އޮޑިޓަރޖެނެރަލް ކަމުގެ މަގާމަށް ކުރިމަތި ލުމުގެ ފުރުސަތު ހުޅުވާލައިފި

އޮޑިޓަރ ޖެނެރަލްގެ މަޤާމަށް ކުރިމަތިލުމުގެ ފުރުޞަތު، ރައީސުލްޖުމްހޫރިއްޔާގެ އޮފީހުން‏‎ ‎‏މިއަދު ‏‏ހުޅުއްވާލައްވައިފިއެވެ.

ރައީސް އޮފީހުން ސަރުކާރުގެ ގެޒެޓްގައި މިއަދު ޝާއިޢު ‏‏ކުރައްވާފައިވާ އިޢުލާނުގައި ބުނެފައިވަނީ މިފުރުސަތު ހުޅުވާފައިވަނީ، މިއަދުން ފެށިގެން މިނޮވެމްބަރު‏‎ ‎‏މަހުގެ 10 ވަނަ ދުވަހުގެ ހަވީރު 15.00ގެ ނިޔަލަށް ކަމަށެވެ.

‏‏އޮޑިޓަރ ޖެނެރަލްކަމަށް ކުރިމަތިލުމަށް އެދޭ ފޯމާއި، އިޤްރާރާއި ކުށުގެ ރެކޯޑް ފޯމު ދޫކުރުމާއި، ފޯމުތަކާއި އިޤްރާރު ބަލައިގަތުމަށް ހަމަޖެހިފައިވަނީ، އެމަގާމަށް ކުރިމަތިލުމަށް ދީފައިވާ މުއްދަތުގައި، ރަސްމީ ބަންދު ދުވަސްތައް ފިޔަވައި، އެހެން ދުވަސްދުވަހުގެ ހެނދުނު 8:00 އިން ‏‏ހަވީރު 4:00 އަށް ރައީސުލްޖުމްހޫރިއްޔާގެ އޮފީހުން ކަމަށްވެސް ގެޒެޓުގައި ބުނެފައިވެއެވެ.

އޮޑިޓަރ ޖެނެރަލަކު ހޯދުމަށް ރައީސް އޮފީހުން އިއުލާނު ކޮށްފައިވަނީ އޮޑިޓް ގާނޫނަށް ރައްޔިތުންގެ މަޖިލީހުން ގެނައި އިސްލާހަކާ ގުޅިގެންނެވެ. އޮކްޓޫބަރު މަހުގެ 29 ވަނަ ދުވަހު ރައްޔިތުންގެ މަޖިލީހަށް މަހިބަދޫ ދާއިރާގެ ޕީޕީއެމް މެމްބަރު އަހްމަދު ތޯރިގު ހުށަހަޅުއްވައި އަޣުލަބިއްޔަތުން ފާސްކުރި އިސްލާހުގައި ބުނެފައިވަނީ ބިލް ތަސްދީގުކޮށް އަމަލުކުރަން ފަށާތާ 30 ދުވަހުގެ ތެރޭގައި އޮޑިޓަ ޖެނެރަލްގެ މަގާމަށް ބޭފުޅަކު އައްޔަން ކުރެއްވުމަށް ނަމެއް ނުވަތަ ނަންތަކެއް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވަން ވާނެ ކަމަށެވެ.