ކޮންޓެއިނަރުގައި މަސްތުވާތަކެއްޗާ ހަތިޔާރު އެތެރެވިޔަ ނުދިނުމުގެ އެއްބަސްވުމެއްގައި ސޮއިކޮށްފި
4 ޑިސެމްބަރ 2014 16:12
ކޮންޓެއިނަރ ކޮންޓްރޯލް ޕްރޮގްރާމް ޤާއިމް ކުރުމާބެހޭ އެމް.އޯ.ޔޫގައި ސޮއިކުރައްވަނީ-ފޮޓޯ ޕޮލިސް
ކޮންޓެއިނަރުގައި މަސްތުވާތަކެއްޗާ ހަތިޔާރު އެތެރެވިޔަ ނުދިނުމުގެ އެއްބަސްވުމެއްގައި ސޮއިކޮށްފި ކަސްޓަމްސްއާއި، ފުލުހުންނާއި، އެމްއެންޑީއެފް އިން މިއަދު ސޮއިކޮށްފިއެވެ.
ކަސްޓަމްސް އޮފީހުގައި މިއަދު ބޭއްވި ރަސްމިއްޔާތެއްގައި މޯލްޑިވްސް ޕޮލިސް ސަރވިސްގެ ފަރާތުން ސޮއިކުރެއްވީ ކޮމިޝަނަރ އޮފް ޕޮލިސް ޙުސައިން ވަޙީދެވެ. ކަސްޓަމްސް ގެ ފަރާތުން ސޮއިކުރެއްވީ ކޮމިޝަނަރ ޖެނެރަލް އޮފް ކަސްޓަމްސް އަޙްމަދު ޒުހޫރެވެ. މޯލްޑިވްސް ނޭޝަނަލް ޑިފެންސް ފޯސްގެ ފަރާތުން ސޮއިކުރެއްވީ ކޯސްޓްގާރޑްގެ ކޮމަޑާންޓް ކާނަލް މުޙައްމަދު އިބްރާހީމެވެ.
މިއީ ޔުނައިޓެޑް ނޭޝަންގެ އޮފިސް އޮން ޑްރަގް އެންޑް ކްރައިމް (ޔޫއެންއޯޑީސީ) އާއި ވޯލްޑް ކަސްޓަމްސް އޮގަނައިޒޭޝަން ގުޅިގެން ކުރިއަށް ގެންދާ ކޮންޓެއިނަރ ކޮންޓްރޯ ޕްރޮގްރާމެކެވެ.
މިއެއްބަސްވުމުގެ ސަބަބުން ރާއްޖެއަށް އެތެރެކުރާ ކޮންޓެއިނަރތަކުގައި ހަތިޔާރާއި، މަސްތުވާތަކެތި އެތެރެވިޔަ ނުދިނުމަށް މިތިން ފަރާތުން ގުޅިގެން މަސައްކަތް ކުރާނެއެވެ.
މިއެއްބަސްވުމުގައި ސޮއިކުރެއްވުމަށްފަހު ކޮމިޝަނަރ އޮފް ޕޮލިސް ޙުސައިން ވަޙީދު ވިދާޅުވީ މިއީ ފުލުހުންނަށްވެސް ލިބުނު ކުރިއެރުމެއް ކަމަށެވެ. އޭގެ ސަބަބުން ފުލުހުންގެ މަސައްކަތްތަކަށް ވަރަށް ބޮޑު ފައިދާތަކެއް ކުރާނެ ކަމަށްވެސް ވިދާޅުވިއެވެ. މި އެއްބަސްވުމުގެ ދަށުން އެއްބަޔަކު އަނެއް ބައެއްގެ މެދުގައި މަޢުލޫމާތު ހިއްސާކުރުމުގެ މަގުފަހިވެފައިވާ ކަމަށްވެސް ވިދާޅުވިއެވެ. ފުލުހުން ކޮންމެހެން ހިއްސާކުރާ މަޢުލޫމާތުތައް ވެރިފައިކުރުމަށް ބޭރުގެ ފަރާތްތަކާއި ގުޅިގެން މަޢުލޫމާތު ވެރިކުރުމަށް ފަސޭހަތަކެއް މި އެއްބަސްވުމުގެ ސަބަބުން ލިބިގެންދާނެ ކަމަށްވެސް ވިދާޅުވިއެވެ.
މި އެއްބަސްވުމުގެ ދަށުން މިކަމަށް ބޭނުންވާ އިންސާނީ ވަސީލަތްތައް ބިނާކުރުމާއި އަހުލުވެރިކުރުމާއި މަސައްކަތަށް އެކަށީގެންވާ ތަކެތި ލިބިގެންދިޔުމަކީ އެއްބެސްވުމުގެ ސަބަބުން ފުރިހަމަވެގެންދާނެ ކަންކަން ކަމަށްވެސް ވިދާޅުވިއެވެ. މީގެ ސަބަބުން ރައްޔިތުންނަށް އޭގެ މަންފާ ލިބިގެންދާނެ ކަމަށްވެސް ވިދާޅުވިއެވެ.
ކޮމިޝަނަރ ޖެނެރަލް އޮފް ކަސްޓަމްސް ޒުހޫރު ވިދާޅުވީ މިއެއްބަސްވުމުގެ ސަބަބުން ގިނަ ފައިދާތަކެއް ލިބިގެންދާނެ ކަމަށެވެ. އެގޮތުން ކޮންޓެއިނަރ ބޭނުންކޮށްގެން މަސްތުވާތަކެއްޗާއި ހަތިޔާރު އެތެރެ ކުރާކަމަށްވާނަމަ އެތަކެތި އަތުލައިގަތުމަށް ފަސޭހަތަކެއް ލިބިގެންދާނެ ކަމަށްވެސް ވިދާޅުވިއެވެ. އަދި ޔޫއެންއޯޑީސީގެ މެމްބަރު ޤައުމުތަކާ އޮންނަ ގުޅުން ބަދަހިވެ މަޢުލޫމާތު ހިއްސާކުރެވިގެންދާނެ ކަމަށްވެސް ވިދާޅުވިއެވެ.
ކޯސްޓްގާރޑް ކޮމަޑާންޓް ކާނަލް މުޙައްމަދު އިބްރާހީމް ދެއްކެވި ވާހަކަފުޅުގައި ވިދާޅުވެފައިވަނީ މިއެއްބަސްވުމުގެ ސަބަބުން ރާއްޖޭގެ ދެކުުނާއި އުތުރުގައި މިފަދަ ކުށްކުރުން ހުއްޓުވުމުގެ ވެއްޓެއް ގާއިމް ވެފައިވާ ކަމަށެވެ. އަދި ފުލުހުންނާއި، ސިފައިންނާއި، ކަސްޓަމްސްއާ ދެމެދު މަޢުލޫމާތު ހިއްސާކޮށް އެކުގައި މަސައްކަތްކުރުމަށް މަގުފަހިވެގެން ގޮސްފައިވާ ކަމަށްވެސް ވިދާޅުވެފައިވެއެވެ.
މި އެއްބަސްވުމުގެ ދަށުން ކޮންޓެއިނަރ މެދުވެރިކޮށް އެތެރެކުރެވޭ މަސްތުވާތަކެއްޗާއި ހަތިޔާރާއި ޓެރަރިޒަމާއި ގުޅުންހުރި މުޢާމަލާތްތައް ހުއްޓުވައި ތަހުޤީކޮށް މަޢުލޫމާތު ބަދަލުކުރެވިގެންދާނެ ކަމަށް ފުލުހުންވަނީ ބުނެފައެވެ. އަދި މި 3 ފަރާތް ގުޅިގެން މަސައްކަތްކުރާނެ ޔުނިޓެއް ޤާއިމްކުރެވި އިންޓެލިޖެންސް މަޢުލޫމާތުތައް ބަދަލުކުރެވި ޔޫއެންއޯޑީސީގެ މެމްބަރު ޤައުމުތަކާއި މަޢުލޫމާތު ހިއްސާކުރެވިގެންދާނެ ކަމަށްވެސް ބުނެފައިވެއެވެ.
މިފަދަ ހަރަކާތްތައް ހުއްޓުވުމަށް ބޭނުންވާ ތަމްރީނާއި ބޭނުންވާ ވަސީލަތްތައް ހިލޭ އެހީގެ ގޮތުގައި ލިބިގެންދާނެ ކަމަށްވެސް ބުނެފައިވެއެވެ.
ކިޔުންތެރިންގެ ހިޔާލު