ވަގަށް ނަގާފައިވާ ފޯނުތަކެއް ވިއްކަން އުޅުނު މީހަކު ހައްޔަރު ކޮށްފި

ވަގަށް ނަގާފައިވާ ފޯނުތަކެއް ވިއްކަން އުޅުނު މީހަކު ހައްޔަރުކޮށް ފުލުހުންނާ ހަވާލުކޮށްފިއެވެ.

އެމީހާ އަތުލައިގެންފައިވަނީ ހުޅުމާލެ އޯކިޑް ލޮޖް ގެސްޓް ހައުސް ކައިރީގައި ފޯންތައް ވިއްކަން ހުއްޓައެވެ. އޭނާ އަތުލައިގެންފައިވަނީ އެވަގުތު އޮފް ޑިއުޓީގައިހުރި ޕޮލިސް ސްޓާފް ސާޖަންޓް ޔަމަން ޢަލީއެވެ. އޭނާ ހިފެހެއްޓުމަށްފަހު ޔަމަންވަނީ ހުޅުމާލެ ޕޮލިސް ސްޓޭޝަނާއި އެމީހާ ހަވާލު ކޮފައެވެ.

އުމުރުން 32 އަހަރުގެ އެމީހާ އަތުލައިގެންފައިވަނީ މިނޮވެމްބަރ 11 ވަނަ ދުވަހު އެވެ. އެމީހާ ހައްޔަރު ކުރުމަށްފަހު ފުލުހުންގެ ތަހުގީގަށް އެނގިފައިވަނީ އެމީހާ ވިއްކަން އުޅުނު 2 ފޯނަކީ ވަގަށްނަގައިގެން ހުޅުމާލޭ ޕޮލިސް ސްޓޭޝަނަށް ރިޕޯޓްކުރެވިފައިވާ ފޯންތަކެއް ކަމަށް ފުލުހުން ބުނެފައިވެއެވެ.

ހުޅުމާލެ ކޯޓުން ވަނީ މިނިސްޓަރީ އޮފް ހޯމް އެފެއާޒުން ކަނޑައަޅާ ތަނެއްގައި އެމީހާ ބަންދުގައި ބަހައްޓައިގެން ތަޙުޤީޤު ކުރިޔަށް ގެންދިއުމަށް 12 ދުވަހުގެ މުއްދަތެއް ދީފައި ކަަމަށް ފުލުހުން ބުނެފައިވެއެވެ.

އެ މީހާ އަކީ 38 ފަހަރު ހުއްޓުވައި ބަލައި ފާސްކޮށްފައިވާ މީހެކެވެ. މީގެ އިތުރުން 20 ފަހަރު ފުލުހުންގެ ބެލުމުގެ ދަށަށް ގެނެސް 11 ފަހަރު ހައްޔަރު ކޮށްފައިވާ މީހެއް ކަމަށްވެސް ފުލުހުން ބުނެފައިވެއެވެ. އަދި އޭނާއާ ބެހޭ 9 މައްސަލައެއްގެ ތަހުގީގު ފުރިހަމަކޮށް ދަޢުވާ ކުރުމަށް ޕްރޮސެކިއުޓަރ ޖެނެރަލްގެ އޮފީހަށްވެސް ފޮނުވާފައިވާކަމަށް ފުލުހުން ބުނެފައިވެއެވެ. ފޯންތަކުގެ މައްސަލަވެސް ހުޅުމާލޭ ޕޮލިސް ސްޓޭޝަނުން ތަހުގީގުކުރަމުންދާ ކަމަށް އޭނާ ފުލުުހުން ހާމަކޮށްފައިވެއެވެ.