މާދަމާގެ މެންދުރަށް ފެނުގެ މައްސަލައަށް ބޮޑު ހައްލެ ލިބިގެންދާނެ-ޑިފެންސް މިނިސްޓަރ

އެމްޑަބްލިޔުއެސްސީގައި ހިނގައިދިޔަ ހާދިސާއަށްފަހު މާލެއިން ފެނުގެ ޚިދުމަތް ކެނޑިފައިވިޔަސް މާދަމާ މެންދުރަށް އެކަމަށް ވަރަށްބޮޑު ހައްލެއް ލިބިގެންދާނެ ކަމަށް ޑިފެންސް މިނިސްޓަރ މުޙައްމަދު ނާޒިމް ވިދާޅުވެއްޖެއެވެ.

އެމްޑަބްލިޔު އެސްސީގައި ދެންމެ ބޭއްވި ނޫސްވެރިންގެ ބައްދަލުވުމުގައި މިނިސްޓަރ ވިދާޅުވީ ޓެކްނިކަލް ގޮތުން ކުރަންޖެހޭ ވަރަށްގިނަ ކަންކަން މިހާރު ކުރެވިފައިވާ ކަމަށެވެ. އެއީ މިމައްސަލަ ހައްލުކުރަން ލިބިގެންދިޔަ ކުރިއެރުމެއް ކަމަށެވެ. އެހެން ކަމުން މާދަމާގެ މެންދުރަށް ވަރަށް ބޮޑުކުރިއެރުމެއް ލިބިގެންދާނެ ކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ ފެން އުފައްދަން ބޭނުންކުރާ އިންޖީނުތަކާއި، ފެން އުފައްދަން ބޭނުންކުރާ އެހެން ސާމާނު ސަލާމަތުން އެބަހުރި ކަމަށެވެ. ނަމަވެސް ޕެނަލް ބޯޑުވަނީ ވަރަށް ބޮޑަށް ހަލާކުވެފައި ކަމަށެވެ. އެކަންވެސް ވަރަށް އަވަހަށް ހައްލު ކުރުމަށް މަސައްކަތް ކުރައްވަމުން ގެންދަވާ ކަމަށް ވިދާޅުވިއެވެ.

ނާޒިމް ވިދާޅުވީ އެއް ހަފްތާވަންދެން ބޯފެނަށް ނުޖެހި އުޅެވޭ ވަރުގެ ސްޓޮކެއް އެބަހުރި ކަމަށެވެ. ނަަމަވެސް އެހެން ކަންކަމަށް ބޭނުންވާނެ ފެން ލިބޭނެ ކަމަށް ވިދާޅެއް ނުވެއެވެ. އެމަނިކުފާނު ވިދާޅުވީ މާދަމާ ހެނދު 8 އިން 9 އަށް ގޭގެއަށް ފެންދޫކުރާނެ ކަމަށެވެ. އެވަގުތު ޖެހެންދެން އިސްކުރުތައް ބަންދުކޮށްފައި ބެހެއްޓުމަށް މިނިސްޓަރ ވިދާޅުވިއެވެ. މިރޭ ފެންދޫކުރުމުން ބައެއް ގޭގެއަށް ފެންނުލިބުނީ އެއްފަހަރާ ވަރަށް ގިނަގޭގެއިން ފެން ބޭނުން ކުރަން ފެށުމުން ޕްރެޝަރ ނުލިބިގެން ކަމަށްވެސް މިނިސްޓަރ ވިދާޅުވިއެވެ.

މިނިސްޓަރ ނާޒިމް ވިދާޅުވީ މިމައްސަލަ މިގޮތަށް ދިމާވީ ފެންކުންފުނީގައި ބެކަޕް ޕްލޭނެއްނެތިގެން ނޫންކަމަށެވެ. އެފަދަ ޕްލޭނެއް އޮތަސް މިފަދަ ކަމެއް ދިމާވެދާނެ ކަމަށް މިނިސްޓަރ ވިދާޅުވިއެވެ.

ރައީސް ޔާމީން އުފައްދާފައިވާ ފެނާބެހޭ ކޮމިޓީގައި ހިމެނި ވަޑައިގަންނަވާ ފިޝަރީޒް މިނިސްޓަރ ޑރ. މުޙައްމަދު ޝައިނީ ވިދާޅުވީ މިރޭގެ ދަންވަރުގެ ވަގުތެއްގައި ބައެއް އެއްޗެހި ރޭވޭ ހިސާބަށް މަސައްކަތް ކުރެވޭނެ ކަމަށެވެ. ޓެކްނީޝަނުންވަނީ މިހާތަނަށް ވަރަށްބޮޑު ކުރިއެރުމެއް ހޯއްދަވައި ދެއްވާފައި ކަމަށް މިނިސްޓަރ ވިދާޅުވިއެވެ. ބެކަޕް ޕްލޭނެއްގެ ދަށުން މާދަމާ އެހެން ދިމާއެއްގައި ފެން އުފެއްދޭނެ ނިޒާމެއް ގާއިމްކޮށް ފެން އުފެއްދޭނެ ކަމުގެ އުންމީދު ބޮޑުކަމަށްވެސް ވިދާޅުވިއެވެ.

މިނިސްޓަރ ނާޒިމް ވިދާޅުވީ މިރޭ ކޮންމެ މީހަކަށް 4 ލީޓަރު ލިބޭނެ ކަމަށެވެ. އެގޮތުން މާލޭގެ 10 ސަރަހައްދަކުން ހިލޭ މިރޭ ފެންލިބޭނެ ކަމަށްވެސް ވިދާޅުވިއެވެ.

މާލޭގައި ދިރިއުޅޭ މީހުން ފެނަށް ޖެހުމުން ފެންވިއްކާ ބައެއް ފިހާރަތަކުން އަގުބޮޑުކޮށް ފެންވިއްކާފައިވާ ކަމަށް މައުލޫމާތު ލިބިފައިވެއެވެ. އަދި ފެން އަޅަން ބޭނުންވާ ބާލިދީ ފަދަ އެއްޗެހި ވެސް އަގުބޮޑުކޮށް ވިއްކާފައިވާ ކަމަށް ޚަބަރު ލިބިފައިވެއެވެ. މިގޮތަށް ކަންކަން ކުރާ މީހުންނާ މެދު ފިޔަވަޅު އަޅާނެ ކަމަށް ހޯމް މިނިސްޓަރ ޢުމަރު ނަސީރާއި، ޑިފެންސް މިނިސްޓަރ މުޙައްމަދު ނާޒިމް ވަނީ އިންޒާރު ކުރައްވާފައެވެ.

މާލެ ފެނަށް ޖެހިފައި އޮއްވައި މިރޭ ގާތްގަޑަކަށް 8 އިން 9 އަށް ވަރަށް ބޯކޮށް ވާރޭވެހިފައިވެއެވެ. އެވަގުތު ވަރަށް ގިނަމީހުންވަނީ ފެން ނަގައިފައެވެ.