ސާކް ސަމިޓު ނިންމަވާލެއްވުމަށްފަހު ރައީސް ޔާމިން މާލެ ވަޑައިގެންފި

ރައީސުލްޖުމްހޫރިއްޔާ ޢަބްދުﷲ ޔާމީން، 18 ވަނަ ސާކް ސަމިޓުގައި ބައިވެރިވެވަޑައިގަތުމަށް ނޭޕާލަށް ‏ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު، ރޭ މާލެ ‏‏ވަޑައިގެންފި އެވެ.

ރައީސުލްޖުމްހޫރިއްޔާގެ މި ދަތުރުފުޅުގައި، 18 ވަނަ ސާކް ސަމިޓު ހުޅުވުމުގެ ރަސްމިއްޔާތުގައި ބައިވެރިވެވަޑައިގެން ވާހަކަފުޅު ދެއްކެވިއެވެ. މިގޮތުން، ދެކުނު އޭޝިޔާ ސަރަޙައްދުގެ ކުރިއެރުމަށްޓަކައި، ސާކް ޤައުމުތަކުން ދުނިޔޭގެ އެހެން ‏‏ޤައުމުތަކާއެކު، ވަކިވަކިން‏‎ ‎‏މަސައްކަތްކުރުމުގެ ބަދަލުގައި، އެއްޖަމާޢަތެއްގެ ގޮތުގައި ‏‏މަސައްކަތްކުރުމަށް އެމަނިކުފާނު ގޮވާލައްވައިފައިވާކަމަށް ރައީސް އޮފީހުން ބުނެއެވެ. 

 ސާކް ސަމިޓުގެ ހަވާސާގައި، ސްރީލަންކާގެ ރައީސް މަހިންދަ ‏‏ރާޖަޕަކްސައާ، ޕާކިސްތާނުގެ ބޮޑުވަޒީރު ނަވާޒް ޝަރީފުގެ އިތުރުން އިންޑިޔާގެ ބޮޑުވަޒީރު ނަރެންދްރަ މޯދީއާ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ބައްދަލުކުރެއްވިއެވެ. ‏މިބައްދަލުކުރެއްވުންތަކުގައި ރާއްޖެއާ އެޤައުމުތަކާ ދެމެދުގައިވާ ގުޅުން އިތުރަށް ‏‏ބަދަހިކުރެއްވުމާއި، ‏‏ ސާކު އިތުރަށް ހަރުދަނާ ކުރެއްވުމާ ބެހޭގޮތުން ‏‏މަޝްވަރާ ކުރެއްވިއެވެ.‏މީގެއިތުރަށް، ސަމިޓު ނިންމުމުގެ ރަސްމިއްޔާތުގައި އެއްޤައުމުން އަނެއް ޤައުމަށް ހަކަތަ ފޯރުކޮށްދިނުމާ ބެހޭ ގޮތުން މެންބަރު ޤައުމުތަކުގެ މެދުގައި ވެވުނު އެއްބަސްވުމެއްގައި ސާކުގެ ހާރިޖީ ވަޒީރުން ސޮއިކުރެއްވިކަމަށް ރައީސް އޮފީހުން ބުނެއެވެ. 

19 ވަނަ ސާކް ސަމިޓް ބޭއްވެވުމަށް ހަމަޖައްސާފައި ވަނީ ޕާކިސްތާނުގައެވެ.