ސަރުކާރުގެ ގެދޮރުވެރި ކުރުމުގެ ސިޔާސަތުގެ އެންމެ މުހިންމުބައި ތަންފިޒު ނުކުރެވޭނެ-އެމްޑީޕީ

ރައީސް ޢަބުދުﷲ ޔާމީންގެ ސަރުކާރުން މަސައްކަތްތައް ތަންފީޒު ކުރަމުން ގެންދާ ސްޕީޑަށް ބަލައި އަދި އައު މަސައްކަތްތައް ރާވާ ހިންގުމުގެ ޤާބިލްކަން ހުރި މިންވަރަށް ބަލާއިރު މެނިފެސްޓޯގައި ހިމެނޭ، ގެދޮރުވެރި ކުރުމުގެ ސިޔާސަތުގެ އެންމެ މުހިއްމު ބައި ތަންފީޒު ނުކުރެވޭނެ ކަމަށް އެމްޑީޕީން ބުނެފިއެވެ.

މިހާރުގެ ސަރުކާރުން ރައްޔިތުންގެ މަޖިލީހަށް ހުށަހަލައިގެން ބަހުސް ކުރަމުންދާ 2015 ވަނަ އަހަރަށް ލަފާ ކުރާ ދައުލަތުގެ ބަޖެޓުގައިވާ ކަންތައްތައް ދިރާސާ ކުރުމަށްފަހު، ބަޖެޓްގައި ބޯހިޔާވަހި ކަމަށް ކަނޑައަޅާފައިވާ ކަންތައްތަކާ ބެހޭގޮތުން މިއަދު އެމްޑީޕީން ބުނީ، ޕީޕީއެމް ގެ މެނިފެސްޓޯގައި ބޯހިޔާވެހިކަމާއި ގުޅޭގޮތުން ފާހަގަކޮށްފައިވާ އެންމެ މުހިއްމު ސިޔާސަތަކީ އަލަތު ކައިވެންޏެއްކުރާ ކޮންމެ ދެމަފިރިއަކު ގެދޮރުވެރިކޮށްދިނުމުގެ ސިޔާސަތު ކަމަށެވެ.

ރާއްޖޭގެ އާބާދީ އިތުރުވަމުންދާ މިންވަރަށް ބަލާއިރު ކޮންމެ އަހަރަކު މަދުވެގެން ތިންހާސް އަލަތު ކައިވެނި ކުރާނެ ކަމަށާއި، އަތޮޅުތަކާއި މާލޭގެ އާބާދި ފެތުރިފައިވާ ގޮތަށް ބަލާއިރު އަލަތު ކައިވެނީގެ 3 ބައިކުޅަ 1ބައި (1000) މާލޭގައި އާބާދުވެފައިވާނެ ކަމަށްވެސް އެމްޑީޕީން ބުނެފައި ވެ އެވެ. މިހެންކަމުން ޕީޕީއެމް ގެ މެނިފެސްޓޯ ގައިވާ ގެދޮރުވެރިކުރުމުގެ ސިޔާސަތުތަންފީޒު ކުރުމަށްޓަކައި ހަމައެކަނި އަލަތު ކައިވެނިކުރާ މީހުންނަށް ގެދޮރުވެރިކުރުމަށް 5 އަހަރުގެ ދައުރުގެ ތެރޭގައި މާލޭގައި ފަސްހާސް ހައުސިންގ ޔުނިޓް އަދި އަތޮޅުތަކުގައި ދިހަހާސް ހައުސިންގ ޔުނިޓް އަޅަންޖެހޭ ކަމަށްވެސް އެމްޑީޕީން ވަނީ ބުނެފަ އެވެ.

އެމްޑީޕީން ބުނެފައިވަނީ 2015 ވަނަ އަހަރަށް ސަރުކާރުން ހުށަހަޅާފައިވާ ބަޖެޓުގައި 2016 ވަނަ އަހަރާއި، 2015 ވަނަ އަހަރާއި، އަދި 2017 ވަނަ އަހަރު ހިންގުމަށް ކަ ނޑައަޅާފައިވާ ހައުސިންގ ޔުނިޓްތަކުގެ ޖުމްލަ އަދަދަކީ ހުޅުމާލެ ހިމަނައިގެން، މާލޭގައި 1089 ޔުނިޓް، އަދި އަތޮޅުތަކުގައި 2096 ޔުނިޓެވެ.

ޕީޕީއެމް ސަރުކާރަށް 1 އަހަރުވެ ދެވަނަ އަހަރަކަށް ކުރިމަތިލާއިރު 2008 ވަނަ އަހަރު އިންތިޙާބު ކުރި، ރައީސް ނަޝީދުގެ ސަރުކާރުން ފައްޓަވާފައިވާ ހައުސިންގ ޔުނިޓްތަކުގެ ގިނަ އަދަދެއްގެ ހައުސިންގ ޔުނިޓްތަކުގެ މަސައްކަތް ނުނިމި ގިނަދުވަސް ތަކެއްވަންދެން މަސައްކަތް ހުއްޓިފައިވާކަން ފާހަގަކޮށްލަންޖެހޭ ކަމަށާއި، 2015 ވަނަ އަހަރުގެ ބަޖެޓުގައި ހިމަނާފައިވާ ގެދޮރު އެޅުމުގެ އެއްވެސް މަސައްކަތަކީ ރައީސް ޔާމީނުގެ ސަރުކާރުން ރާވާ އެކުލަވާލާފައިވާ މަސައްކަތްތަކެއް ނޫން ކަމަށްވެސް އެމްޑީޕީން ވަނީ ބުނެފައެވެ.

މީގެ އިތުރުން މިނިސްޓްރީ އޮފް ހައުސިންގ އިން މިހާރު ކުރިއަށް ގެންދާ ގެދޮރުވެރިކުރުމުގެ ޕްރޮގްރާމުގެ ތެރެއިން ގެދޮރުވެރިވުމަށް ހުށަހަޅާފައިވާ ފަރާތްތަކަށް މާރކްސް ދިނުމަށް ކަ ނޑައަޅާފައިވާ އުސޫލުތަކަށް ބަލާއިރު އަލަތު ކައިވެންޏެއް ކުރާ ދެމަފިރިއަކު ރޭންކް ކުރެވެނީ ވަރަށް ދަށުގައި ކަމަށްވެސް އެމްޑީޕީން ބުނެ އެވެ.

އެކަމުން ދޭހަކޮށްދެނީ މިހާރު ހައުސިންގ މިނިސްޓްރީން ކުރިއަށް ގެންދާ ޕްރޮގްރާމަކީ ޒުވާން އާއިލާތަކަށް އަމާޒުކުރެވިގެން ހިންގޭ ކަމެއް ނޫންކަން ކަމަށާއި، އަދި، މިހާތަނަށް ހައުސިންގ އެޕްލިކޭޝަން މިނިސްޓްރީއަށް އެޕްލިކޭޝަން ފޯމު ހުށަހަޅާފައިވާ ޖުމްލަ މީހުންގެ އަދަދު ކަމަށްވާ 13،000އަށް ބަލާއިރު، މާލެ އާއި ހުޅުމާލޭގައި އެޅުމަށް ބަޖެޓުގައި ހުށަހަޅާފައިވާ ހައުސިންގ ޔުނިޓްތަކުގެ އަދަދަކީ ނިސްބަތަށް ރިއާޔަތްކުރާއިރު ވަރަށް މަދު އަދަދެއްކަމަށާއި، އެއީ ޗައިނާގެ އެގްޒިން ބޭންކުން ހަމަޖެހޭ 704 ޔުނިޓާއި އިންޑިއަން އެގްޒިން ބޭންކުން ފައިސާ ހަމަޖެހިގެން އަޅާ 385 ޔުނިޓާއެކު 1089 ޔުނިޓް ކަންވެސް އެމްޑީޕީން ވަނީ ފާހަގަ ކޮށްފައެވެ.