމުގައި ސަފީރު އަހުމަދު މުހައްމަދު ވިދާޅުވީ މިފަދަ ކޮންމެ ހާލަތެއްގައިވެސް އެންމެ އަވަހަށް އެންމެ ބޮޑަށް ރާއްޖެއަށް އެހީތެރިވެ ދެއްވާ ގައުމަކީ އިންޑިއާ ކަމަށެވެ.

އިންޑިއާއިން ރާއްޖެއަށް ދެމުންދާ އެހީއަކީ ރާއްޖޭަގައި މިހާރުއޮތް ލީޑަރޝިޕްގެ އެދުމުގެ މަތިން އިންޑިއާ ސަރުކާރުން ދިވެހިރައްޔިތުންނަށް ދެއްވާ ވަރަށް ބޮޑު އެހީއެއް ކަމަށްވެސް ސަފީރު އަހުމަދު މުހައްމަދު ވިދާޅުވިއެވެ.

އިންޑިއާގެ އިތުރަށް، ސްރީލަންކާއާއި، އެމެރިކާއާއި، ޗައިނާއިންވެސް ރާއްޖެއަށް އެހީވާނެ ކަމަށް ރައީސް ޔާމީން ވަނީ ވިދާޅުވެފައެވެ. ސްރީލަންކަން އެއާލައިންގައި މިރޭވަނީ 5.6 ޓަނުގެ ފެން މާލެ ގެނެސްފައި ކަމަށް އެމްއެންޑީއެފް އިންވަނީ ބުނެފައެވެ.