ފެނުގެ ދަތިކަން ދިމާވާ ރަށްރަށަށް އެމައްސަަ ހައްލުކޮށް ދިނުމަކީ އަމާޒެއް -މިނިސްޓަރ

އަމާޒަކީ 2016 ވަނަ އަހަރު އަންނަންވާއިރަށް ފެނުގެ މައްސަލަތައް ދިމާވާ ރަށްރަށުގައި އެމައްސަލަ ހައްލު ކުރުން ކަމަށް އެންވިރަންމެންޓް މިނިސްޓަރ ތާރިގް އިބްރާހީމް މިއަދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ މިސަރުކާރަށް އެއްއަހަރު ފުރުމާ ގުޅިގެން އެމިނިސްޓްރީން ވެލާނާގޭގައި މިއަދު ބޭއްވި ނޫސްވެރިންގެ ބައްދަލުވުމެއްގައެވެ. އެމަނިކުފާނު ވިދާޅުވީ އަހަރަކަށްވުރެ އަހަރެއްވަނީ ބޯފެނުގެ މައްސަލަ ދިމާވާ ރަށްރަށް އިތުރުވެފައި ކަމަށެވެ. މިދިޔައަހަރު 60 ވަރަކަށް ރަށަށް އެމައްސަލަ ދިމާވެފައިވެއެވެ. ނަމަވެސް މިއަހަރު ވަނީ އެއަދަދު 110 އަކަށް އިތުރުވެފައި ކަމަށްވެސް ވިދާޅުވިއެވެ.

"މި އަހަރު މިއީ ރެކޯޑް އަދަދެއް. އެއީ 110 ރަށް. އެކަމަކު މިދިޔަ އަހަރު ހުރީ ގާތްގަނޑަކަށް 50 އަކަށް 60 އަކަށް ރަށަށް،" މިނިސްޓަރ ވިދާޅުވިއެވެ. މިނިސްޓަރ ވިދާޅުވީ ސަރުކާރުން މިހާރު ގެންދަވަނީ ބޯފެނުގެ މައްސަލަ ހައްލު ކުރުމަށް ކުރަންޖެހޭ ކަންކަމާ ބެހޭ ގޮތުން ސާވޭއެއް ކުރަމުން ކަމަށެވެ.

އެމަނިކުފާނު ވިދާޅުވީ މިހާރުވެސް ރާއްޖޭގެ 10 ރަށެއްގައި ފެނުގެ ނިޒާމން ގާއިމްކުރުމުގެ މަސައްކަތް ކުރައްވަމުން ގެންދަވާ ކަމަށެވެ. އޭގެ ތެރެއިން 8 ރަށެއްގައި އަމަލީ މަސައްކަތް ކުރަމުންދާ ކަމަށްވެސް ވިދާޅުވިއެވެ. އަނެއް ދެރަށގައިދަނީ ޑިޒައިން މަސައްކަތް ކަމަށް މިނިސްޓަރ ވިދާޅުވިއެވެ. މިރަށްރަށުގެ މަސައްކަތްތަކަށް 463 މިލިޔަން ރުފިޔާ ހޭދަވާނެ ކަމަށްވެސް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ އިތުރު ރަށްރަށުގައި ފެނުގެ ނިޒާމް ގާއިމް ކުރުމަށް ބޭނުންވާ ފައިސާވެސް ކޮންމެވެސް ވަރަކަށް ލިބިފައިވާ ކަމަށެވެ. އެގޮތުން 16 ރަށެއްގެ ފެނުގެ ނިޒާމު ގާއިމްކުރުމަށް ބޭނުންވާ ފައިސާ މިހާރު ހަމަޖެހިފައިވާ ކަމަށް ވިދާޅުވިއެވެ.