ޖުމްހޫރީ ވެރިކަމެއްގެ ފުރިހަމަ މަންފާ ލިބޭނީ، އެންމެންގެ ކިބައިގައި، ކެރުންތެރިކަން ހުރެގެން- ރައީސް ޔާމީން

ޖުމްހޫރީ ވެރިކަމެއްގެ ފުރިހަމަ މަންފާ ލިބޭނީ، ޤައުމުގެ ހުރިހާ އަފުރާދުންގެ ކިބައިގައި، ޤައުމު ކުރިއަށް ގެންދިޔުމުގެ ރޫޙު ހުރެގެން، އެ ކެރުންތެރިކަން ހުރެގެން ކަމުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް މިއަދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިއަހަރުގެ ޖުމްހޫރީ ދުވަހުގެ މުނާސަބަތުގައި ބޭއްވެވި ރަސްމީ ޖަލްސާގައި ދިވެހި ޤައުމާ މުޚާޠަބު ކުރައްވައި ވާހަކަފުޅު ދައްކަވަމުންނެވެ.މިއަދު ހެނދުނު ދަރުބާރުގޭގައި ބޭއްވެވި ޖަލްސާގައި އެމަނިކުފާނު ވިދާޅުވީ ޤައުމު ކުރިއަށް ގެންދިއުމުގެ ރޫޙާއި، ވިސްނުން ކޮންމެ ފަރުދެއްގެވެސް ހުންނަންވާނެ ކަމަށެވެ.

އަޅުގަނޑުމެންގެ ތެރޭގައި ސިޔާސީ ފިކުރު ތަފާތުވިނަމަވެސް، ޤައުމަށް ދަތިވާ، ނުވަތަ ޤައުމަށް ގެއްލުންވާ ކަމެއް ކުރުމަކީ އެއްވެސް ދިވެހި ރައްޔިތަކު އެކަންކަމަށް މަޢާފްކުރާނެ ކަންކަމެއްނޫން ކަމުގައިވެސް އެމަނިކުފާނު ވިދާޅުވިއެވެ.

ރައީސް ވިދާޅުވީ ދިވެހި ރައްޔިތުން މި ސަރުކާރު ވެރިކަމަށް ގެނައީ، އުއްމީދުތަކަކާއި، ހުވަފެންތަކަކާއެކުގައި ކަމަށެވެ. އެހެންކަމުން ކޮންމެ ފަރުދެއްވެސް، ކޮންމެ މުޢައްސަސާއެއްވެސް، ކޮންމެ ކުންފުންޏެއްވެސް، އަދި މުޅި ދައުލަތްވެސް މަސައްކަތްކުރަމުން ގެންދަނީ ދިވެހިރާއްޖެ ކުރިއަށް ގެންދިއުމަށް ކަމުގައި ވިދާޅުވިއެވެ.

އެމަނިކުފާނު ވިދާޅުވީ ރާއްޖޭގެ އިޤްތިޞާދު ހަރުދަނާ ކުރުމަށްޓަކައި ސަރުކާރުން އަޅުއްވާފައިވާ ފިޔަވަޅުތަކުގެ ނަތީޖާ ފެންނަމުންދާކަމަށެވެ.

ދައުލަތެއް ކުރިއަށް ދާނީ ޒުވާނުންގެ ހަކަތައިން ކަމުގައި ވިދާޅުވެ، އެއީ ދައުލަތެއް ކުރިއެރުމުގައި އެންމެ މުހިންމު ކަންތައް ކަމުގައިވެސް ރައީސް ވިދާޅުވިއެވެ. އަދި، ޒުވާނުންނަށް ބޭނުންވާ އެކިއެކި ކަންކަން ފުރިހަމަ ކޮށްދެއްވުމަށް ސަރުކާރުން ކުރައްވަމުން ގެންދަވާ ބައެއް ކަންކަމާ ބެހޭ ވާހަކަފުޅުވެސް ދެއްކެވިއެވެ.

މީގެ އިތުރުން، ރާއްޖޭގެ އެކިއެކި ދާއިރާތަކުގެ ތަރައްޤީއަށާއި، ރައްޔިތުންނަށް ބެނުންވާ އެކި ޚިދުމަތްތައް ފޯރުކޮށްދެއްވުމަށް ސަރުކާރުން އަޅުއްވަމުން ގެންދަވާ ފިޔަވަޅުތަކާ ބެހޭ ގޮތުންވެސް ވާހަކަފުޅު ދެއްކެވިއެވެ.