ޤަވާޢީދާ ޚިލާފަށް އުޅުނު ބިދޭންސީންތަކެއް އިމިގްރޭޝަނާ ހަވާލުކޮށްފި

ޤަވާއިދާ ޚިލާފަށް ރާއްޖޭގައި އުޅޭ ބިދޭސީން ހޯދުމަށް ޑިޕާޓްމެންޓު އޮފް އިމިގްރޭޝަން އެންޑް އެމިގްރޭޝަނާއި މޯލްޑިވްސް ޕޮލިސް ސާވިސް ގުޅިގެން ކުރަމުންދާ މަސައްކަތުގެ ތެރެއިން ޤަވާއިދާ ޚިލާފަށް ކ.ގުރައިދޫގައި އުޅުނު 26 ބިދޭސީއަކު މާލެ ގެނެސް އެމީހުން އިމިގްރޭޝަނާ ހަވާލުކޮށްފި ކަމަށް ފުލުހުން ބުނެފިއެވެ.

ފުލުހުން އެރަށުގައި މިއޮޕަރޭޝަން ހިންގާފައިވަނީ މިމަހުގެ 16 ވަނަ ދުވަހުއެވެ. މި އޮޕަރޭޝަންގައި 60 ބިދޭސީނާއި ސުވާލުކޮށް، 31 ބިދޭސީންގެ އަތުގައި ވޯރކް ޕާރމިޓް ކާރޑް ނެތުމުން ހިފެހެއްޓި އެވެ. ނަމަވެސް 05 ބިދޭސީއެއްގެ ސްޕޮންސަރ ކުރި ފަރާތުން އެމީހުންގެ ކާޑު ހިފައިގެން އައުމުން އެ ބިދޭސީން ވަނީ ދޫކޮށްލާފައެވެ. މި ހުރިހާ ބިދޭސީންނަކީވެސް ބަންގްލަދޭޝް މީހުން ކަމަށް ފުލުހުން ބުނެފައިވެއެވެ.

ކ.ގުރައިދޫ ޕޮލިސް ސްޓޭޝަނުން އިސްނަގައިގެން ހިންގި މި ޚާއްސަ އޮޕަރޭޝަންގައި ގުރައިދޫ ޕޮލިސް ސްޓޭޝަންގައި މަސައްކަތްކުރާ ފުލުހުންގެ އިތުރުން ކ. އަތޮޅުގެ ކޮމާންޑަރ ސަބް އިންސްޕެކްޓަރ އޮފް ޕޮލިސް ޔޫސުފު ބުޝްރީ ވަނީ ބައިވެރިވެވަޑައިގެންފައި ކަމަށްވެސް ފުލުހުން ބުނެފައިވެއެވެ.