އާއިލާއަށް ފިލައިގެން އުޅުނު ޝިފާ ހޯދައި އާއިލާއާ ހަވާލުކޮށްފި

އާއިލާއަށް ފިލައިގެން އުޅުނު ގ. ގްރީންބީންސް، ޝިފާ މުޙައްމަދު (16އ) ހޯދުމަށްފަހު އާއިލާއާ ހަވާލުކޮށްފި ކަމަށް ފުލުހުން ހާމަކޮށްފިއެވެ.

އޭނާ ފިލާފައިވާ ކަމަށް އާއިލާގެ ފަރާތުުން ފުލުހުންނަށް ރިޕޯޓް ކޮށްފައި ވަނީ މިދިޔަ އޮކްޓޯބަރު މަހުގެ 19 ވަނަ ދުވަހުގެ ވަގުތެއްގައި ކަމަށް ފުލުހުން ބުނެފައިވެއެވެ. އޭނާ ހޯދަމުންދަނިކޮށް ފެނިފައިވަނީ މާފަންނު ގެއެއްގެ ތެރޭގައި އޭނާ ހުރި ކަމުގެ މަޢުލޫމާތު އާންމު ފަރާތަކުން ފުލުހުންނަށް ދިނުމާއެކު ފެމިލީ އެންޑް ޗައިލްޑް ޕްރޮޓެކްޝަން ޑިޕާރޓްމަންޓްގެ މުވައްޒަފުން އެގެއަށް ގޮސް ގޭގެ ވެރިފަރާތުގެ ހުއްދާއާއެކު އެގޭތެރެ ބަލައިފާސްކުރިއިރު އެގޭ ކޮޓަރިއެއްގެ ތެރެއިން ކަމަށްވެސް ފުލުހުން ބުނެފައިވެއެވެ.

ޝިފާ މުޙައްމަދު ހޯދުމަށް ފުލުހުން ހިންގި ހަރަކާތުގައި އޭނާ ފިލުވައިގެން ގެންގުޅުނު ކަމަށް ތުހުމަތު ކުރެވިގެން 25 އަހަރުގެ ފިރިހެނަކު ވަނީ ފުލުހުންގެ ބެލުމުގެ ދަށަށް ގެންގޮސްފައި ކަމަށްވެސް ފުލުހުން ބުނެފައިވެއެވެ.

އެއްވެސް ފަރާތެއްގެ ބެލުމުގެ ދަށަށުގައި ގޭގޭގައި މީހުންނާއި ކުޑަކުދިން ބައިތިއްބާއިރު އެ ފަރާތްތަކަކީ ކާކުކަން ދެނެގަނެ ކަށަވަރު ކުރުމަށް ހެޑް އޮފް ފެމިލީ އެންޑް ޗައިލްޑް ޕްރޮޓެކްޝަން ޑިޕާރޓްމަންޓް ޗީފް އިންޕެކްޓަރ އޮފް ޕޮލިސް ޙަސަން ޝިފާޢު ވަނީ އިލްތިމާސް ކުރައްވާފައި ކަަމަށްވެސް ފުލުހުން ބުނެފައިވެއެވެ.

ޝިފާ މުޙައްމަދު އޭނާގެ އާއިލާއަށް ފިލައިގެން އުޅުނު މައްސަލައާއި އޭނާ ފިލުވައިގެން ގެންގުޅުނު ކަމަށް ތުހުމަތު ކުރެވޭ މައްސަލަ ފެމިލީ އެންޑް ޗައިލްޑް ޕްރޮޓެކްޝަން ޑިޕާރޓްމަންޓުން ބަލަމުންދާ ކަމަށްވެސް ފުލުހުން ބުނެފައިވެއެވެ.