ސީރިއާއަށް ހަނގުރާމައަށް ދާން މަސައްކަތްކުރި ތިން ދިވެހިން ހައްޔަރުކޮށްފި

ސީރިޔާގައި ކުރަމުންދާ ހަނގުރާމައިގައި ބައިވެރިވާން މަސައްކަތް ކުރި ކަމުގެ ތުހުމަތުގައި ލަންކާ އިން ހައްޔަރުކުރި ތިން ދިވެހިން ރޭ މާލެ ގެނެސްފި ކަމަށް ފުލުހުން ހާމަކޮށްފިއެވެ.

މާލެ ގެނައީ އުމުރުން 25 އަހަރުގެ ފިރިހެނަކާއި 23 އަހަރުގެ ފިރިހެނެއް އަދި 18 އަހަރުގެ އަންހެނެއްކަމަށް ފުލުހުން ބުނެއެވެ. 

ހައްޔަރުކުރުމަށް ފަހު ސުވާލު ކުރުމުން އެމީހުން ވަނީ ސްރީލަންކާ އިން ބޭސްފަރުވާގެ ކަންކަން ދިޔަ ގޮތާ މެދު ހިތްހަމަނުޖެހިގެން ތުރުކީ އަށް ދާން މަސައްކަތް ކުރަމުން ދިޔަ ކަމަށް ބުނެ ސްރީލަންކާގެ ފުލުހުންނަށް އޮޅުވާލަން މަސައްކަތް ކޮށްފައިވާ ކަމަށް ފުލުިހުން ބުނެއެވެ. 

އެ ތިން މީހުންގެ ތެރެއިން އުމުރުން 23 އަހަރުގެ ފިރިހެންމީހާ އާއި 18 އަންހެން މީހާ އަކީ މިއަހަރުގެ މާޗް 19 ގައި ކޯޓުން ބޭރުގައި އަމިއްލަ އަށް ކައިވެނި ކޮށްގެން އުޅޭ ދެމީހުން ކަމަށް ފުލުހުން ހާމަކުރެއެވެ. އެ މައްސަލާގައި ހައްޔަރުކޮށްފައިވާ 25 އަހަރުގެ މީހާގެ މާރާމާރީގެ ކުށުގެ ރެކޯޑް އޮންނަ ކަމަށް ފުލުހުން ބުނެއެވެ.