އެމްޑީޕީގެ އިންތިޚާބުގެ ވަގުތީ ނަތީޖާ އިޢުލާން ކޮށްފި

މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ހުސްވެފައިވާ މަޤާމްތަކަށް މެމްބަރުން ހޮވުމަށް އިއްޔެ ބޭއްވި އިންތިޚާބުގެ ވަގުތީ ނަތީޖާ އިޢުލާންކޮށްފިއެވެ.

ހޮނިހިރު ދުވަހު ބޭއްވި އިންތިޚާބުގައި 6 ދާއިރާއަކަށްވަނީ މެންބަރުން ހޮވާފައެވެ. ވަގުތީ ނަތީޖާ ދައްކާގޮތުގައި އުތުރު ޕްރޮވިންސްގެ ރައީސަކަށް އިންތިޚާބު ކޮށްފައިވަނީ ގ. ޗާންދަނީމާގޭ، އިބްރާހީމް ސުޖާއުއެވެ. އޭނާއަށް ލިބިފައިވަނީ 3217 ވޯޓެވެ.

މެދު އުތުރު ޕްރޮވިންސްގެ ރައީސަކަށް އިންތިޚާބު ކޮށްފައިވަނީ މ. ތުރީއޭވިލާ، އިބްރާހީމް ޖިހާދެވެ. އޭނާ ހޮޮވާފައިވަނީ 1405 ވޯޓު ދީގެންނެވެ.

އެޕާޓީގެ ގަލޮޅު އުތުރު ދާއިރާގެ ހުސްވެފައިވާ ނާއިބް ރައީސްގެ މަޤާމަށް އިންތިޚާބު ވެފައިވަނީ ގ. އާކާޝްވިލާ، އާމިނަތު ޒާހިރާއެވެ. އޭނާއަށް ލިބިފައިވަނީ 101 ވޯޓެވެ.

ށ. ކަނޑިތީމު ދާއިރާއިގެ ރައީސް ކަމަށް ހޮވާފައިވަނީ ށ. ބިލެތްފަހި، ދަނބުރުއްދޮށުގޭ، ޢބްދުﷲ ޝަހީމް ޢަބްދުލް ޙަކީމެވެ. އޭނާ އެމަޤާމަށް ހޮވާފައިވަނީ 354 ވޯޓުންނެވެ. ނާއިބު ރައީސްއަކަށް ހޮވިފައިވަނީ ށ. ފޭދޫ ކަސްތޫރިމާގޭ، އިބްރާހީމް މުޙައްމަދެވެ.

ނ. ކެނދިކުޅުދޫ ދާއިރާގެ ރައީސަކަށް ހޮވާފައިވަނީ އެދާއިރާގެ ކުރީގެ މެންބަރު އަޙުމަދު ޢީސާ އެވެ. ބ. ތުޅާދޫ ދާއިރާގެ ރައީސަކަށް ހޮވާފައިވަނީ އިބްރާހީމް ނިމާލެވެ.

ތ. ވިލުފުށި ދާއިރާގެ ނާއިބު ރައީސަކަށް ހޮވާފައިވަނީނީ އާދަމް މުޙައްމަދެވެ. އޭނާ އެމަޤާމަށް ހޮވާފައިވަނީ 213 ވޯޓާއެކުއެވެ.

އެމްޑީޕީން ބުނެފައިވަނީ ދާއިމީ ނަތީޖާ ވަރަށް އަވަހަށް އިޢުލާން ކުރައްވާނެ ކަމަށެވެ.