ފީނަން ގޮސް އުޅުނު މީހަކު ގެއްލިގެން ހޯދަމުންދަނިކޮށް މަރުވެފައި އޮއްވާ ފެނިއްޖެ

މިއަދު ހެނދުނުގެ ވަގުތެއްގައި ކ. ގުރައިދޫ ކައިރިއަށް ފީނަން ގޮސް އުޅެނިކޮށް ގެއްލިގެން ހޯދަމުންދިޔަ އެރަށު، އޯޝަންވިލާ، އަޙްމަދު ޙަސަން (49އ) މަރުވެފައި އޮއްވާ ފެނިއްޖެ ކަމަށް ފުލުހުން ހާމަކޮށްފިއެވެ.

ގުރައިދޫގައި މަސައްކަތްކުރާ ފުލުހުންނާއި އާއްމު ރައްޔިތުން ގުޅިގެން ކުރަމުންދިޔަ މަސައްކަތުން އޭނާ ފެނިފައިވަނީ، ގެއްލުނުކަމަށް ބުނާ ސަރަޙައްދުގެ ފެންމަތީގައި އޮއްވައެވެ. އޭނާ ފެނިފައިވަނީ މިއަދު ހެނދުނު 10:45 އެހައިކަންހާއިރުއެވެ.

މިމީހާ ގުރައިދޫ ސިއްޙީ މަރުކަޒަށް ގެންދިޔައިރުވެސް މަރުވެފައިވާކަމަށް ގުރައިދޫ ސިއްޙީ މަރުކަޒުން އޭނާގެ ހަށިގަނޑު ބެލި ޑޮކްޓަރު މަޢުލޫމާތު ދީފައިވާ ކަމަށްވެސް ފުލުހުން ހާމަކޮށްފައިވެއެވެ.

މިމީހާ ގެއްލިފައިވަނީ ގުރައިދޫ ކައިރީ އޮންނަ މާއްދޫ ކަނޑުއޮޅިއަށް އިތުރު ބަޔަކާއެކު ފީނަން ގޮސް އުޅެނިކޮށް މިއަދު ހެނދުނުގެ ވަގުތެއްގައެވެ.