އަންނަ އަހަރުގެ ބަޖެޓުގެ ނަތީޖާއަކަށްވާނީ ރައްޔިތުން ދެރުން-އެމްޑީޕީ

އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް މިހާރު ހުށަހަޅާފައިވާ 24.3 ބިލިއަން ރުފިޔާގެ ބޮޑު ބަޖެޓުގެ ނަތީޖާއަކަށްވާނީ ވަޒީފާ އުފެދުމަކާ ނުލައި ރާއްޖޭގެ ކޮންމެ ރައްޔިތަކު 92،000 ރުފިޔާއިން ދެރުން ކަމަށް އެމްޑީޕީން ބުނެފިއެވެ.

ބެޖެޓާ ބެހޭގޮތުން އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި އެޕާޓީގެ ޗެއާޕާސަންގެ ނާއިބު މާލީ، ޢަލީ ނިޔާޒު ވިދާޅުވީ އެޕާޓީން ހެދި ދިރާސާއިން އެދަދަށް ކޮންމެ ދިވެހި ރައްޔިތަކު ދަރަނިވެރިވާނެކަން އެނގިފައިވާ ކަމަށެވެ.

މި ބައްދަލުވުމުގައި ބައިވެރިވެ ވަޑައިގެންނެވި ގަމު ދާއިރާގެ އެމްޑީޕީ މެންބަރ ފައްޔާޒު އިސްމާއީލް ވިދާޅުވީ އެ ބަޖެޓަކީ ތަފާތުކުރުންތައް ވަރަށް ބޮޑު ބަޖެޓެއް ކަމަށެވެ. އަދި އެއްވެސް އަމާޒެއް އެބަޖެޓުން ފެންނަން ނެތް ކަމަށެވެ. މިބަޖެޓުގެ ސަބަބުން ޚަރަދު ބޮޑުވުންނޫން ކަމެއް ފެނިގެންދާނެ ކަމަށް ގަބޫލު ނުކުރެވޭ ކަމަށްވެސް ވިދާޅުވިއެވެ.

އާމްދަނީ ލިބޭނެ ކަމަށް ލަފާކޮށްފައިވާ ކަންކަމުން ފައިސާއެއް ނުލިިއްޖެ ކަމަށްވާނަމަ ބަޖެޓް ޑެފިސިޓް 4-5 މިލިއަން ރުފިޔާއަށް ބޮޑުވާނެ ކަމަށް ލަފާކުރެވޭ ކަމަށްވެސް ވިދާޅުވިއެވެ. ފައްޔާޒު ވިދާޅުވީ މިއީ ރާއްޖޭގެ އިގްތިސާދު ކުރިއަރައިގެންދާނެ ބަޖެޓެއް ނޫންކަމަށެވެ. އޮޅުން ފިލުވަންޖެހޭ ގިނަކަންކަން ބަޖެޓުގައި ހިމަނާފައިވެއެވެ.

އެމްޑީޕީގެ ހޯދުންތަކާއި ސިޔާސަތު އެކުލަވާލުމާ ބެހޭ ކޮމިޓީގެ މުގައްރިރު ހުސެއިން އަމްރު ވިދާޅުވީ ލިބޭ އާމްދަނީއަށްވުރެ ބޮޑުއެއްޗެއް ހޭދަކުރަންޖެހޭ ކަމަށް ނަޖެޓުން ދައްކާ ކަމަށެވެ. އޭނާ ވިދާޅުވީ އެބަޖެޓަކީ ޕީޕީއެމްއިން އޮޅުވާލައިގެން ހުށަހަޅާފައިވާ ބަޖެޓެއް ކަމަށެވެ.