ފުޅާ ދާއިރާއެއްގައި މަސްތުވާތަކެތީގެ ވިޔާފާރިކުރާކަމަށް ތުހުމަތުކުރެވޭ މީހަކު އަތުލައިގެންފި

ހައްދުންމަތީ މާމެންދުއާއި، އެރަށުގެ ކައިރީގައިވާ ރަށްރަށުގައި ފުޅާ ދާއިރާއެއްގައި މަސްތުވާތަކެތީގެ ވިޔާފާރިކުރާކަމަށް ތުހުމަތުކުރެވޭ 23 އަހަރުގެ މީހަކު ފުލުހުން އަތުލައިގެންފިއެވެ.

އޭނާ އަތުލައިގެންފައިވަނީ ޕޮލިސް އިންޓެލިޖެންސާއި ލ.ގަން އަދި ލ.މާމެންދޫ ޕޮލިސް ސްޓޭޝަން ގުޅިގެން ހިންގި އޮޕަރޭޝަނެއްގައެވެ. މިއޮޕަރޭޝަނުގައި އޭނާގެ އިތުރަށް 29 އަހަރުގެ ފިރިހެނަކާއި 25 އަހަރުގެ އަންހެނަކުވަނީ އަތުލައިގެންފައި ކަމަށް ފުލުހުންވަނީ ބުނެފައެވެ.

މި ނޮވެމްބަރު މަހުގެ 25 ވަނަ ދުވަހު ހިންގި މި އޮޕަރޭޝަނުގައި މި މީހުން ހައްޔަރުކޮށްފައިވަނީ ކޯޓު އަމުރެއްގެ ދަށުން ލ. މާމެންދޫ ހުދުފަސްގެ ބަލައިފާސްކުރި ކުރުމުގެ ތެރޭގައި އެގެއިންނެވެ.

އެގެ ބަލައިފާސްކުރިއިރު މަސްތުވާތަކެތިކަމަށް ޝައްކުކުރެވޭ އެއްޗެއްހުރި ފިލްމް ހުސްކުރި ދަޅަކާއި ޖޫސްޕެޓީީ ކޮތަޅަކާއި ބްލެޓް ސައިޒުގެ 33 ރަބަރު ޕެކެޓާއި 98 ކުދި ރަބަރު ޕެކެޓް ފެނިފައިވާ ކަމަށް ފުލުހުން ހާމަކުރައްވާފައިވެއެވެ. އޭގެއިތުރަށް މަސްތުވާތަކެތި ބަންދުކުރުމަށް ބޭނުންކުރާ ޒާތުގެ ގިނަ ޢަދަދެއްގެ ހުސް ރަބަރު ޕެކެޓާއި މަސްތުވާތަކެތި ބަންދުކުރުމަށް ބޭނުންކުރާ ބައެއް އާލާތްތަކާއި 5000 ރުފިޔާއަށްވުރެ ގިނަ ފައިސާ ފެނިފައިވާ ކަމަށްވެސް ފުލުހުން ހާމަކޮށްފައިވެއެވެ. ހައްޔަރުކޮށްފައިވާ މީހުންގެ ތެރެއިން 29 އަހަރުގެ މީހާއާއި 23 މީހާއަކީ މަސްތުވާތަކެތީގެ މައްސަލަތަކުގެ ރިކޯރޑް އޮންނަ ދެ މީހެއް ކަމަށްވެސް ފުލުހުންވަނީ ބުނެފައެވެ.

މިމައްސަލާގައި ހައްޔަރުކޮށްފައިވާ މީހުންގެ ބަންދާމެދު ގޮތެއް ނިންމުމަށްޓަކައި ހައްދުންމަތީ ތުނޑިި ގަމު މެޖިސްޓްރޭޓް ކޯޓަށް ހާޒިރުކުރުމުން ވަނީ މިނިސްޓްރީ އޮފް ހޯމް އެފެއާޒުން ކަނޑައަޅާތަނެއްގައި ބަންދުގައި ބަހައްޓައިގެން ތަޙުޤީޤު ކުރިއަށް ގެންދިޔުމަށް 15 ދުވަހުގެ މުއްދަތެއް ދީފައެވެ.

މިމައްސަލަ ފުލުހުން ގެންދަނީ ތަހުގީގު ކުރަމުންނެވެ.