ސިލްކު ރޫޓުގައި ބައިވެރިވިއަސް ގައުމީ މަސްލަހަތު އިސްކުރާނަން: ފޮރިން މިނިސްޓަރ

ދިވެހިރާއްޖޭގެ މިނިވަންކަމާ، އިސްތިގުލާލު ގެއްލޭފަދަ އެއްވެސް ކަމެއް ނުކުރާނެކަމަށާ، ޗައިނާގެ ސިލްކު ރޫޓުގައި ބައިވެރިވީނަމަވެސް އެކަމުގައި އިސްކުރާނީ ދިވެހިރާއްޖޭގެ ގައުމީ މަސްލަހަތުކަމަށް ފޮރިން މިނިސްޓަރ ދުންޔާ މައުމޫނު ވިދާޅުވެއްޖެއެވެ.

ކޮމަންޑޫ ދާއިރާގެ މެންބަރު އަހްމަދު ނާޝިދު މިއަދު ރައްޔިތުންގެ މަޖިލީހުގެ ޖަލްސާގައި ދެންނެވި ސުވާލަކަށް ޖަވާބު ދެއްވަމުން، ދުންޔާ ވިދާޅުވީ ރައީސް ޔާމީންގެ ހާރިޖީ ސިޔާސަތު ބިނާވެފައިވަނީ ރާއްޖޭގެ ސަރަހައްދުގެ ރައްކާތެރިކަން ދަމަހައްޓާ ދިވެހިރާއްޖޭގެ މިނިވަންކަން ހިމާޔަތް ކުރުމުގެ މައްޗަށް ކަމަށެވެ.

" ޗައިނާ އިން މިހާރު ތައާރަފްކޮށްފައިވާ ސިލްކް ރޯޑް މަޝްރޫއުގައި ދިވެހި ސަރުކާރުން ބައިވެރިވާން ނިންމީ އެ މަޝްރޫއުގެ ޒަރީއާ އިން ރާއްޖޭގެ ގައުމީ މަސްލަހަތު ކުރިއަރުވާ ދިވެހި ރައްޔިތުންގެ ލާބައާއި މަންފާ އިތުރުކުރެވޭނެ ކަމަށް ފެންނާތީ. ރާއްޖެއަކީ މިނިވަން މުސްތަގިއްލު ގައުމެއް ކަމަށްވާތީ ރާއްޖޭގެ ހާރިޖީ ސިޔާސަތު ތަންފީޒް ކުރުމަށް އެހެން ގައުމަކާ މަޝްވަރާކުރަން ނުޖެހޭނެ،" ދުންޔާ ވިދާޅުވިއެވެ. 

އޭނާ ވިދާޅުވީ ސިިލްކު ރޫޓުގެ މަޝްރޫއަކީ ލޭންޑް އަދި މެރިޓައިމް މަޝްރޫއެއް ހިމެނޭ ޕްރޮޖެކްޓެއްކަމަށެވެ. މިމަޝްރޫއުގައި ޑިވެލޮޕްމަންޓް ބޭންކްތަކާއި އަދި އެހެނިހެންވެސް އިގްތިސޯދީ ކަންތައްތަކެއް ހިމެނޭ ކަމަށާއި އެ މަޝްވަރާތައް މިހާރުވެސް ޗައިނާ ސަރުކާރާއެކު ކުރިއަށްދާ ކަމަށް މިނިސްޓަރު ވިދާޅުވި އެވެ.

ސްލްކް ރޫޓުގެ ޕްރޮޖެކްޓުގައި ބައިވެރިވުމަށް އިންޑިއާއާއި މަޝްވަރާކުރިންތޯ ސުވާލުކުރުމުން މިނިސްޓަރ ވިދާޅުވީ ރާއްޖެއަކީ މިނިވަން އަދި މުސްތަގިއްލު ގައުމެއްކަމަށެވެ. އަދި އެ މަޝްރޫގައި އިންޑާވެސް ބައިވެރިވެފައިވާކަމަށް އޭނާ ވިދާޅުވިއެވެ.

ޗައިނާގެ "ސިލްކު ރޫޓް" ގައި ބައިވެރިވުމަށް ރައީސް ޔާމީން ނިންމެވި ނިންމެވުމަކީ އިންޑިއާ ކަނޑުގެ ސުލްހަ ނަގާލުމަށް ރައީސް ޔާމީން މިސްރާބު ޖެއްސެވުން ކަމަށް ކުރީގެ ރައީސް މުޙައްމަދު ނަޝީދު ވަނީ ވިދާޅުވެފައެވެ.

އެމްޑީޕީގެ އާ ޒައާމަތާއެކު ފުރަތަމަ ފަހަރަށް އެމްޑީޕީން ބޭއްވި އާއްމު ބޮޑު ޖަލްސާގައި  ވާހަކަފުޅު ދައްކަވަމުން ރައީސް ނަޝީދު ވިދާޅުވީ، އެހެން ގައުމެއްގެ ސިލްކް ރޫޓްގައި ރާއްޖެ އިން ބައިވެރިވާން ނުޖެހޭ ކަމަށެވެ. މީގެއިތުރަށް ރައީސް ނަޝީދު ވިދާޅުވީ އިންޑިއާކަނޑުގައި ރާއްޖެ އޮންނަންވާނީ ވަކި އަތަކަށް ނުޖެހޭ ޤައުމެއްގެ ގޮތުގައިކަމަށެވެ. އަދި ދުނިޔޭގެ ބޮޑެތި ބާރުތަކުގެ މެދުގައި ކުރެވޭ ހަނގުރާމައެއްގައި ރާއްޖޭގެ މިނިވަންކަމަށް ގެއްލުމެއް ނުވާގޮތަށް ކަމަށެވެ. އަދި ރާއްޖެއަކީ ޗައިނާއާއި އެމެރިކާއާއި އިންޑިއާގެ ރައްޔިތުންވެސް އައިސްގޮސްވާ ޤައުމެއްގެ ގޮތުގައި އޮންނަންޖެހޭ ކަމަށް ރައީސް ނަޝީދުގެ ވާހަކަފުޅުގައި ވިދާޅުވިއެވެ.