ގުރައިދޫ ސިއްހީމަރުކަޒުން 24 ގަޑިއިރު ޚިދުމަތްދޭ ގޮތަށް ހަޖަމައްސަވައިފި

މާލެ އަތޮޅު ގުރައިދޫ ސިއްހީ މަރުކަޒުގެ ޚިދުމަތް 24 ގަޑި އިރަށް ބަދަލުކޮށްފިއެވެ. މީގެއިތުރަށް އެރަށުގައި މިއަދުވަނީ، 24 ގަޑިއިރު ޚިދުމަތްލިބޭ، އެސްޓީއޯގެ ބޭސް ފިހާރައެއްވެސް ހުޅުވާފައެވެ.

އެރަށުގައި މިއަދު ބޭއްވި ރަސްމިއްޔާތުގައި މިޚިދުމަތް އިފްތިތާހު ކޮށްދެއްވީ ހެލްތު މިނިސްޓްރީ ހިންގެވުމާ ހަވާލުވެ ހުންނެވި ޑިފެންސް މިނިސްޓަރ މުޙައްމަދު ނާޒިމާއި ގުރައިދޫ ދާއިރާގެ މެންބަރ އިބްރާހިމް ރިޒާއެވެ.

މި ރަސްމިއްޔާތުގައި ނާޒިމް ވިދާޅުވީ ޚިދުމަތް 24 ގަޑިއިރަށް ބަދަލު ކުރިޔަސް އެންމެ ފުރިހަމަ ޚިދުމަތެއް މިވަގުތު ނުލިބުމަކީ އެކަށީގެންވާ ކަމެއް ކަމަށެވެ. ނަަމަވެސް އެއްމަސްތެރޭގައި 2 ޑޮކްޓަރުންނާއި 3 ނަރުހުން އެތަނަށް ފޮނުވައި ދެއްވާނެ ކަމަށްވެސް ވިދާޅުވިއެވެ. މީގެ އިތުރަށް ލެބޯރަޓަރީގެ ޚިދުމަތްވެސް އެތަނުން ލިބޭނެ ކަމަށް ވިދާޅުވިއެވެ.

އެމަނިކުފާނު ވިދާޅުވީ މިއީ ރާއްޖޭގެ ސިއްހީދާއިރާ ރަނގަޅު ކުރުމަށް ސަރުކާރުން ކުރައްވަމުން ގެންދަވާ މަސައްކަތުގެ ތެރެއިން ކޮށްދެއްވި ކަމެއް ކަމަށެވެ. އެމަނިކުފާނު ވިދާޅުވީ 2008 ވަނަ އަހަރުން ފެށިގެން ރާއްޖޭގެ ސިއްހީ ދާއިރާވަނީ ބޮޑު ވަޅުގަނޑަކަށް ވެޓިފައި ކަމަށެވެ. އެކަމުން އަރައިގަތުމަށް ވަރަށް ބޮޑަށް މަސައްކަތް ކުރައްވަމުން ގެންދަވާ ކަމަށްވެސް ވިދާޅުވިއެވެ. އެތަނުގެ ޚިދުމަތް ފަށައިފައިވަނީ އެއްވަނަ ގްރޭޑުގެ މަރުކަޒެއްގެ ގޮތުގައި ކަމަށްވެސް މިނިސްޓަރ ވިދާޅުވިއެވެ.

މިރަސްމިއްޔާތުގައި ވާހަކަ ދައްކަވަމުން އެސްޓީއޯގެ މެނޭޖިން ޑިރެކްޓަރ ވިދާޅުވީ ގުރައިދޫގައި ހުޅުވި ބޭސްފިހާރައަކީ އަތޮޅުތަކުގައި އެކުންފުނިން ހުޅުވި 48 ވަނަ ފިހާރަ ކަމަށެވެ. އެތަނުންވެސް 24 ގަޑިއިރު ބޭސް ލިބޭނެ ކަމަށްވެސް ވިދާޅުވިއެވެ. އެތަނުން ބޭސް ނުލިބުނަސް ސިޓީ ބާއްވާފައި ދިޔުމުން ވަރަށް އަވަހަށް ބޭހާއެކު ފޮނުވައިދެއްވާނެ ކަމަށްވެސް އޭނާ ވިދާޅުވިއެވެ. އެރަށު ކައުންސިލްގެ ރައީސް ވިދާޅުވީ މިއީ ރައްޔިތުން ވަރަށް ބޮޑަށް ބޭނުންވެފައިވާ ކަމެއް ކަމަށެވެ.