މާލޭ ސިޓީކައުންސިލުގެ ލިޔެކިޔުންތަކެއް ފުލުހުންގެ ބެލުމުގެ ދަށަށް ގެނެސްފި

މާލޭ ސިޓީކައުންސިލުގެ ޚާއްސަ ލިޔެކިޔުންތަކެއް ފުލުހުންގެ ބެލުމުގެ ދަށަށް ގެނެސްފި ކަމަށް ފުލުހުން ދެންމެ ބުނެފިއެވެ.

ނޫސްވެރިންނަށް މައުލޫމާތު ދެއްވުމަށް އިސްކަންދަރު ކޮށީގައި ދެންމެ ބޭއްވި ނޫސްވެރިންގެ ބައްދަލުވުމުގައި ސަބްއިންސްޕެކްޓަރ އޮފް ޕޮލިސް މުޙައްމަދު ހުޝާމަތު ވިދާޅުވީ އެލިޔުންތައް ފުލުހުންގެ ބެލުމުގެ ދަށަށް ގެނެސްފައިވަނީ ކޯޓު އަމުރެއްގެ ދަށުން މާލޭ ސިޓީ ކައުންސިލަށް ވަދެ ކަމަށެވެ. ނަމަވެސް އެއީ ކޮންކަމަކާ ގުޅޭ ލިޔުންތަކެއް ކަމެއް އޭނާ ވިދާޅެއް ނުވެއެވެ.

އެލިޔުންތައް ފުލުހުންގެ ބެލުމުގެ ދަށަށް ގެންގޮސްފައިވަނީ މާލޭ ސިޓީކައުންސިލްގެ ބައެއް މުވައްޒަފުން އެލިޔުންތައް ނާޖާއިޒު ގޮތުގައި ބޭނުން ކުރުމަށް އެތަނުން ނެރެން އުޅޭ ކަމުގެ މައުލޫމާތު ފުލުހުންނަށް ލިބުމުން ކަމަށްވެސް އޭނާ ވިދާޅުވިއެވެ.

އެމައްސަލާގައި އެއްވެސް މީހަކު މިހާތަނަށް ހައްޔަރު ކޮށްފައި ނުވާކަމަށްވެސް އޭނާ ވިދާޅުިވިއެވެ. މިމައްސަލަ ތަހުގީގު ކުރަމުންދާތީ އިތުރު މައުލޫމާތު ދެވެންނެތް ކަމަށްވެސް ހުޝާމަތު ވިދާޅުވިއެވެ.

މިކަމާ ގުޅިގެން ނެރެފައިވާ ކޯޓުއަމުރުގައި ބުނެފައިވަނީ "ދިވެހިރާއްޖޭގެ ބިމާބެހޭ ޤާނޫނުގެ ދަށުން މިނިސްޓްރީ އޮފް ހައުސިން އެންޑް އިންފްރާސްޓްރަކްޗަރ އިން އެކުލަވާލަމުން ގެންދާ ދިވެހިރާއްޖޭގެ ބިމުގެ ދަފްތަރުގެ މަސައްކަތުގެ ތެރެއިން މޯލްޑިވްސް ލޭންޑް އެންޑް ސާވޭ އޮތޯރިޓީ އިން މާލޭ ސިޓީ ކައުންސިލަށް ފޮނުވާފައިވާ ޕީޑީއެފް ފައިލްތަކުގެ މަޢުލޫމާތު މާލޭ ސިޓީ ކައުންސިލްގައި މަސައްކަތް ކުރާ ބަޔަކު، އެ މަޢުލޫމާތުތައް އެހެން ފަރާތްތަކަށް ޙިއްސާކޮށް ނާޖާއިޒް ފައިދާތަކެއް ނަގަމުންދާ މައްސަލަ އާއި ގުޅިގެން ހެކި، ޤަރީނާ ހޯދުމަށާއި އެތަކެތި ފުލުހުންގެ ބެލުމުގެ ދަށަށް ގެނައުމަށް." ފުލުހުންނަށް އަމުރުކުރާ ކަމަށެވެ.

މިމައްސަލަ ތަހުގީގު ކުރިއަށްދާ ވަރަކުން ތަފްސީލް ހާމަކުރަމުންދާނެ ކަމަށްވެސް ހުޝާމަތު ވިދާޅުވިއެވެ.