މެލޭޝިއާގެ ބޮޑުވަޒީރު ރާއްޖެ ވަޑައިގަންނަވަނީ

މެލޭޝިއާގެ ބޮޑުވަޒީރު ދާތޯ ސްރީ މުހައްމަދު ނަޖީބު ރާއްޖެ ވަޑައިގަތުމަށް ނިންމަވާފައިވާކަމަަށް ރައީސް މައުމޫން އަބްދުލް ގައްޔޫމް ވިދާޅުވެއްޖެއެވެ.

މެލޭޝިއާގެ ވެރިކަން ކުރާ ޔުނައިޓެޑް މެލޭސް ނޭޝަނަލް އޯގަނައިޒޭޝަން (އަމްނޯ)ގެ އަހަރީ އާންމު ޖަލްސާގައި ބައިވެރިވެވަޑައިގަތުމަށްފަހު މިރޭ ރާއްޖެ ވަޑައިގެން ރައީސް މައުމޫނު ވިދާޅުވީ، މެލޭޝިއާގެ ބޮޑުވަޒީރު ރާއްޖެ ވަޑައިގަންނަވަނީ، ރައީސުލްޖުމްހޫރިއްޔާ އަބްދުﷲ ޔާމިންގެ ދައުވަތަކަށްކަމަށެވެ.

މުހައްމަދު ނަޖީބު މާލެ ވަޑައިގަންނަވާނެ ވަކިދުވަހެއް ރައީސް މައުމޫނު ހާމައެއް ނުކުރައްވައެވެ. އެހެން ނަމަވެސް ވަރަށް އަވަހަށް ވަޑައިގަންނަވާނެކަމަށް ވިދާޅުވިއެވެ.

ރައީސް މައުމޫނު ވިދާޅުވީ، އެމަނިކުފާނުގެ ދަތުރުފުޅުގައި ދެގައުމުގެ ގުޅުމާގުޅޭގޮތުން މަޝްވަރާ ކުރައްވާފައިވާކަމަށެވެ.