ދިވެހިންނާ ބޭރުގެ ޓެރަރިސްޓު ޖަމާއަތްތަކާ ގުޅިފައިވާވަހަކަ ސަރުކާރުން ދައްކަންޖެހޭނެ: ރައީސް ނަޝީދު

ދިވެހިންގެ ސަލާމަތީ ބާރުތަކުގެ ބައެއް މީހުންނާ، ގޭންގުތަކާ، ބޭރުގެ ޓެރަރިސްޓު ޖަމާއަތްތަކާ ގުޅިފައިވާހަކަ ސަރުކާރުން ދައްކަން ޖެހޭނެކަމަށް ރައީސް މުހައްމަދު ނަޝީދު ވިދާޅުވެއްޖެއެވެ.

އދ. ގެ އޭޝިއާ-ޕެސިފިކް ބިޒްނަސް ފޯރަމްގައި ބައިވެރިވަޑައިގަތުމަށް ސްރީ ލަންކާ އަށް ކުރެއްވި ދަތުރުފުޅު ނިންމަވާލެއްވުމަށް ފަހު، ރާއްޖެ ވަޑައިގެން ނޫސްވެރިންނާ ވާހަކަފުޅު ދައްކަވަމުން އެމްޑީޕީގެ ރައީސް ނަޝީދު ވިދާޅުވީ، ދިވެހިރާއްޖެއަށް ބޭނުންވަނީ ދެފުއްފެންނަ ޑިމޮކްރެޓިކް ނިޒާމެއްކަމަށެވެ. ކަންކަން ފޮރުވައިގެން ތިބުމުގެ ބަދަލުގައި، ސަރުކާރުން ހަގީގަތާ އެއްގޮތަށް ވާހަކަ ދެއްކުމަކީ މުހިންމުކަމެއްކަމަށް އެމަނިކުފާނު ވިދާޅުވިއެވެ. 

"ރާއްޖޭގައި ކަން ހިނގާ ގޮތުގެ ވާހަކަ ސާފުކޮށް ދެކެވެން ޖެހޭނެ. ބޭރުގެ ޓެރަރިސްޓް ޖަމާއަތްތަކާއި ރާއްޖޭގެ ސަލާމަތީ ބާރުތަކުގެ ތެރެއިން ބަޔަކާއި އަދި މާލޭގެ ގޭންގްތަކާ ގުޅިފައިވާ ކަމުގެ މައުލޫމާތު ދުނިޔޭގެ އެކި ކަންކޮޅުތަކަށް ވަނީ ލިބިފައި،" ރައީސް ނަޝީދު ވިދާޅުވިއެވެ.

ސަރުކާރުން އެ ވާހަކަ ނުދައްކާ ނަމަ އެހެން ފަރާތްތަކުން އެ ވާހަކަ ބޭނުން ގޮތަކަށް ދައްކަމުން ގެންދާނެކަމަށްވެސް ނަޝީދު ވިދާޅުވިއެވެ.

 "ހަގީގަތް ސާފުވާ ގޮތަށް މި ވާހަކަތައް ހާމަކުރާ ނަމަ ރާއްޖެ އަށް ލިބޭ ފައިދާ ބޮޑުވާނެ،"

ރައީސް ނަޝީދު ރޭވަނީ ވިލުފުށީ ފާއިރާގެ މެމްބަރު ރިޔާޒު ރަޝީދު ބަޖެޓަށް ހުށަހަޅުއްވާފައިވާ އިސްލާހަށްވެސް ފާޑު ވިދާޅުވެފައެވެ. ރައީސް ނަޝީދު ވިދާޅުވީ، ދައުލަތުގެ ހަރަދު ކުޑަކުރެވޭނީ ކައުންސިލަރުންގެ މުސާރަ ކުޑަކޮށްގެން ކަމަށް ގަބޫލުނުކުރައްވާކަމަށެވެ. 

ލޯކަލް ކައުންސިލްތަކުގެ ރައީސް ފިޔަވައި އެހެން ހުރިހާ މެމްބަރުން ޕާޓް ޓައިމް ކުުރުމަށް ބަޖެޓު ރިކަމަންޑޭޝަނެއްގެ ގޮތުގައި ރިޔާޒު ވަނީ ހުށަހަޅުއްވައިފައެވެ.