މީރާ ކުލަބުން ކުޑަކުދިންގެ ހިޔާއަށް ތަކެތި ހަދިޔާ ކޮށްފި
30 ނޮވެމްބަރ 2014 23:29
މޯލްޑިވްސް އިންލަންޑް ރެވެނިއު އޮތޯރިޓީ (މީރާ) މުވައްޒަފުންގެ ކްލަބުން ކުޑަކުދިންގެ ހިޔާއަށް ބޭނުންވާ ބައެއް ސާމާނު ހަދިޔާ ކޮށްފިއެވެ.
ޟމިތަކެތި މީރާގެ މުވައްޒަފުން ކުޑަކުދިންގެ ހިޔާއަށް ރަސްމީކޮށް ހަވާލުކޮށްފައިވަނީ ހޮނިހިރު ދުވަހު ބޭއްވި ރަސްމިއްޔާތެއްގައެވެ. މިރަސްމިއްޔާތުގައިވަނީ އެ ހިޔާގައި ތިބި ކުދިން ހިތް އުފާކޮށްލުމަށްޓަކައި އެކި ކުޅިވަރުތައް ހިމެނޭ ގޮތަށް ހަވީރުގެ ސަޔެއްވެސް ބާއްވާފައެވެ.
މި ޕްރޮގްރާމުގައި މީރާގެ ވެރިންނާއި، ކުޑަކުދިންގެ ހިޔާގެ ވެރިންގެ އިތުރަށް ގިނަ އަދަދެއްގެ މުވައްޒަފުން ބައިވެރިވެފައިވެއެވެ.
މިރަސްމިއްޔާތުގައި ވާހަކަފުޅު ދައްކަވަމުން ކޮމިޝަނަރ ޖެނެރަލް އޮފް ޓެކްސޭޝަން ވިދާޅުވެފައިވަނީ މިފަދަ ހަރަކާތްތަކަކީ މީރާގެ މުވައްޒަފުން ވަރަށް ބޮޑު ތަރުހީބެއް ދީގެން ކުރިއަށް ގެންދާ ހަރަކާތްތަކެއް ކަމަށެވެ. އެހެންކަމުން މީރާގެ ފަރާތުން ކުރިއަށް އޮތްތަނުގައިވެސް ކުޑަކުދިންގެ ހިޔާއަށް އެހީތެރިކަން ފޯރުކޮށްދޭނެ ކަމަށެވެ.
ކުޑަކުދިންގެ ހިޔާގެ ޑެޕިއުޓީ ޑިރެކްޓަރ މުހައްމަދު ޝަފީގު ވިދާޅުވީ މީރާއަކީ އުމުރުން ހަގު މުއައްސަސާއެއް ނަމަވެސް މީރާއަކީ މުޖުތަމައަށް އެހީތެރިވުމުގައި ނަމޫނާ މުއައްސަސާއެއް ކަމަށެވެ. އަދި މީރާގެ ފަރާތުން ކުޑަކުދިންގެ ހިޔާއަށް ލިބެމެންދާ އެހީތެރިކަމަށް ޝަފީގު ޝުކުރު އަދާކުރެއްވިއެވެ.
މީރާ ކްލަބުން ބުނެފައިވަނީ ޕްރޮގްރާމް ކޮންމެ އަހަރަކުވެސް ކުރިއަށް ގެންދާނެ ކަމަށެވެ. މީރާއިން ކުޑަކުދިންގެ ހިޔާއަށް ދީފައިވާ އެހީތަކާބެހޭ ތަފްސީލެއް އެތަނުން ނުދެއެވެ.
ކިޔުންތެރިންގެ ހިޔާލު