އަބްދުﷲ ގާޒީ ހައްޔަރުކުރުމަކީ ގޯހެއް: ރައީސް ނަޝީދު
23 ނޮވެމްބަރ 2014 14:35
ކްރިމިނަލް ކޯޓުގެ އިސްގާޒީގެ މަގާމުގައި ހުންނެވި ގާޒީ އަބްދުﷲ މުހައްމަދު (އަބްދުﷲ ގާޒީ) ހައްޔަރު ކުރުމަކީ ހެދުނު ގޯހެއްކަމަށް ރައީސް މުހައްމަދު ނަޝީދު ވިދާޅުވެއްޖެއެވެ.
އިންޓަނޭޝަނަލް ޑެމޮކްރަޓް ޔޫނިއަން (އައިޑީޔޫ)ގެ ޕާޓީ ލީޑަރުންގެ ބައްދަލުވުމަށް ދެކުނު ކޮރެއާ އަށް ކުރެއްވި ދަތުރުފުޅަށް ފަހު މާލެވަޑައިގެން ނޫސްވެރިންނާ ބައްދަލުކުރައްވައި ނަޝީދު ވިދާޅުވީ، އަބްދުﷲ ގާޒީ ހައްޔަރު ކުރުމަކީ އެމަނިކުފާނުގެ ޑިފެންސް މިނިސްޓަރ ތޮލްހަތް އިބްރާހިމް ކަލޭފާނާއި އަދި އެނޫންވެސް ބައެއް މިނިސްޓަރުން ހެއްދެވި ގޯހެއް ކަމަށެވެ.
"އަޅުގަނޑުގެ ސަރުކާރުގައި ވެސް އަބުދުﷲ މުހައްމަދު ނިންމެވި ނިންމުމަކީ، ގައުމީ ސަލާމަތަށް ހުރި ނުރައްކަލެއްގެ ގޮތުގައި އޭރުގެ ދައުލަތުގެ ބައެއް ބޭފުޅުން، ހާއްސަކޮށް އޭރުގެ މިނިސްޓްރީ އޮފް ޑިފެންސުން ދެކެވަޑައިގެންނެވީ. އެއީ އަޅުގަނޑު ދެކޭ ގޮތުގައި ގޯހެއް،" ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ، އަބުދުﷲ ގާޒީއަކީ ކަންތައްތަކައި މެދު ވަރަށް ފުންކޮށް ވިސްނަވާ ބޭފުޅެއް ކަމަށާއި އެބޭފުޅާގެ ނިންމެވުންތަކަށް ސިޔާސީ ބޭފުޅުން ކުއްލި ހަރަކާތް ގެނައުމަކީ ރަނގަޅު ކަމެއް ނޫން ކަމަށެވެ.
ރައީސް ނަޝީދު މިހެން ވިދާޅުވެފައިވަނީ، އެމަނިކުފާނުގެ ވެރިކަން 2012 ވަނަ އަހަރު ވެއްޓުމާ ގުޅިގެން،ގދ. ތިނަދޫ ޕޮލިސް ސްޓޭޝަނަށާއި ކޯޓުތަކަށް ގެއްލުން ދީ ހުޅުޖެހި މައްސަލާގައި ދައުލަތުން ޓެރަރިޒަމްގެ ދައުވާ އުފުލި މީހުންގެ މައްސަލަ ކްރިމިނަލް ކޯޓުން އިއްޔެ ބޭރުކޮށްލާފައިވަނިކޮށެވެ. އެ މައްސަލަ ކްރިމިނަލް ކޯޓުން އަބްދުﷲ ގާޒީ ބޭރުކޮށްލައްވާފައިވަނީ ދައުލަތުން ހެކި ހުށަހެޅުމަށް ޕްރޮސެކިއުޓަރ ޖެނެރަލް އޮފީހުގެ ވަކީލުން ހާޒިރުނުވުމުންނެވެ.
ޕްރޮސެކިއުޓަރ ޖެނެރަލް މުހުތާޒް މުހުސިން ވިދާޅުވެފައިވަނީ ކޯޓުން ބޭރުކޮށްލި މައްސަލަ އަލުން ކޯޓަށް ވައްދާނެކަމަށެވެ.
ނަމަވެސް ރައީސް ނަޝީދު ވިދާޅުވެފައިވަނީ، ހުޅުޖެހި މައްސަލާގައި ދައުލަތުގެ ފަރާތުން ހެކި ހުށަހެޅުމަށް އަބްދުﷲ ގާޒީ ވިދާޅުވުމުން، ދައުލަތުގެ ވަކީލުން ހެއްކާއެކު ޝަރީއަތުގެ މަޖިލީހަށް ހާޒިރުވެވަޑައެއް ނުގަންނަވަ އެވެ. އެހެންވެ ބާތިލް މައްސަލައެއްގެ ގޮތުގައި މައްސަލަ ނިންމެވުމުން، އެ މައްސަލަ އަލުން ކްރިމިނަލް ކޯޓަށް ހުށަހަޅުއްވާނެ ކަމަށް ޕްރޮސިކިއުޓަ ޖެނެރަލް ވިދާޅުވުމަކީ ގާނޫނީ ހަމައެއް ނޫންކަމަށެވެ.
ރައީސް ނަޝީދުގެ ވެރިކަމުގައި އަބްދުﷲ ގާޒީ 22 ދުވަސް ވަންގެން ގިރިފުށީގައި ހައްޔަރުކޮށްގެން ގެންގުޅެނެވެ.
ކިޔުންތެރިންގެ ހިޔާލު