ރާއްޖޭގެ ވެރިކަން ފޮރޮޅައިލުމަށް ވަނީ ތައްޔާރުވެފައި: ރައީސް ނަޝީދު

ރާއްޖޭން ބޭރުގެ ޓެރަރިސްޓު ޖަމާއަތަކާ ގުޅިގެން ރާއްޖޭގެ ވެރިކަން ފޮރޮޅައިލުމަށް ތައްޔާރުވެފައިވާކަމަށް ރައީސް މުހައްމަދު ނަޝީދު ވިދާޅުވެއްޖެއެވެ.

ހުޅުމާލެ ފެރީޓާމިނަލް ސަރަހައްދުގައި ރޭ އެމްޑީޕީން ބޭއްވި ކަންމަތީ ބައްދަލުވުމެއްގައި ވާހަކަ ދައްކަވަމުން ރައީސް ނަޝީދު ވިދާޅުވީ، ރާއްޖޭގެ ވެރިކަން ފޮރޮޅައިލުމަށް  މަސައްކަތްކުރާ ޖަމާއަތް ވަނީ ފުލުހުންނާ ސިފައިނާ ގުޅިފައިކަމަށެވެ. 

"މި ޓެރަރިސްޓު ޖަމާއަތްތާއި ފުލުހުންނާއި ސިފައިންގެ ތެރެއިން ބައެއް މީހުންވަނީ މާ ބޮޑަށް ގުޅިފައި. މާލޭގެ ގޭންގްތަކާވެސް މި ދެންނެވި ޓެރަރިސްޓު ޖަމާއަތްތަކާ މާ ބޮޑަށްވަނީ ގުޅިފައި،" ރައީސް ނަޝީދު ވިދާޅުވިއެވެ. 

ރައީސް ނަޝީދު އެހެން ވިދާޅުވިނަމަވެސް، މޯލްޑިވިސް ނެޝަނަލް ޑިފެންސް ފޯހުން މިއަދު ބުނެފައިވަނީ، ރާއްޖޭގެ ވެރިކަން ފޮރޮޅައިލުމަށް ބަޔަކު މަސައްކަތްކުރާ ކަމުގެ މައުލޫމާތު ލިބިފައިނުވާކަމަށެވެ. 

ރޭގެ ބައްދަލުވުމުގައި ރައީސް ނަޝީދު ވަނީ ސްޕްރީމްކޯޓުގެ ފަނޑިޔާރުންގެ އަދަދު މަދުކޮށް، އެ ކޯޓު ރައީސް އަބްދުﷲ ޔާމިންގެ ބާރުގެ ދަށަށް ގެނައުމަށް މަސައްކަތް ކުރާކަމަށްވެސް ތުހުމަތު ކުރައްވައިފައެވެ. 

ރައީސް ނަޝީދު ވިދާޅުވީ، އެ ގޮތަކަށް ޕީޕީއެމުން މަސައްކަތް ފަށާފައިވަނީ، ގާނޫނު އަސާސީއާ ހިލާފަށް އޮޑިޓަ ޖެނެރަލް ނިޔާޒު އިބްރާހިމް ވަކިކުރެއްވި މައްސަލަ އަމިއްލަ މީހަކު ސުޕްރީމް ކޯޓަށް ހުށަހެޅުމާ ގުޅިގެން ކަމަށެވެ. 

ރައީސް ނަޝީދު އެހެން ވިދާޅުވިނަމަވެސް ސްޕްރީމް ކޯޓުގެ ފަނޑިޔާރުން މަދުކުރުމަށް އިއްޔެ ރައްޔިތުންގެ މަޖިލީހަށް ހުށަހަޅާފައިވަނީ އެމްޑީޕީގެ ޕާލިމެންޓަރީ ގުރޫޕުގެ މެމްބަރު އިބްރާހިމް ޝަރީފެވެ.