މަޖިލީހުގެ މެމްބަރުންގެ އަދަދު 85 ކަށްވުރެ އިތުރުނުކުރުމަށް ގާނޫނުއަސާސީއަށް އިސްލާހެއް ހުށަހަޅުއްވައިފި

ރައްޔިތުންގެ މަޖިލީހުގެ މެންބަރުންގެ އަދަދު 85 މެންބަރުންނަށް ވުރެއިތުރު ނުވާގޮތަށް ގާނޫނު އަސާސީއަށް ކުޑަ ހުވަދޫ ދާއިރާގެމެންބަރު އަހްމަދު އާމިރު ހުށަހަޅުއްވައިފިއެވެ.

ގަނޫނު އަސާސީގެ 71 ވަނަ މާއްދާއަށް އާމިރު ހުށަހަޅުއްވާފައިވާ އިސްލާހުގައި ބުނެފައިވަނީ ރައްޔިތުންގެ މަޖިލިސް އެކުލެވިގެންވަނީ 28 މޭ 2014 ގައި އެކުލަވާލެވުނު ރައްޔިތުންގެ މަޖިލިސް އެކަށައެޅުމުގައި ކަނޑައަޅާފައިވާ އިދާރީ ދާއިރާތަކާއި އިންތިހާބީ ދާއިރާތަކުގެ މައްޗަށް ބިނާކޮށް 85 މެންބަރުންކަމަށެވެ.

އާމިރު ހުށަހެޅުއްވި އިސްލާހުގައި ވިދާޅުވެފައިވަނީ މަޖިލިސް މެމްބަރުންގެ އަދަދު އިތުރުނުކުރަން ހުށަހެޅުމުގެ މަގުސަދަކީ ދިވެހިރާއްޖޭގެ އިގްތިސާދީ އަދި މާލީ ގޮންޖެހުންތަކުން ސަލާމަތްކުރުމެވެ.

ގާނޫނު އަސާސީގެ ދަށުން އިންތިހާބުކުރެވުނު ފުރަތަމަ ރައްޔިތުންގެ މަޖިލީހުގެ މެންބަރުންގެ އަދަދުކަމުގައި ކަނޑައެޅިފައިވާ 85 މެންބަރުންގެ އަދަދު އިތުރުވެގެން ދިއުމަކީ ތިން ބާރު ވަކިވެފައިވާ ޑިމޮކްރެޓިކް ނިޒާމެއްގައި އެންމެ އެކަށޭނަ ގޮތްކަމުގައި ނުދެކޭކަމަށްވެސް އޭނާ ވިދާޅުވިއެވެ.

ގާނޫނު އަސާސީގެ 71 ވަނަ މާއްދާގައި ބުނެފައިވަނީ ކޮންމެ އިދާރީ ދާއިރާއެއްގައި ރަޖިސްޓްރީ ކުރެވިފައިވާ އާބާދީގެ ފުރަތަމަ ފަސްހާސް މީހަކަށް ނުވަތަ ފަސްހާސް ހަމަ ނުވާ ކޮންމެ އިދާރީ ދާއިރާއެއްގައި ދެ މެންބަރުން ތިއްބެންވާނެ ކަމަށެވެ.