ގައްދޫ ޕޮލިސް ސްޓޭޝަނުން ޕޮލިސް ރިޕޯޓު ދޫކުރަން ފަށައިފި
17 ނޮވެމްބަރ 2014 15:17
ގައްދޫ ޕޮލިސް ސްޓޭޝަން:
ހުވަދުއަތޮޅު ދެކުނުބުރީ ގައްދޫ ޕޮލިސް ސްޓޭޝަނުން ޕޮލިސް ރިޕޯޓު ދޫކުރަން ފަށައިފި ކަމަށް ފުލުހުން ހާމަ ކުރައްވައިފިއެވެ.
މިއީ ޒުވާނުން ވަޒީފާއަށް ކުރިމަތިލުމަށް ބޭނުންވާ ކަންކަމަށް ފަސޭހަ މާހައުލެއް ޤާއިމްކޮށްދިނުމަށް ފުލުހުން ކުރަމުންދާ މަސައްކަތްތަކުގެ ތެރެއިން ކުރިކަމެއް ކަމަށް ފުލުހުން ބުނެފައިވެއެވެ.
ޕޮލިސް ރިޕޯޓު އެތަނުން ދޫކުރަން ފަށައިފައިވަނީ މި ނޮވެމްބަރު މަހުގެ 10 ވަނަ ދުވަހުއެވެ. މި ޚިދުމަތަކީ ފުލުހުންގެ ޚިދުމަތް ތަރައްޤީކޮށް ފުލުހުންގެ ޚިދުމަތް ރައްޔިތުންނާ ވީހާވެސް ގާތުން ދިނުމަށް ކުރަމުންދާ މަސައްކަތްތަކުގެ ތެރެއިން ލިބިދެވޭ ޚިދުމަތެއް ކަމަށްވެސް ފުލުހުން ބުނެފައިވެއެވެ.
މިކަމާ އަޕަރ ސައުތު ޕޮލިސް ޑިވިޜަންގެ ކޮމާންޑަރ ޗީފް އިންސްޕެކްޓަރ އޮފް ޕޮލިސް މުޙައްމަދު ބަޝީރު ވިދާޅު ޕޮލިސް ލައިފަށް ވިދާޅުވެފައިވަނީ ގައްދޫ ޕޮލިސް ސްޓޭޝަނުން ޕޮލިސް ރިޕޯޓް ދޫކުރަން ފެށުމުން ގައްދޫގެ ރައްޔިތުންނަށާއި ގައްދޫއާއި ކައިރި ރަށްތަކުގެ ރައްޔިތުންނަށް ވަރަށް ބޮޑު ފަސޭހަތަކެއް ވެގެންދާނެކަމަށެވެ. އަދި މި ޚިދުމަތް ފުޅާކޮށް އަތޮޅުގެ އެހެން ރަށުންވެސް މި ޚިދުމަތް ދިނުމަށް މަސައްކަތްކުރަމުންދާކަމަށް ވިދާޅުވެފައި ވެއެވެ.
"ޕޮލިސް ރިޕޯޓް ކުރިން ދޫކުރަނީ ތިނަދޫއިން އެކަނި. ގައްދޫ އޮންނަނީ ތިނަދޫއާ ތަންކޮޅެއް ދުރުގައިކަމުން ޕޮލިސް ރިޕޯޓް ހޯދުމަށް ތިނަދޫއަށް ދާންޖެހެނީ ބޮޑު ހޭދައެއްކޮށް ދިގު ދަތުރަކަށްފަހު. ގައްދޫއިން ޕޮލިސް ރިޕޯޓް ދޫކުރަން ފެށުމުން އެކަމަށް ވަރަށް ބޮޑު ހަލެއް ލިބިގެން ދާނެ. މި ޚިދުމަތް ގައްދޫން ލިބެން ފެށުމުުން ގައްދޫއާ ކައިރި ރަށްތަކުގެ ރައްޔިތުންނަށްވެސް ވަރަށް ބޮޑު ފަސޭހައެއް ލިބިގެންދާނެ،" ޕޮލިސް ލައިފްގައި ބަޝީރު ވިދާޅުވެފައިވެއެވެ.
ކިޔުންތެރިންގެ ހިޔާލު