ރައީސް ޔާމީންގެ މެލޭޝިޔާ ދަތުރުފުޅާ ބެހޭގޮތުން ފަތުރާ އެސްއެމްއެސްތަކަކީ ދޮގެއް-ތަރުޖަމާނު

ރައީސުލްޖުމްހޫރިއްޔާ އަމިއްލަ ދަތުރުފުޅެއްގައި ބުދަ ދުވަހުގެ ރޭ މެލޭޝިޔާއަށް ‏‏‏ފުރާވަޑައިގެންނެވި ފަހުން ފަތުރަމުންދާ އެސްއެމްސްއެސް ތަކަކީ އެއްވެސް ހަގީގަތެއްނެތް ދޮގު އެސްއެމްއެސް ތަކެއް ކަމަށް ރައީސް އޮފީހުގެ ތަރުޖަމާނު އިބްރާހީމް މުޢާޒު ޢަލި ވިދާޅުވެއްޖެއެވެ.

އެސްއެމްއެސްތައް ފަތުރަމުންދަނީ މުޢާޒުގެ ނަމާއި، ފޯން ނަންބަރު ބޭނުން ކޮށްގެން ކަމަށްވާތީ އެކަން ދައުލަތުގެ ކަމާބެހޭ ފަރާތްތަކުގެ ސަމާލުކަމަށް ގެނައުމަށް މަސައްކަތް ކުރައްވަމުން ގެންދަވާ ކަމަށް މުޢާޒު ވިދާޅުވެފައިވެއެވެ.

" އެމަނިކުފާނު ފުރާވަޑައިގެންނެވި ވަގުތުން ފެށިގެން ވަރަށް ‏‏ތަފްޞީލުކޮށް ‏‏ރައީސުލްޖުމްހޫރިއްޔާގެ އޮފީހުގެ ވެބްސައިޓްގައި ޝާއިޢުކޮށްފައި ވަނިކޮށް، އަދި ‏‏އެމަނިކުފާނުގެ ‏‏ދަތުރުފުޅާ ގުޅޭ މަޢުލޫމާތު ނޫސްވެރިންނާ ހިއްސާކޮށްފައި ވަނިކޮށް، ބުރާސްފަތި ‏‏ދުވަހުގެ ފަތިހުން ‏‏ފެށިގެން ވަކިވަކި ނޫސްވެރިންނަށާއި، ނޫސް އިދާރާތަކަށާއި ބައެއް ޢާއްމު ‏‏ފަރާތްތަކުގެ މޮބައިލްފޯނަށް، ‏‏އަޅުގަނޑުގެ މޮބައިލް ފޯނު ނަންބަރާއި އަޅުގަނޑުގެ ނަން ‏‏ބޭނުންކޮށްގެން ފޮނުވަމުންދާ ‏‏އެސްއެމްއެސްތަކަކީ ޙަޤީޤަތާ ޚިލާފު، ޞައްޙަ ނޫން ‏‏އެސްއެމްއެސްތަކެއް ކަމުގައި ދަންނަވަމެވެ." މުޢާޒު ނެރުއްވާފައިވާ ބަޔާނެއްގައި ވިދާޅުވެފައިވެއެވެ.

އެއީ "ރައީސުލްޖުމްހޫރިއްޔާ އާއި އެމަނިކުފާނުގެ ‏‏ޢާއިލާއާ ގުޅުވައިގެން އަޅުގަނޑުގެ މޮބައިލް ފޯނު ‏‏ނަންބަރާއި، ނަން ބޭނުންކޮށްގެން ‏‏އެސްއެމްއެސްގެ ޒަރީޢާއިން ފޮނުވަމުންދާ ދޮގު މަޢުލޫމާތުތަކެއް ‏‏ކަމުގައި ވާތީ، މި ‏‏ދަށުދަރަޖައިގެ ނާތަހުޒީބު ޢަމަލު އެންމެ ހަރުކަށި ޢިބާރާތުން ކުށްވެރިކުރަމެވެ." އެބަޔާނުގައިވެއެވެ.