ރާއްޖޭގައި ސިޔާސީ ޕާޓީތައް ބައްޓަންވަމުން އައީ އެމްޑީޕީއާ އެއްގޮތަށް: ރައީސް ނަޝީދު
30 ނޮވެމްބަރ 2014 2:11
ދިވެހިރާއްޖޭގައި ސިޔާސީ ޕާޓީތައް ބައްޓަންވަމުން އައިސްފައިވަނީ އެމްޑީޕީއާއެއްގޮތަށް ކަމަށް ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ހުސްވެފައިވާ ބައެއް މަގާމުތަކަށް މެމްބަރުން ހޮވުމަށް ބޭއްވި ޕްރައިމަރީގައި ރައީސް ނަޝީދު ވިދާޅުވީ، ރާއްޖޭގައި މި ހިފެހެއްޓޭ މިންވަރަށް ވެސް ރައްޔިތުންގެ ހައްގުތަކާއި ތަރައްގީގެ މަސައްކަތްތައް އަދި މި ވެރިކަމުގެ ވައްޓަފާޅި އާއި ވެރިކަމުގެ ބައްޓަން ހިފެހެއްޓިފައި އޮތީ ސިޔާސީ ޕާޓީތަކުގެ ސަބަބުންކަމަށެވެ. އެމްޑީޕީ ބިނާވަމުންދިޔަ ވަރަކަށް އެޕާޓީގެ ވާދަވެރިން ވެސް ދިޔައީ ސިޔާސީ ޕާޓީތައް ބިނާކުރަމުންކަމަށް ރައީސް ނަޝީދު ވިދާޅުވިއެވެ.
"އެމްޑީޕީގެ ގުނަންތައް ވެގެން ދިޔައީ އެހެން ޕާޓީތަކުގައި ވެސް ހުންނަ ގުނަންތަކަކަށް. އަދި އެމްޑީޕީން ހިންގާ ޕްރޮސީޖާ ވެގެން ދިޔައީ އެހެން ޕާޓީތަކުން ވެސް ހިންގާ ޕްރޮސީޖާތަކަކަށް،" ރައީސް ނަޝީދު ވިދާޅުވިއެވެ.
ރިޔާސީ ވެރިކަން ކުރާ ގައުމުތަކުގައި ވެރިކަމުގެ ދައުރުގެ މެދު ތެރެއިން ޕާޓީގެ ރިޔާސީ ޕްރައިމަރީ ބާއްވާ ކަމަށާއި ރާއްޖޭގައި ވެސް އެކަން ދާނީ އެގޮތަށް ކަމަށް ގަބޫލު ކުރައްވާ ކަމަށެވެ.
ކިޔުންތެރިންގެ ހިޔާލު