ބަދަލުގެ ގޮތުގައި 803 މިލިއަން ޑޮލަރު ދިނުމަށް ޖީއެމްއާރުން އެދެފި

ދިވެހި ސަރުކާރާއިއެކު އިންޑިއާގެ ޖީއެމްއާރު ކުންފުނިން ވެފައިވާ އެއްބަސްވުން އުވާލުމަށް ނިންމުމާ ގުޅިގެން، ބަދަލުގެ ގޮތުގައި 803 މިލިއަން ޑޮލަރު ދިނުމަށް އިންޑިއާގެ ޖީއެމްއާރު ކުންފުނިން އެދިއްޖެއެވެ.

ޖީއެމްއާރުން އެދޭ ބަދަލު 1.2 ބިލިއަނުން 803 މިލިއަން ޑޮލަރަށް ބަދަލުވެފައިވާކަން ހާމަވެފައިވަނީ އެކަން ހާމަކޮށް އެ ކުންފުނިން އިންޑިއާގެ ސިޔާސީ ބައެއް އިސްވެރިންނަށް ފޮނުވި ސިޓީއެއްގައި އޮގޮތަށް އެދިފައިވާތީއެވެ. 

އެ ސިޓީގައި ޖީއެމްއާރުން ބުނެފައިވަނީ، 803 މިލިއަން ޑޮލަރުގެ އިތުރުން އެގްރީމަންޓު އުވައިލުމުގެ ސަބަބުން އެ ކުންފުނީގެ ނަމަށް ލިބުނު ހުތުރުނަަމަށް ވެސް ބަދަލު ހޯދުމަށް އެދިފައިވާނެކަމަށެވެ. އެހެން ނަމަވެސް އެއީ ކިހާ ފައިސާއެއްކަމެއް އެ ކުންފުނިން ހާމަކޮށްފައެއްނުވެއެވެ. 

އިބްރާހިމް ނާސިރު އިންޓަނޭޝަނަލް އެއާޕޯޓު ތަރައްގީކޮށް ބެލެހެއްޓުމަށް ޖީއެމްއާރަށް އެ އެއާޕޯޓު 25 އަހަރަށް ކުށްޔަށް ދީފައިވަނީ ރައީސް މުހައްމަދު ނަޝީދުގެ ވެރިކަމުގައިއެވެ. އެހެން ނަމަވެސް އެ އެގްރީމަންޓު އުވާލާފައިވަނީ ރައީސް ޑރ. މުހައްމަދު ވަހީދުގެ ވެރިކަމުގަައި 2012 ވަނަ އަހަރުއެވެ. 

އާބިޓްރޭޝަނަށް ހިނގި ހަރަދުގެ ގޮތުގައި 4 މިލިއަން ޑޮލަރު ދެއްކުމަށް ސިންގަޕޫރުގެ އާބިޓްރޭޝަން ޕެނަލުންދިވެހި ސަރުކާރަށް ވަނީ މިދިޔަ ޖޫން މަހުގެ ތެރޭގައި އަންގައިފައިއެވެ. 

މިއެއްބަސްވުން އުވާލުމާ ގުޅިގެން ބަދަލުގެގޮތުގައި 1.4 ބިލިއަން ޑޮލަރު ހޯދުމަށް ޖީއެމްއާރުންވަނީ މީގެކުރިންވަނީ ސިންގަޕޫރުގެ އާބިޓްރޭޝަނަށް މައްސަލަ ހުށަހަޅައިފައެވެ.

މި މައްސަލައިގެ އަޑު އެހުންތައް ނިންމުމަށްފަހު އާބިޓްރޭޝަނުން ނިންމާފައިވަނީ އެއް އެއްބަސްވުމަކީ ސައްހަ އެއްބަސްވުމެއް ކަމަށެވެ. އަދި ޖީއެމްއާރު ރާއްޖެއިން ފޮނުވާފައިވަނީ އެއްބަސްވުމާ ޚިލާފަށް ޤާނޫނީ ހަމަތަކުން ބޭރުން ކަމަށްވެސް ނިންމާފައިވެއެވެ.

އެއްބަސްވުމުގެ ދަށުން ނެގުމަށް ނިންމި އެއާޕޯޓް ޑިވެލޮޕްމަންޓް ޗާޖް (އޭޑީސީ) އާއިއިންޝްއަރެންސް ސާޗާޖަކީ ރާއްޖޭގެ ޤާނޫނުތަކަށް ބަލާއިރު ނެގޭނެ އެއްޗެއްކަމަށްވެސް ވަނީ ނިންމާފައެވެ. މި ފީތައް ނެގޭގޮތް ނުވުމުން އެއްބަސްވުމަށް ގެނެސްފައިވާ ބަދަލުތަކަކީވެސް ސައްހަ ބަދަލެއް ކަމަށް އާބިޓްރޭޝަނުންވަނީ ކަނޑައަޅައިފައެވެ.

އެޓަރނީ ޖެނެރަލް މުހައްމަދު އަނިލް މިއަދުވިދާޅުވީ ޖީއެމްއާރުން އެދުނު 1.4 ބިލިއަން ޑޮލަރާ ގާތަށްވެސް ސަރުކާރުން ފައިސާދައްކަން ނުޖެހޭނެކަން މިހާރު ކަށަވަރު ވެފައިވާ ކަމަށެވެ. ނަމަވެސްއާބިޓްރޭޝަނުގެ ނިންމުމަށް ސަރުކާރުން ތަބާވާނެ ކަމަށްވެސް އޭނާ ވިދާޅުވިއެވެ. އަނިލް ވިދާޅުވީ ޖީއެމްއާރަށް ބަދަލުދޭން ޖެހޭނެ ކަމަށް ކުރިންވެސް ގަބޫލު ކުރެއްވި ކަމަށެވެ. ނަމަވެސް ވަކާލާތު ކޮށްފައިވާނީ ޖީއެމްއާރު އެދޭވަރުގެ ބަދަލެއް ދޭންނުޖެހޭނެ ކަމަށް އޭނާ ވަނީ ވިދާޅުވެފައެވެ.