މީޑިއާ ކައުންސިލްގެ ވޯޓު އަނެއްކާވެސް އެއްވަރު

ހުސްވި ނޮވެމްބަރ 20 ވަނަ ދުވަހު ބޭއްވި މޯލްޑިވްސް މީޑިއާ ކައުންސިލްގެ އިންތިޚާބުގައި ބައިވެރިވެ އެއްވަރުވި މީހުންގެ މެދުގައި މިއަދު ބޭއްވި ވޯޓުވެސް އެއްވަރު ވެއްޖެއެވެ.

ހޯމް މިނިސްޓްރީގައި މިއަދު ހަވީރު 4.00 ގައި ބޭއްވި އިންތިޚާބުގައި ވާދަކޮށްފައިވަނީ 5 މީހުންނެވެ. އޭގެ ތެރެއިން ވީމީޑިއާގެ ވީކްލީ މެގަޒިންގެ އަޙުމަދު ރިފާޢާއި، ސަން އޮންލައިންގެ ޙުސައިން ޙަސަން ވޮޓުން އެއްވަރުވީ 25 ވޯޓުންނެވެ. ވީއެފްއެމްގެ އިމާދު ލަތީފްގެ ނަން އަނބުރާ ގެންގޮސްފައިވިޔަސް ލިސްޓުގައި އޭނާގެ ނަން އޮތުމުން އޭނާއަށްވެސް ވަނީ އެއް ވޯޓު ލިބިފައެވެ. ނަަމަވެސް އެއީ ބާތިލް ވޯޓެކެވެ. މިއިންތިޚާބުގައި ދެން ވާދަކުރި އެމްބީސީގެ ޙަސަން ޒިޔާއު އާއި ސަން ޓީވީގެ އަޙުމަދު މުޖުތަބާ އަށް ވޯޓެއް ލިބިފައެއް ނުވެއެވެ.

މިއަދުގެ ވޯޓު އެއްވަރުވުމުން ދެން ވޯޓުލުން އޮންނާނީ އަން ބުދަ ދުވަހު ކަމަށް ހޯމްމިނިސްޓްރީންވަނީ ބުނެފައެވެ.

މީޑިއާ ކައުންސިލަށް މިހާރު އިންތިޚާބުވެފައިވަނީ މީޑިއާތަކުގެ ބައިން، ވީޓީވީގެ މުޙައްމަދު އާސިފް (މޮންދު) އާއި، ދިޓީވީގެ ހިދާޔަތުﷲ އާއި، "ހަވީރު"ގެ އަޙުމަދު ހަމްދޫނާއި، ޓީވީއެމްގެ، ހަފުސީ ޢަބްދުﷲ އާއި، އެޓޯލް ޓީވީވީގެ މުޙައްމަދު ރަފީޢާއި، އުތުރުޑޮޓްކޮމްގެ، މިއުސަމް ޢައްބާސްއާއި، ދުވަސް އޮންލައިންގެ، މުހައްމަދު އާމިރު (ފަރެސް) އެވެ.

އާންމުންގެ ފަރާތުން ހޮވާފައިވަނީ ހ. މައިދާން މުހައްމަދު މުރާދު، މ. މިރުސްގަސްދޮށުގޭ އައިމިނަތު ހަސަން، ސ. މީދޫ ބަހާރުގޭ، އަޙުމަދު ޒަކީ ނާފިޒް، މއ. ލޫޕިން އަޙުމަދު މިޒްމާދު، އަހުމަދު ޝަރީފް ނަފީސް، ޢަބްދުއްލަތީފް އަޙުމަދު، މ. މާހިއާ، ލީޝާ މުޙައްމަދެވެ.