ބީއެމްއެލްގެ ޚިދުމަތް އަތޮޅުތަކުގައި ފުޅާކުރުމަށް ސަމާލު ކަމެއްދެން- އެންޑްރޫ

ބޭންކްއޮފްމޯލްޑިވްސް (ބީއެމްއެލް) ގެ ޚިދުމަތް އަތޮޅުތަކަށް ފުޅާކުރުމަށް ވަރަށް ބޮޑު ސަމާލު ކަމެއް ދެއްވާ ކަމަށް އެބޭންކުގެ ސީއީއޯ އަދި މެނޭޖިންގ ޑައިރެކްޓަރ އެންޑްރޫ ހީލީ ވިދާޅުވެއްޖެއެވެ.

ނޫސްވެރިންނަށް މަޢުލޫމާތު ދެއްވަމުން މިއަދު އޭނާ ވިދާޅުވީ ރާއްޖޭގައި ޚިދުމަތްދޭ އެހެން ބޭންކުތަކާއި ބީއެމްއެލްއާ ދެމެދު އޮތް އެންމެ ބޮޑު ތަފާތަކީ، އަތޮޅުތަކުގައި އެބޭންކުގެ ޚިދުމަތް ފުޅާކުރުން ކަމަށެވެ.

އޭނާ ވިދާޅުވީ "ހުރިހާ ރައްޔިތުންނަށް އަސާސީ ބޭންކިންގގެ ޚިދުމަތް ދިނުމަށް އަޅުގަނޑުމެން ދޯނި ބޭންކިންގ މެދުވެރިކޮށް އަހަރަކު 2000 ދަތުރު ކުރަން. އަދި 16000 ޕެންޝަން ޕޭމަންޓް ރައްދުކޮށްދެން،" ކަމަށެވެ. ނަމަވެސް އެވަރުންވެސް ބޭންކަށް ފާޑުކިޔުންތައް އަންނަމުންދާ ކަމަށް ވިދާޅުވިއެވެ.

މިއަދަކީ އެބޭންކަށް 32 އަހަރު ފުރުނު ދުވަހެެވެ. އެމުއްދަތުގައި ރާއްޖޭގެ އެކޮކަންކޮޅުތަކަށް ޚިދުމަތް ފުޅާކުރުމަށް މަސައްކަތް ކޮށްފައިވާނެ ކަމަށް އޭނާ ވިދާޅުވިއެވެ. އަދި ކުރިއަށްއޮތްތަނުގައިވެސް ޚިދުމަތް ފުޅާކުރަމުން ގެންދާނެ ކަމަށް ވިދާޅުވިއެވެ.

ރާއްޖޭގެ 20 އަޮތޮޅެއްގައި ބީއެމްއެލްގެ ބްރާންޗް މިހާރުވެސް އެބަހުއްޓެވެ. "އަޅުގަނޑުމެން މިދަނީ ޚިދުމަތުގެ ނެޓްވަރކް ފުޅާކޮށް އިތުރު އޭޓީއެމްވެސް ބަހައްޓަމުން. ސަރުކާރުގެ 5 ސްކީމެއް މެދުވެރިކޮށް ކުދި ވިޔަވާރިތަކަށާއި ކިޔަވާ ކުދިންނަށް މިދަނީ އެހީތެރިކަން ފޯރުކޮށްދެމުން،" އެންޑްރޫ ވިދާޅުވިއެވެ. އޭނާ ވިދާޅުވީ އަސާސީ ބޭންކިންގގެ ޚިދުމަތް ނުލިބޭ 176 ރަށަކަށް ފައިސާނެގުމާއި ޖަމާކުރުމުގެ ޚިދުމަތް ތަޢާރަފްކުރުމުގެ މަސައްކަތް މިހާރުވެސް ކުރަމުން ގެންދާ ކަމަށްވެސް ވިދާޅުވިއެވެ.